"بايقامايدى ەكەنبىز، باقىت دەگەن – ەكەۋمىز". بەلگىلى اقىن قادىر ءمىرزا-الىنىڭ وسى ءبىر ولەڭ جولدارى بىر-بىرىنە ىنتىق قىز بەن جىگىتتىڭ ماحاببات الەمىنەن سىر شەرتىپ تۇرعانى انىق. ال ونەردىڭ دە، ءومىردىڭ دە ايدىنىندا قاتار ءجۇزىپ كەلە جاتقان ميراس پەن قۇرالاي بەكجانوۆتاردىڭ بىزگە بەرگەن سۇحباتىنىڭ ءون بويىنان ءدال وسى ءبىر سوزدەردىڭ ۇشقىنىن كورگەندەي بولدىق. كانە، جۇلدىزدى جۇپتىڭ الەمىنە بىرگە ساپارلايىق.
ءتىلشى: – سىزدەردى بىر-بىرىڭىزدەن بولەك الىپ قاراۋ مۇلدەم مۇمكىن ەمەس. زاماناۋي تىلمەن ايتساق، "ميراس پەن قۇرالاي" برەندىن قالىپتاستىردىڭىزدار. ونەر ايدىنىندا قول ۇستاسىپ كەلە جاتقاندارىڭىزعا قانشا جىل؟
ميراس: – قۇرالاي ەكەۋمىزدىڭ شاڭىراق كوتەرگەنىمىزگە بيىل جيىرما بەس جىل. ال قول ۇستاسىپ ءان ايتىپ جۇرگەنىمىزگە جيىرما جەتى جىل بولىپتى. ەكەۋمىز ستۋدەنت كەزىمىزدە الماتىنىڭ نەكە سارايىنا جۇمىسقا كىرىپ، دۋەت بولىپ ولەڭ ايتاتىنبىز. ەندى عانا شاڭىراق كوتەرىپ جاتقان جاس جۇبايلار ءبىزدىڭ انىمىزبەن باسپالداقپەن كوتەرىلىپ، سالتاناتتى زالعا كىرىپ، نەكەسىن زاڭداستىرىپ، اق پاراققا قولدارىن قويىپ، تىركەۋدەن وتەتىن. سولاي تالاي جاستىڭ باقىتتى ساتىنە كۋا بولعانبىز.
ءتىلشى: – ءقازىر قانشالىقتى وستىڭىزدەر؟ ونەر الەمىندەگى توقىراۋ، ورلەۋ – قايسىسىن كوبىرەك وتكەردىڭىزدەر؟
ميراس: – كونسەرۆاتوريانى بىتىرگەن سوڭ ەكەۋمىز شاڭىراق كوتەردىك. اقتوبەدەگى احمەت جۇبانوۆ اتىنداعى مۋزىكالىق كوللەدجىنە جۇمىسقا كىردىك. ودان عازيزا جۇبانوۆا اتىنداعى اقتوبە وبلىستىق فيلارمونيادا، سوسىن قۇدايبەرگەن جۇبانوۆ اتىنداعى مەملەكەتتىك ۋنيۆەرسيتەتتە دە قوسىمشا جۇمىس ىستەپ جۇردىك. جاس وتباسىمىز. ومىرگە قۇشتارمىز دەگەندەي. شارشاۋدى بىلمەيتىنبىز. ءسويتىپ تورت-بەس جەردە قاتار ىستەپ جۇردىك. ءۇش-تورت جىلدان كەيىن استاناداعى "شابىت" مۋزىكا اكادەمياسىنا اسپيرانتۋراعا ءتۇسىپ، ونى دا ويداعىداي ءبىتىرىپ شىعىپ، قايتادان اقتوبەگە ورالىپ، فيلارمونياداعى جۇمىسىمىزدى جالعاستىردىق. وركەسترمەن ءان ايتىپ ءجۇرىپ، اراسىندا جەكە كونسەرتىمىزدى دە بەرىپ قوياتىنبىز. شىنىمدى ايتسام، بىزدە توقىراۋ دەگەن مۇلدەم بولماعان سەكىلدى. بالكىم ەكەۋ بولىپ جۇرگەسىن بە، الدە اكە-شەشەمىزبەن تۇرعاندىقتان بولار، كوتەرگەن جۇگىمىزدىڭ سالماعى دا سەزىلمەيتىن.
