ۇرلانعان كولىك قۇرالدارىن ساتۋمەن اينالىسقاندار ۇستالدى

تەرگەۋ بارىسىندا قاسكويلەردىڭ 10 كولىك قۇرالىن ۇرلانعاندارى بەلگىلى بولدى.

الماتىدا ۇرلانعان كولىك قۇرالدارىن بولشەكتەپ ساتۋمەن اينالىسقان توپ قۇرىقتالدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.

قالالىق كريمينالدى پوليسيا قىزمەتكەرلەرى اتالعان قىلمىسقا قاتىستى بۇرىن بۇزاقىلىق جاساعانى ءۇشىن سوتتالعان جامبىل وبلىسىنىڭ 26 جاستاعى تۇرعىنىن جانە وسىعان دەيىن ەكى رەت سوتتى بولعان 25 جاستاعى ەر ادامدى ۇستادى.

«ولاردى قۇرىقتاماس بۇرىن، ءبىزدىڭ باسقارما قىزمەتكەرلەرى كۇدىكتىلەردىڭ ءارقايسىسىنىڭ اتقاراتىن قىلمىستىق ارەكەتتەرىن ارنايى وپەراسيا بارىسىندا زەردەلەپ، ۇرلانعان كولىك قۇرالدارىن بولشەكتەپ ساتۋعا جاۋاپتى ادامدى دا انىقتادى. اتالعان قىلمىستىق توپ التى ادامنان قۇرالعان. ولاردىڭ ۇلكەندەرىنىڭ جاسى 47-دە بولسا، ەڭ جاس كۇدىكتى 25-تە بولىپ شىقتى. بۇلاردىڭ بارلىعى وڭاي جولمەن پايدا تابۋدى كوزدەگەن. دالىرەك ايتقاندا، ەكى كۇدىكتى وزدەرىن قالا بازارلارىنىڭ بىرىندە قوسالقى بولشەكتەر ساتۋمەن اينالىساتىن جەكە كاسىپكەر رەتىندە تانىستىرعان. الايدا ولاردىڭ ساۋدا نۇكتەلەرىندە تەك قانا ۇرلانعان كولىك قۇرالدارىنىڭ قوسالقى بولشەكتەرى عانا ساۋدالانعان»، – دەپ مالىمدەدى الماتى قالاسى ءپد-نىڭ كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

ولار كوبىنەسە ەسكى ۇلگىدەگى BMW، Lada، Nissan، Audi، Volkswagen كولىكتەرىن ۇرلاعان ەكەن.

«قازىرگى تاڭدا ءۇش اۆتوكولىك تولىعىمەن انىقتالسا، قالعان جەتى كولىكتىڭ قايدا جاسىرىلعانى انىقتالۋدا. كۇدىكتىلەردىڭ ايتۋى بويىنشا، ولار ول كولىكتەردى كورشىلەس وبلىستارعا اپارىپ ۇلگەرگەن. كۇدىكتىلەر قاماۋعا الىندى. تەرگەۋ امالدارى جالعاسۋدا»، – دەپ اتاپ ءوتتى ناۋاتوۆ.