الماتى قالاسىندا ۇلى وتان سوعىسىنىڭ ارداگەرى جانە تانىمال عالىم زۇلحارناي سەيىتوۆ 102 جاسقا تولعان مەرەيتويىن اتاپ ءوتتى.
زۇلحارناي سەيىتوۆ 1922 جىلدىڭ 27 جەلتوقسانىندا ومبى وبلىسىنىڭ جاڭا كيپچاك اۋىلىندا دۇنيەگە كەلگەن. 1942 جىلى قىزىل ارميا قاتارىنا شاقىرىلىپ، ۇلى وتان سوعىسىندا ستالينگرادتان باستاپ بەلارۋس، پولشا ارقىلى ءوتىپ، بەرليندى شابۋىلداۋ جانە پوتسدام سارايىن مينادان تازارتۋ وپەراسيالارىنا قاتىستى. ەرلىگى ءۇشىن ول قىزىل جۇلدىز وردەنىمەن جانە «ەرلىگى ءۇشىن» مەدالىمەن ماراپاتتالدى.
سوعىستان كەيىن زۇلحارناي سەيىتوۆ وتانىنا قىزمەتىن جالعاستىرىپ، ومبى اۋىلشارۋاشىلىق ينستيتۋتىن اياقتادى. كەيىن قازاقستانعا كوشىپ كەلىپ، ءوزىن عىلىمعا ارنادى. بيولوگيا عىلىمدارىنىڭ دوكتورى، رەسپۋبليكالىق عىلىم اكادەمياسىنىڭ اكادەميگى، قازاقستان-رەسەي مەديسينالىق ۋنيۆەرسيتەتىنىڭ مولەكۋلالىق بيولوگيا كافەدراسىنىڭ پروفەسسورى زۇلحارناي سەيىتوۆ 150-دەن استام عىلىمي جۇمىس پەن مونوگرافيانىڭ، 10 وقۋ قۇرالىنىڭ، 14 پاتەنت پەن 8 اۆتورلىق كۋالىكتىڭ اۆتورى اتاندى. ونىڭ زەرتتەۋلەرى مەديسينا مەن ازىق-تۇلىك ونەركاسىبىنىڭ دامۋىنا ۇلكەن ۇلەس قوستى.
زۇلحارناي سەيىتوۆ – ەرلىك پەن عىلىمعا ادالدىقتىڭ، وتانىنا دەگەن سۇيىسپەنشىلىكتىڭ جارقىن ۇلگىسى.
– ونىڭ ءومىرى – ءبىزدىڭ ۇرپاق ءۇشىن اڭىز، جاستار ءۇشىن شابىت كوزى جانە وتانسۇيگىشتىكتىڭ وشپەس ۇلگىسى، – دەپ اتاپ ءوتتى الماتى گارنيزونىنىڭ باسپا ءسوز قىزمەتى.
مەرەيتوي كۇنى اقساقالدى المالى اۋدانىنىڭ قورعانىس ىستەرى جونىندەگى باسقارماسىنىڭ اسكەري قىزمەتشىلەرى مەن راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتتارى قۇتتىقتادى. ولار ارداگەرگە زور دەنساۋلىق، ۇزاق عۇمىر جانە اماندىق تىلەدى.