بىردە "نۇر-مۇقاسان" توبىنداعى مۇقاسان شاحزادايەۆ: "جيىن-تويلاردا دۋەتتەرىڭە جۇرتشىلىق ىقىلاستانا قول سوعاتىنىن بايقاپ ءجۇرمىن. الماتىعا كوشىپ كەلسەڭدەرشى. الىپ مەگاپوليستە مۇلدەم باسقا ورتا، ۇلكەن ساحنا دەگەندەي. سەندەردەن جۇلدىزدى جۇپ كورىپ تۇرمىن"، – دەدى. سول ءبىر اۋىز دوستىق پەيىل بىزگە قانات ءبىتىرىپ، الماتىعا ۇشىپ كەلدىك. ءبىرجولاتا كوشىپ كەلدىك. ءبىزدى قارسى العان دا مۇقاساننىڭ ءوزى. بىردەن بەلگىلى سازگەر، تالاي ءانشىنىڭ جۇلدىزىن جاققان باعلان وماروۆپەن تانىستىردى. كەيىن بىزگە دە جاناشىر، تۋعان اعامىزداي بولىپ كەتتى. پروديۋسەرلىگى بولەك اڭگىمە!
ءسويتىپ، باعلان اعامىزدىڭ ستۋدياسىندا ەڭ العاش "اسىل جارىم" دەگەن ءانىمىزدى جازدىردىق. ەرلان نۇرمانعالييەۆ دەگەن كومپوزيتور سوناۋ ارقالىقتان كەلىپ، وسى تۋىندىسىن باعلان وماروۆقا قالدىرىپ كەتكەن ەكەن. "كىمگە لايىقتى دەپ تاپساڭ، سوعان سىيلارسىڭ" دەپ. ال ءوزى كوپ ۇزاماي سىرقاتتانىپ، قايتىس بولىپ كەتكەن ەكەن. سول ادەمى ءان بىزگە بۇيىردى. جانە ءبىزدىڭ بولمىسىمىزعا، جان دۇنيەمىزگە ءدوپ كەلە قالدى. سوندىقتان بولار، ءبىزدى تانىمال ەتكەن سول "اسىل جارىم". كوپ ۇزاماي تەمىربەك جۇرگەنوۆ اتىنداعى ونەر اكادەمياسىنا قىزمەتكە كىردىك. ارادا از وتپەي قۇرالاي دەكرەتتىك دەمالىسقا شىعىپ كەتتى. ال مەن جۇمىسىمدى جالعاستىرا بەردىم. ون ەكى جىل ونەر اكادەمياسىندا ۆوكالدان ساباق بەردىك. ال ءقازىر الماتى وبلىسى مادەنيەت باسقارماسىنا قاراستى "الاتاۋ اۋەندەرى" ۇجىمىنىڭ انشىلەرىمىز. "قانشالىقتى وستىڭىزدەر؟" دەگەن سۇراعىڭىزعا ايتىپ جاتقانىم عوي. سول ءجۇرىپ وتكەن جولداردىڭ جەمىسى بولار، "قازاقستاننىڭ ەڭبەك سىڭىرگەن قايراتكەرى" دەگەن دارەجەگە جەتتىم. قۇرالاي بولسا "مادەنيەت سالاسىنىڭ ۇزدىگى" اتاعىن يەلەندى. بىزگە ۇزدىك دەگەن اتاقتى الىپ بەرىپ جاتقان، ارينە، حالىق، ونەرىمىزدى باعالايتىن كورەرمەن.
