سالىقتان جالتارىپ جۇرگەن كاسىپكەرلەر بار.
ولار تاۋاردى ساتىپ، تولەمدى ءموبيلدى اۋدارىم ارقىلى قابىلدايدى. تيىسىنشە پايدانىڭ ءبىر تيىنىن دا قازىناعا قوسپايدى. ال بۇل زاڭسىز. بۇل تۋرالى مەملەكەتتىك كىرىستەر كوميتەتى حابارلادى. ەلدە ءموبيلدى اۋدارىمدى كاسىپكەرلىك ماقساتتا پايدالانۋعا تىيىم سالىنعان، دەپ حابارلايدى Almaty-akshamy.kz 24.kz-كە سىلتەمە جاساپ.
ەندى جاۋاپتى ورگاندار 2025 جىلعا دەيىن كەزەڭ-كەزەڭىمەن اۋدارىمداردى باقىلاۋعا الۋدى جوسپارلاپ وتىر. ناقتىراق ايتساق، ءۇش اي بويى تۇراقتى تۇردە شوتىنا 100 ادامنان اقشا تۇسكەن ازاماتتار نازارعا ىلىنەدى. بيىل مەملەكەتتىك قىزمەتكەرلەر مەن ولاردىڭ جۇبايلارى تەكسەرىلەدى.
كەلەسى جىلى كۆازيمەملەكەتتىك سەكتور مەن مەملەكەتتىك مەكەمەلەردىڭ قىزمەتكەرلەرى، ودان كەيىن جەكە كاسىپكەرلەر نازارعا الىنادى. 2026 جىلى قالعان ازاماتتاردىڭ بانك شوتتارى باقىلانادى.
اينۇر سارتايەۆا، ق ر قم مەملەكەتتىك كىرىستەر كوميتەتىنىڭ رەسمي وكىلى: - نەگىزى جەكە ماقساتتا پايدالانىلاتىن ءموبيلدى اۋدارىمعا ەشقانداي شەكتەۋ جوق. مىسالى، كەز كەلگەن ازاماتتىڭ جەكە ماقساتتا اۋدارىمى بولادى. ول تۋىسقاندارىنا، اتا-اناسىنا، بالاسىنا، دوستارىنا تۋعان كۇنىنە سىيلىق، قۇداي جولى، باتا، توي بولىپ جاتادى. سونداي اۋدارىمدارعا سالىق سالىنبايدى.