US Open تۋرنيرىندە قازاقستاندىق تەننيسشىلەردىڭ قارسىلاستارى بەلگىلى بولدى، دەپ حابارلايدى almaty-akshamy.kz.
جەكەلەي سىندا ايەلدەر اراسىنداعى جارىسقا قازاقستاننان ءتورت تەننيسشى قاتىسادى. ەلىمىزدىڭ ءبىرىنشى، الەمنىڭ 20-راكەتكاسى ەلەنا رىباكينا العاشقى اينالىمدا دۇنيەجۇزىلىك رەيتينگتە 99-ورىندا تۇرعان بەلارۋس وكىلى، تاجىريبەلى سپورتشى الەكساندرا ساسنوۆيچپەن كەزدەسەدى. الەمنىڭ 33-راكەتكاسى يۋليا پۋتينسيەۆا رەيتينگتە 70-ورىنداعى تاعى ءبىر ءتىسقاققان ويىنشى، 36 جاستاعى ەستونيالىق كاييا كانەپيمەن كۇش سىناسادى. رەيتينگتە 110-ورىندا تۇرعان زارينا دياسقا الەمنىڭ 73-راكەتكاسى، جۋىردا 20 جاسقا تولاتىن امەريكالىق اماندا انيسيموۆا قارسىلاس اتاندى. قازاقستان ايەلدەر قۇراماسىنىڭ كاپيتانى، رەيتينگتە 449-ساتىداعى تاجىريبەلى ياروسلاۆا شۆەدوۆا الەمنىڭ 98-راكەتكاسى، يتاليالىق ياسمين پاولينيمەن كورتقا شىعادى.
ەرلەر اراسىندا قازاقستاننىڭ ءبىرىنشى، الەمنىڭ 37-راكەتكاسى الەكساندر بۋبليك العاشقى اينالىمدا رەيتينگتە 134-ساتىداعى گەرمانيالىق ياننيك حانفماننىڭ شاماسىن بايقاپ كورەدى. ەگەر م.كۋكۋشكين ىرىكتەۋ سايىستارىنىڭ فينالىندا قارسىلاسىن ۇتسا، نەگىزگى دودادا دا باعىن سىنايدى.