سۋرەت: كەيىپكەردىڭ جەكە ارحيۆىنەن
ءتىلشى: – ءان تاڭداعاندا كوبىنەسە كىم باستاما كوتەرەدى؟ ەڭ باستىسى نەگە ءمان بەرەسىزدەر – اۋەنگە مە، الدە سوزگە؟
قۇرالاي: – كوبىنە ميراس كوتەرەدى باستامانى. مەن قۋاتتايمىن. سەبەبى، ونىڭ بيىك تالعامىنا سەنەمىن. جالپى، قۇلاققا كەز كەلگەن ولەڭنىڭ اۋەلى اۋەنى كەلەدى عوي. جاعىمدى بولعانى، ارينە، ماڭىزدى. دەگەنمەن، ءبىز ميراس ەكەۋمىز دە مەكتەپتە ورىسشا وقىعانىمىزبەن، سوزىنە، قازاقى ماعىناسىنا كوبىرەك ۇڭىلەمىز. ءتىپتى، بىزگە ۇسىنىلعان شىعارمانى فيلولوگ، اقىن دوستارىمىزعا كورسەتىپ الامىز، ۇيقاسى قالاي، ءسوز تىركەسى دۇرىس تۇر ما دەپ كەڭەس سۇرايمىز. ۇيدەگى انامىزدان دا پىكىر سۇرايتىن ءساتىمىز از ەمەس. جالپى، نە نارسەنىڭ دە كوپپەن شەشىلگەنى جاقسى عوي. سونداي-اق، جاقسى ءسوز بەن جاعىمدى اۋەن دە ۇرپاق تاربيەلەۋگە قاۋقارلى ۇلكەن كۇش ەكەنى انىق.
ءتىلشى: – قازاق ەستراداسىندا "ارزان" اندەر كوبەيدى دەگەن پىكىرمەن كەلىسەسىز بە؟
ميراس: – جالپى، ءبىز سىنشى ەمەسپىز عوي. ەكىنشىدەن، وزگەنى جامانداۋعا قۇقىمىز دا جوق. دەگەنمەن قوعامنىڭ ءبىر مۇشەسى رەتىندە پىكىرىمدى ايتار بولسام، حالىقتىڭ سۇرانىسى سول دەڭگەيگە ءتۇسىپ كەتكەن سەكىلدى كورىنەدى ماعان. سونداي جەڭىل اندەردى تىڭداپ، سوعان بيلەپ، كوڭىل كوتەرگەندى قالاپ تۇراتىنداي. سوعان قاراي كەيبىر انشىلەر دە ارزان دۇنيەلەرگە اۋەستەنىپ كەتكەندەي.
وقۋشى كۇنىمدە مىنانى ءجيى ەستيتىنمىن. ءبىر ءان جارىققا شىقسا، ول اۋەلى كومپوزيتورلار وداعىنىڭ تالقىسىنا سالىنادى ەكەن. ودان سوڭ جازۋشىلار وداعىنا كەلىپ تۇسەدى. ونداعىلار "بۇل ولەڭدى كىم جازدى، بۇرىنعى شىعارمالارى قانداي ەدى" دەگەن سەكىلدى ەلەكتەن وتكىزگەن. ءتىپتى، سول وداقتاردان قۇرالعان كوركەمدىك كەڭەس "بۇل ءاندى قاي انشىگە ۇسىنامىز، شىعارمانىڭ تابيعاتى قاي ونەرپازعا كەلەدى" دەپ ورتاعا سالاتىن بولعان. بالكىم ول ءان تىڭدارمانعا العاشقى كۇنى، ەكىنشى كۇنى دە، ءتىپتى ءۇشىنشى كۇنى دە ۇناماۋى مۇمكىن. ءبىراق كۇندە قايتالاپ تىڭداي بەرگەن سوڭ، جۇرەگىنە جول تاۋىپ، سول جوعارى ءاننىڭ دەڭگەيىنە ءوزى دە كوتەرىلۋى مۇمكىن عوي. ءان دە – يدەولوگيا. ال ءقازىر كەرىسىنشە. تىڭدارمان انشىلەردى تاربيەلەپ كەتتى. وكىنىشكە وراي سول دەڭگەيگە ءتۇسىپ بارا جاتىرمىز. سوندىقتان باياعى تەگەۋرىندى، باقىلاۋشى، كوركەمدىك كەڭەس دەگەن كەرەك بولىپ تۇر.
