بۇۇ اباي وبلىسىنا قاتىستى ارنايى قارار قابىلدادى

قاراردى بىرىككەن ۇلتتار ۇيىمىنا مۇشە 85 ەل بىرلەسىپ ازىرلەدى.

بۇۇ باس اسسامبلەياسىنىڭ 77-سەسسياسىندا اباي وبلىسىن وڭالتۋ تۋرالى قارار قابىلداندى، دەپ حابارلايدى Almaty-akshamy.kz

بۇل حالىقارالىق ۇيىمنىڭ 1997 جىلدان بەرى وسى ايماق حالقىنا قولداۋ كورسەتۋ مەن قورشاعان ورتانى قالپىنا كەلتىرۋگە ارنالعان 11-رەزوليۋسياسى بولىپ تابىلادى. ۇيىم حالىقارالىق قاۋىمداستىقتى وسى ماقساتتاعى ارنايى باعدارلامالار مەن جوبالاردى ازىرلەۋ مەن جۇزەگە اسىرۋدا قازاقستانعا كومەك بەرۋگە شاقىرادى، ءوڭىردىڭ تۇراقتى ەكونوميكالىق دامۋىن قامتاماسىز ەتۋگە ۇندەيدى. قۇجاتتا الەم ەلدەرىنىڭ ايماقتاعى احۋالدان حاباردار بولىپ وتىرۋىنا ءمان بەرۋ كەرەكتىگى جازىلعان.

"قاراردى بىرىككەن ۇلتتار ۇيىمىنا مۇشە 85 ەل بىرلەسىپ ازىرلەدى. بۇل حالىقارالىق قاۋىمداستىقتىڭ يادرولىق سىناقتاردان جاپا شەككەن بۇرىنعى سەمەي ءوڭىرى حالقىنىڭ، اسىرەسە ونداعى بالالار مەن باسقا دا وسال توپتاردىڭ دەنساۋلىعى ءۇشىن الاڭدايتىنىن كورسەتەدى. قۇجاتتا قازاقستان ۇكىمەتىنىڭ ايماقتى قالپىنا كەلتىرۋدەگى ماڭىزدى ءرولى ايتىلىپ، الەم ەلدەرىن وسى باعىتتا قولعا الىنىپ جاتقان ءىس-شارالارعا اتسالىسۋعا شاقىرادى"، دەدى بۇۇ جانىنداعى قازاقستاننىڭ تۇراقتى وكىلدىگىنىڭ كەڭەسشىسى باۋىرجان كەرىمقۇلوۆ.