بۇل تۋرالى سەناتتا ايتىلدى.
ۇشاق كەشىككەن جاعدايدا، بيلەت قۇنىنىڭ ءبىر بولىگى قايتارىلادى. سەنات قابىرعاسىندا كولىك جانە جەر قويناۋىن پايدالانۋ ماسەلەلەرى بويىنشا زاڭ جوباسىن تانىستىرعان يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ايتتى. قۇجاتتا وزگە دە كولىكتەردەگى قاۋىپسىزدىك جايى قوزعالدى، دەپ حابارلايدى Almaty-akshamy.kz.
زاڭعا ەنگىزىلگەلى وتىرعان قوسىمشا وزگەرىس اۋە كومپانياسىنىڭ كىناسىنەن ۇشاق ۋاقىتىندا ۇشپاسا، ءار ساعاتىنا بيلەت اقىسىنىڭ 3 پروسەنتىن قايتارۋى كەرەك. قايىربەك وسكەنبايەۆتىڭ ايتۋىنشا، جولاۋشى الدىمەن اۋە كومپانياسىنا ارىز جازادى. ودان ناتيجە شىقپاسا، سوت ارقىلى ءوز اقشاسىن وندىرە الادى. سوڭعى جىلدارى اۋە كەمەلەرىنەن كىنارات بولىپ جاتقانى ءمالىم. مينيستر وسى ماقساتتا كەلەر جىلى اۋە قاۋىپسىزدىگىن باقىلايتىن ۇيىمنىڭ فيليالى اشىلۋى مۇمكىن ەكەنىن ايتتى. قۇجات قابىلدانسا، ازاماتتىق اۆياسيا قىزمەتىن مەملەكەتتىك باقىلاۋ جانە قاداعالاۋ تيىمدىلىگى ارتادى، كولىكتىك باقىلاۋ كەزىندە سىبايلاس جەمقورلىق تاۋەكەلدەرىن جويۋ كوزدەلگەن. سونداي-اق ءتۇرلى ترانسپورتتاردى پايدالاناتىن جولاۋشىلاردى، باگاجدى جانە جۇكتەردى تاسىمالداۋ قاۋىپسىزدىگىن كۇشەيتۋ كوزدەلگەن. تەمىرجول كولىگىندەگى اپاتتاردى، سونداي-اق كەمەلەردەگى اۆاريالىق جاعدايلاردى تەرگەۋدىڭ تيىمدىلىگىن ارتتىرۋ جايى دا بار.