سۋرەت: كەيىپكەردىڭ جەكە ارحيۆىنەن
ءتىلشى: – ءقازىر بۇرىنعىداي ەمەس، جۇلدىزدى جۇپ كوبەيدى. سىزدەردىڭ ەرەكشەلىكتەرىڭىز نەدە؟
قۇرالاي: – ەكەۋمىز دە كلاسسيكالىق باعىتتا ءبىلىپ الدىق قوي. ەسترادا دا جولىمىزدى ايقىنداپ العان جۇپپىز. بىلتىر رەسپۋبليكا سارايىندا ميراستىڭ ەلۋ جاسقا تولعان مەرەيتويىنا وراي "ءبىزدىڭ ءان" دەگەن اتپەن جەكە كونسەرتىمىزدى بەردىك. ءبىرىنشى ءبولىمى "وتىرار سازى" فولكلورلىق-ەتنوگرافيالىق وركەسترىنىڭ سۇيەمەلدەۋىمەن، ال ەكىنشى ءبولىمى ەسترادالىق جانردا ءوتتى. ونىڭ الدىنداعى جەكە كونسەرتىمىزدە ءبىرىنشى بولىمدە قۇرمانعازى اتىنداعى قازاق ۇلتتىق وركەسترى مەن جامبىل اتىنداعى قازاق مەملەكەتتىك اكادەميالىق فيلارمونياسىنىڭ سۇيەمەلدەۋىمەن قازاق، ورىس، شەت ەل كومپوزيتورلارىنىڭ كلاسسيكالىق تانىمال اندەرىن شىرقادىق. ەكىنشى ءبولىمدى ەستراداعا ارنادىق. ەرەكشەلىگىمىز سول شىعار.
ءتىلشى: – ۋاقىت وتە كەلە اندەرىڭىزدى كەلەشەك ۇرپاقتىڭ قالاي ەسكە العانىن قالار ەدىڭىزدەر؟
ميراس: – كيەلى ساحنادا جۇرگەن سوڭ، ارينە، ءىزىڭنىڭ قالعانى جاقسى عوي. مەن، مىسالى، ەرمەك سەركەبايەۆتىڭ اندەرىن تىڭداسام، جانىم راحاتتانىپ، ءبىر تىنىعىپ قالامىن. ءبىزدىڭ اندەرىمىزدى دە كۇندەردىڭ كۇنىندە تىڭدارماندارىمىز "ميراس پەن قۇرالايدىڭ اندەرى جانىمىزعا شۋاق سەبەدى" دەپ جاتسا، ونەردە بەكەر جۇرمەگەنىمىز عوي. ءقازىر قازاق راديوسىنىڭ "التىن قورىندا" ءبىزدىڭ دە داۋىسىمىز، ونەرىمىز جازىلىپ قالىپ جاتىر. ول دا بىزگە شابىت سىيلايدى.
ءتىلشى: – وتباسىلىق ءومىر مەن ونەردى قاتار الىپ ءجۇرۋدىڭ قيىندىعى بار ما؟ الدە ەكەۋ بولىپ جۇرگەن سوڭ ءبارى وڭاي ما؟
قۇرالاي: – بىزگە ءبارى وڭاي. ءبىر-بىرىمىزدى ءبىر اۋىز ءسوزسىز-اق، ءبىر كوزقاراستان، ىممەن-اق تۇسىنە قويامىز. سەبەبى، ەكەۋمىز – ءبىر ادامبىز.
ميراس: – وسى رەتتە ەسىمە ءتۇسىپ وتىرعانى، باياعىدا قۇرالايدىڭ اياعى اۋىرلاپ دەمالىسقا شىعىپ كەتكەندە، مەنى ەشكىم ءان ايتۋعا تويعا دا شاقىرماي قالعانى بار. ويتكەنى حالىق ءبىزدى ءبىر ادام رەتىندە كورەدى، دۋەت رەتىندە ىزدەيدى.
