«جىلاۋىق» ميزام ايىنىڭ (قىركۇيەك) العاشقى اپتاسىنىڭ بۇگىن سوڭعى كۇنى. ايدىڭ باسىندا جاڭبىر بولماعانىمەن، ەكىسىنەن باستاپ اراكىدىك نوسەرلەتىپ تۇر. كۇن ءالى ىستىق قالپىن ساقتاۋدا. دەگەنمەن، كۇن وتكەن سايىن سالقىندىق بەلەڭ الىپ كەلەدى.
بابالارىمىز كۇن مەن ايدىڭ قيمىل- ارەكەتىنە قاراپ سول جىل مەن سول ايدا جانە سول كۇنى بولاتىن اۋا رايىنداعى وزگەرىستەردى بولجاي بىلگەن. بۇل بولجامدار قازىرگە دەيىن تۇرمىس- تىرشىلىگىمىز بەن ءوندىرىس جاعدايى ءۇشىن پايدالانىلىپ كەلەدى.
بۇل ءۇشىن ءار ايدا بولاتىن ايدىڭ توعاۋىن باقىلاپ، ەسەپتەپ وتىرعان. اي توعاۋى، ناقتىلاپ ايتقاندا، ءار ايدىڭ ءار اپتاسىنا تۇسپا-تۇس كەلىپ وتىرعان. ايتالىق قاڭتاردىڭ 11-كۇنى، اقپاننىڭ 9-كۇنى، ناۋرىزدىڭ 7-كۇنى، كوكەكتىڭ 5-كۇنى، مامىردىڭ 3-كۇنى، ماۋسىمنىڭ 1-كۇنى، شىلدە دە ۇركەر جەرگە ءتۇسىپ، سودان كەيىن تامىزدىڭ 21-كۇنى، ميزامنىڭ 19-كۇنى، قازاننىڭ 17-كۇنى، قاراشانىڭ 15-كۇنى، جەلتوقساننىڭ 13-كۇنى بولادى.
ايدىڭ توعىسى كەزىندە ۇركەر مەن اي بىر-بىرىنەن الىس بولسا، «بۇل ەكەۋى بىر-بىرىنە قىرعيقاباق بولعان ەكەن، قىرسىعى مال مەن جانعا تيمەسە يگى ەدى» دەپ قاۋىپتەنگەن. ەگەر ۇركەر مەن اي جاقىن كەلسە، «بۇل ەكەۋى جاراسا قالعان ەكەن، مال مەن جاننىڭ جاعدايى جامان بولماس» دەپ جاقسىلىققا جورىعان. قازاق ەسەپشىلەرى توبەدەگى ايدىڭ قايسى اي ەكەنىنەن جاڭىلسا، توعىس ەسەبى ارقىلى ۇركەردى باقىلاپ، ۇركەر مەن ايدىڭ توعاۋىنا قاراپ سول ايدى ايىرىپ الاتىن بولعان.
وتكەن پايىمدارىمىزدىڭ بىرىندە ميزام كەلمەي كۇز باستالمايتىنىن، كۇن سۋىتپايتىنىن ايتقانبىز. سول امال، مىنە، گريگوريان كۇنتىزبەسى بويىنشا جاقىنداپ كەلەدى. امال كىركۇيەك ايىنىڭ ون-ون بەسىنەن باستالادى. كۇن بۇرىنعىدان دا ىسي تۇسەدى. مۇنداي مامىراجاي مەزگىلدى ميزام شۋاق دەپ اتايدى.
قولدانىستاعى كۇنتىزبە بويىنشا، بۇگىن قىركۇيەك- ءتىڭ – 7ء-سى. اي ەسەبىمەن – 21ء-ى. قازاقشا بولجامعا سۇيەنسەك، 7 كۇننەن كەيىن جاڭا اي تۋادى. ەندى بىرتە-بىرتە تاڭ سۋىپ، سوسىن ءتۇن سۋىتا باستايدى. اپتا ىشىندە كوكتى بۇلتتار تورلاپ، جاڭبىر جاۋۋى، كۇن سالقىنداۋى، ەكپىندى جەل ورىن الۋى مۇمكىن. ءبىراق بۇل ءالى كۇز كەلدى دەگەن بەلگى ەمەس. الدا ءالى ءوز كەزەگىمەن كەلەتىن «ميزام شۋاق»، «كەمپىر شۋاق» امالدارى بار...