بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ (قنردا) ءتورايىمى ءمادينا ءابىلقاسىموۆا ايتتى.
قازاقستاندا ءۇش اي ىشىندە 110 ادام ميكروقارجى ۇيىمدارى (مقۇ) ارقىلى نەسيەلىك الاياقتىقتىڭ قۇربانى بولدى، دەپ حابارلايدى Almaty-akshamy.kz
«2021 جىلعى 22 قازاننان باستاپ 2022 جىلعى 21 قاڭتارعا دەيىنگى كەزەڭدە 25 مقۇ-نىڭ اتىنا جەكە تۇلعالاردان جالپى سوماسى 7،8 ملن تەڭگەگە ءۇشىنشى تۇلعالاردىڭ الاياقتىق تاسىلمەن ميكروكرەديتتەر رەسىمدەۋى تۋرالى 110 ءوتىنىش كەلىپ ءتۇستى، جوعارىدا كەلتىرىلگەن فاكتىلەر بويىنشا مالىمەتتەر قۇقىق قورعاۋ ورگاندارىنا جىبەرىلدى»، - دەپ حابارلادى ءابىلقاسىموۆا ءماجىلىس دەپۋتاتتارىنىڭ ساۋالىنا جاۋاپ بەرە وتىرىپ.
ونىڭ ايتۋىنشا، مقۇ ازاماتتاردىڭ 110 ءوتىنىشى بويىنشا كەلەسى شارالاردى قابىلدادى:
- 81 ءوتىنىش بويىنشا 5،6 ملن تەڭگە سوماسىنا بەرەشەك ەسەپتەن شىعارىلدى جانە ءبىر مەزگىلدە كرەديتتىك تاريحقا تۇزەتۋ جۇرگىزىلدى؛
- قالعان 29 ءوتىنىش بويىنشا سىياقى ەسەپتەۋ جانە تالاپ-ارىز جۇمىسى توقتاتىلدى.
«قۇقىق قورعاۋ جانە (نەمەسە) سوت ورگاندارىنان الاياقتىق فاكتىسىن راستايتىن ءىس جۇرگىزۋ قۇجاتىن العاننان كەيىن ميكروكرەديتتەردى ەسەپتەن شىعارۋ جانە كرەديتتىك تاريحتى تۇزەتۋ بويىنشا ءىس-شارالار جۇرگىزىلەتىن بولادى»، - دەپ ناقتىلادى قنردا باسشىسى.
سونداي-اق، ول اتالعان كەزەڭدە مقۇ-نىڭ اتىنا قۇقىق قورعاۋ ورگاندارىنان بەس مقۇ-دا جالپى سوماسى 828 مىڭ تەڭگە بولاتىن 24 شاعىن نەسيەنى ءۇشىنشى تۇلعالاردىڭ رەسىمدەۋى تۋرالى اقپارات كەلىپ تۇسكەنىن ايتتى.
«مقۇ 24 فاكت بويىنشا مىناداي شارالار قابىلدادى: ەكى فاكت بويىنشا 150 مىڭ تەڭگە سوماعا ميكروكرەديتتەر ەسەپتەن شىعارىلدى جانە ازاماتتاردىڭ كرەديتتىك تاريحى تۇزەتىلدى؛ 678 مىڭ تەڭگە سوماعا 22 فاكت بويىنشا سىياقى ەسەپتەۋ توقتاتىلدى، ميكروكرەديتتەر ەسەپتەن شىعارىلادى. وسىلايشا، مەموراندۋمدى ىسكە اسىرۋ اياسىندا ينتەرنەت-الاياقتىق فاكتىلەرىن جويۋ بويىنشا جەدەل جانە ءتيىمدى ارەكەت ەتۋ جۇزەگە اسىرىلادى»، - دەپ سەندىردى ءابىلقاسىموۆا.