قۇرالاي: – ءبىراق ءبىر مينۋسى بار: گاسترولدىك ساپارلارعا كەتكەنگە بالالارىمىز ۇيدە قالادى. ارينە، جالعىز قالمايدى. ءبىز انامىزبەن تۇرامىز عوي. شىنى كەرەك، بالالارىمىزدىڭ قالاي ءوسىپ قالعانىن دا بىلمەپپىز. مامامىزعا ۇلكەن راحمەت، ءبىزدى جوقتاتپاۋعا تىرىسادى. دەگەنمەن بالاعا اتا-انانىڭ ماحابباتى ءارقاشان كەرەك. ءبىز بالالارىمىزدىڭ بارىنشا مەيىرىم، قامقورلىققا بولەنىپ وسكەنىن قالايمىز. تۇڭعىشىمىز – ىڭكار الماتى مەنەدجمەنت ۋنيۆەرسيتەتىن ءبىتىرىپ، جۇمىسقا ورنالاستى. ال ەكىنشى قىزىمىز – كامشاتتى جاقىندا ۇزاتتىق. "نارحوزدىڭ" ستۋدەنتى. جاس قوي دەمەدىك، كوڭىل جاراستىرعان ادامىمەن اراسىنداعى ماحابباتتى قۇرمەتتەپ، باتامىزدى بەردىك. ارىستانبەگىمىز ون تورتتە، مۋزىكا مەكتەبىن ءبىتىردى. ال كىشى قىزىمىز ايسۇلۋ مۋزىكا مەكتەبىنە ءان ساباعىنا بارىپ ءجۇر. بارلىق اتا-اناعا وسىلاي ۇرپاعىمەن ماقتانىپ وتىرۋعا جازسىن دەپ تىلەيمىن.
ءتىلشى: – ءبىر-بىرىڭىزدى قيىن ساتتە قالاي قولدايسىزدار؟
ميراس: – جاڭا عانا قۇرالاي ايتىپ كەتكەندەي، بىزگە ءبارى جەڭىل. قيىندىق دەگەندى ەڭ العاش باس قوسقاندا كەشكەنىمىز بار. ءتورت جىلعا دەيىن بالا سۇيە المادىق. قۇرالايعا دارىگەرلەر "ەشقاشان بوپەلى بولا المايسىز" دەپ دياگنوز قويىپ تاستاعان كەز. "ميراس، مەنى جىبەر. سەمەيىمە قايتايىن. ساعان ەش وكپەم جوق. تاعى دا ۇيلەن، ۇرپاق ءسۇيۋىڭ كەرەك، ءۇبىرلى-شۇبىرلى بول، مەن ساعان تىلەكشىمىن" دەپ جىلادى ءبىر كۇنى. ول كەزدە اقتوبەدە تۇرامىز. سونداي ساتتە اكە-شەشەمنىڭ، اسىرەسە، انامنىڭ قولداۋى كەرەمەت بولدى. "ءبارى جاقسى بولادى. ۋايىمداماڭدار، وقۋلارىڭدى جالعاستىرىڭدار. استاناعا بارىڭدار، جەر اۋىستىرىڭدار" دەدى. ءسويتىپ ۇلكەن قالاعا قونىس اۋدارۋعا نيەتتەنىپ جۇرگەن كەزىمىزدە ديماشىمىزدىڭ اناسى – سۆەتا ايتبايەۆا راۋشانىن ومىرگە اكەلىپ، ادال دوسىمىز قانات پەن سۆەتانىڭ وتىنىشىمەن سول سابيگە كىندىك اكە-شەشە بولعانبىز. نيەت، تىلەك، ىقىلاس، پەيىل دەگەن قانداي! ءبىز ۇلكەن جولعا جينالىپ جاتقاندا سۆەتا قۇرالايعا راۋشانتايىمىزدىڭ يتكويلەگىن ىرىمداپ بەرگەن ەكەن. ءقازىر، اللاعا شۇكىر، ءتورت پەرزەنتىمىز بار. بىزگە سوندا كۇش بەرگەن – سەنىم، ءۇمىت جانە ماحاببات.
ءتىلشى: – "باقىتتى وتباسى" دەگەن ۇعىمدى قالاي تۇسىندىرەر ەدىڭىزدەر؟
قۇرالاي: – بۇل سۇراعىڭىزعا بىلاي جاۋاپ بەرسەم قالاي بولار ەكەن؟ مىسالى، ءبىزدى كوپ كورەرمەن، تىڭدارماندارىمىز "سىزدەردىڭ جولدارىڭىزدى بەرسىن، ەكى جاستى كىرگىزىپ، تويىمىزدى باستاپ بەرسەڭىزدەر، قىزىمىزدى ۇزاتىپ شىعارىپ سالساڭىزدار. بولاشاقتا ەكەۋىڭىز سياقتى قول ۇستاسىپ جارقىراپ جۇرسە، كوپ بالا سۇيسە دەيمىز" دەپ ىرىمداپ شاقىرىپ جاتادى. بىزگە ونەرىمىزدى سۇيەتىن تىڭدارماندارىمىزدىڭ "باقىتتى وتباسى" دەپ بەرگەن وسىنداي باعاسىنان اسىرىپ ەشتەڭە ايتا الماسپىز-اۋ.
ءتىلشى: – قازىرگى جاستارعا ەڭ الدىمەن قانداي قۇندىلىقتاردى دارىپتەۋ كەرەك دەپ ويلايسىزدار؟
ميراس: – ەڭ الدىمەن سابىرلى، ۇستامدى بولا ءبىلۋ كەرەك دەر ەدىم. بۇگىندە ەكىنىڭ ءبىرى اجىراسىپ كەتىپ جاتىر. سەبەبى، قازىرگى جاستاردىڭ كوبى سابىرسىز. ەكى تاراپتىڭ ءۋاجىن تىڭداي قالساڭىز، "سەن مەنىڭ شالبارىمدى دۇرىس ۇتىكتەمەدىڭ"، "ماماما بىرەڭە دەپ قالدىڭ" سەكىلدى بولماشى ۇساق-تۇيەكتى تەرىپ الادى دا، اقىر سوڭىندا بىر-بىرىنە يىلگىسە كەلمەي، ەكى جاققا كەتىپ تىنادى. الگىندە عانا ايتتىم عوي، قۇرالايعا "ءسابي سۇيە المايسىڭ" دەپ مەديسينانىڭ ءوزى ۇكىم شىعارعاندا، ەكەۋمىزدىڭ ۇلكەندەرگە كورسەتپەي كورپە استىندا تالاي تۇنشىعىپ جىلاعان تۇندەرىمىز بولعان. ال مەن ومىرلىك بولۋعا سەرتتەسىپ العان جارىمدى ەندى كەرەگىڭ جوق دەپ قالاي اپارىپ تاستايمىن؟! ازاماتتىعىم، ادامگەرشىلىگىم قايدا؟! سونداي قيىن ساتتە ءبىزدى العا جەتەلەي بىلگەن سابىر دەگەن ۇلكەن دوسىمىز بولاتىن.
ءتىلشى: – سىزدەردە بوي دا، كەلبەت تە بار. كينوعا تۇسۋگە شاقىرسا، بارار ما ەدىڭىز جانە كىمدى سومداعىڭىز كەلەدى؟
ميراس: – بىزگە كىشىگىرىم ەپيزودتىق رولدەر ۇسىنىلعان ساتتەر بولدى. ءبىراق مەن ويلايمىن، "شىمشىق سويسا دا قاساپشى سويسىن" دەمەكشى، ءار ادام ءوزىنىڭ ماماندىعىنىڭ شىڭىنا جەتسە دە جامان ەمەس. قۇرالاي ەكەۋمىزدە دە كاسىبي مۋزىكالىق ءبىلىم بار، ءدارىس تە وقىدىق. ايتپاقشى، بىزدەگى جاقسى جاڭالىق – استانادان دا "ميراس – قۇرالاي" ونەر مەكتەبىن اشىپ جاتىرمىز. ءبىلىمدى مۇعالىمدەر جينادىق. ءوزىمىز دە جۇرەگى ونەر دەپ سوققان بالالارمەن ەتەنە ارالاسىپ، شەبەرلىك ساباقتارىن جۇرگىزىپ وتىرماقپىز. بىلگەنىڭدى ۇيرەتۋ، ءبولىسۋ – ول دا ادامدىق پارىز.
ءتىلشى: – ەگەر ءانشى بولماساڭىز، باسقا كىم بولۋىڭىز مۇمكىن ەدى؟
قۇرالاي: – مەن ءوزىمدى باسقا ماماندىقتا مۇلدەم ەلەستەتە المايمىن. قانداي توسىن جاعداي بولماسىن، ءانشى بولار ەدىم. ال ميراس بالكىم ينجەنەر-مەحانيك بولار ما ەدى. سەبەبى، تەمىر-تەرسەككە، تەحنيكاعا جاقىن.
ءتىلشى: – وز-وزىڭىزگە سىيماي اسىپ-توگىلىپ قۋانعان ءساتىڭىز قايسى؟
ميراس: – استانادامىز. اسپيرانتۋرادا وقىپ جۇرگەن كەزىمىز. ءبىر كۇنى قۇرالاي "اياعىم اۋىر" دەگەندە، جۇرەگىم كەۋدەمە سىيماي اتقاقتاپ، ۇيگە تەلەفون سوعۋ ءۇشىن تەلەگرافقا قاراي جۇگىرگەن ءساتىمدى ءالى كۇنگە ۇمىتپايمىن.
ءتىلشى: – ميراس پەن قۇرالاي ۇيدە قانداي: قاتال، تالاپشىل، الدە جۇمساق؟ نە نارسەگە (الدە كىمگە) "جوق" دەي المايسىزدار؟
ميراس: – نەگىزى ەكەۋمىز دە جۇمساقپىز. باۋىرمالمىز. قاراپايىمبىز. سول قاسيەتىمىزدىڭ ارقاسىندا اينالامىزعا جاقسى دوس جيا بىلدىك.
الگىندە ايتقانىمىزداي، ءبىز مامامىزدىڭ قولىندا تۇرامىز. سول كىسىگە "جوق، بولمايدى" دەي المايمىز. انامىز "اق" دەسە – اق، "قارا" دەسە – قارا. نە ايتسا دا ءبىز ءۇشىن زاڭ. اكەمىز ومىردەن وزىپ كەتتى. ءبىز الماتىعا كوشىپ كەلگەننەن كەيىن ءۇش جىلدان سوڭ اتى جامان دەرتتەن كوز جۇمدى. تاعى ءبىر ەستەلىكتىڭ ويعا ورالىپ وتىرعانى. ءبىز اقتوبەدەن ەڭ العاش الماتىعا قونىس اۋدارىپ كەلگەندە، پاتەر جالداپ تۇرعانبىز. ودان ءان جازىپ، كليپ جازىپ، لەزدە تانىمال بولا باستادىق. ماتەريالدىق جاعدايىمىز دا كوتەرىلدى. ءبىراق كوڭىلىم ەل جاققا ەلەڭدەي بەردى. اكە-شەشەمنىڭ، باۋىرلارىمنىڭ جانىندا جۇرەتىن بۇرىنعى كۇندەردى ساعىنا بەرەتىندى شىعاردىم. بىردە ۇيگە تەلەفون شالدىم. "پاپا، ماما، ەگەر سىزدەر كوشىپ كەلمەيتىن بولساڭىزدار، ءبىز وندا اقتوبەگە قايتامىز. بىزگە تانىمالدىلىق تا، جۇلدىز بولۋ دا قاجەت ەمەس، بىزگە سىزدەر كەرەكسىزدەر!" دەپ. سودان اتا-انام ءبىزدىڭ كارەرامىزدى ويلادى ما ەكەن، اقتوبەدەگى ءۇيدى ساتىپ، الماتىعا كوشىپ كەلدى. ساتىلعان ءۇيدىڭ اقشاسىنا وسى جاقتان ءۇي تۇرعىزدىق. ءبىر كىندىكتەن ءۇش ۇل ەدىك، ەكى باۋىرىم دا مەنىڭ ءسوزىمدى جەرگە تاستاماي كوشىپ كەلدى. ءقازىر ەكى ءىنىم دە وتباسىمەن قاسكەلەڭدە تۇرادى. بۇل ورايدا ءبىزدى باۋىرمالدىققا تاربيەلەگەن اكە-شەشەمە العىسىم شەكسىز.
سۇحباتتاسقان
نۇرجامال ءالىش.