قازىرگى مەگاپوليستەر ۋربانيزاسيا، كليماتتىڭ وزگەرۋى، كولىك جۇكتەمەسىنىڭ ارتۋى مەن اۋانىڭ لاستانۋى سەكىلدى كەشەندى سىن-قاتەرلەرگە تاپ بولىپ وتىر. مۇنداي ماسەلەلەردى شەشۋ اكادەميالىق ساراپتامانى، يننوۆاسيالىق تەحنولوگيالاردى جانە مەملەكەت، بيزنەس پەن قوعام اراسىنداعى ءتيىمدى ءوزارا ارەكەتتەستىكتى تالاپ ەتەدى. وسى سالاداعى نەگىزگى حالىقارالىق پلاتفورمالاردىڭ ءبىرى «Smart City Expo» دۇنيەجۇزىلىك كونگرەسىنىڭ بولىگى – Tomorrow City Shanghai، ول تاجىريبە الماسۋ جانە قالانى تۇراقتى دامىتۋداعى وزىق تاجىريبەنى ىلگەرىلەتۋ ءۇشىن كاتاليزاتور قىزمەتىن اتقارادى.
بۇل ءىس-شارا ازيا-تىنىق مۇحيتى ايماعىنىڭ جەتەكشى ساراپشىلارىن، مەملەكەتتىك ورگانداردىڭ وكىلدەرىن، بيزنەستىڭ جانە ۋنيۆەرسيتەتتەردىڭ كوشباسشىلارىن بىرىكتىردى، - دەپ حابارلايدى Aqshamnews.kz.
عىلىم جانە جوعارى ءبىلىم مينيسترلىگىنىڭ مالىمەتىنشە، قازاقستان اتىنان فورۋمعا Almaty Management University دەلەگاسياسى قاتىستى. ونىڭ قۇرامىندا عالامدىق ارىپتەستىك جونىندەگى پرورەكتور شولپان تازابەك، ۋربانيستيكا ينستيتۋتىنىڭ ديرەكتورى زارينا داۋلەتقان، ۋربانيستيكا ينستيتۋتى ديرەكتورىنىڭ ورىنباسارى اينۇر جۇبانوۆا بار.
باعدارلاما اياسىندا پانەلدىك پىكىرتالاستار، كورمەلەر، يننوۆاسيالىق شەشىمدەردىڭ تانىستىرىلىمدارى، سونداي-اق يندۋستريا وكىلدەرىمەن جابىق كەزدەسۋلەر ۇيىمداستىرىلدى. قاتىسۋشىلار شانحايدىڭ كاسىپكەرلىكتى قولداۋ ورتالىقتارىنان باستاپ ستارتاپ-حابتارىنا دەيىنگى ۋربانيستيكالىق جانە يندۋستريالىق دامۋ تاجىريبەلەرىمەن تانىستى.
ۋنيۆەرسيتەت «Green and Safe Streets» جوباسىن تانىستىردى. جوبا قالالىق جوسپارلاۋ جۇيەسىنە تاكتيكالىق شەشىمدەردى ەنگىزۋگە باعىتتالعان.
«الماتى مىسالىندا ءبىز شاعىن تاكتيكالىق شەشىمدەردىڭ قالالىق جوسپارلاۋ جۇيەسىنە جۇيەلىك تۇرعىدان ەلەۋلى ىقپال ەتە الاتىنىن كورسەتىپ وتىرمىز. AlmaU مەملەكەتتىك قۇرىلىمدارمەن جانە اكادەميالىق قاۋىمداستىقپەن ورنىقتى ارىپتەستىك ورناتىپ، بىرلەسكەن زەرتتەۋلەر مەن جوبالاردى جۇزەگە اسىرۋعا ۇمتىلادى»، – دەپ اتاپ ءوتتى زارينا داۋلەتقان.
ءىس-شاراعا قاتىسۋدىڭ ناتيجەسىندە AlmaU ۋربانيستيكا ينستيتۋتى حالىقارالىق دەڭگەيدە مويىندالدى. «Green and Safe Streets» جوباسى «اقىلدى قالا ينفراقۇرىلىمىنداعى ۇزدىك جوبا» نوميناسياسىندا جەڭىمپاز اتاندى. سونىمەن قاتار «ۋربانيستيكا جانە سيتي-مەنەدجمەنت» ءبىلىم بەرۋ باعدارلاماسىنىڭ تۇلەگى دىنمۇحاممەد ۋشپايەۆ دايىنداعان Aerial Traffic & Logistics Analysis System درونىنا جەكە ماراپات تابىستالدى.
ماراپاتتاردى شانحاي قالاسىنىڭ باس جوسپارلاۋشىسى، پروفەسسور جانە تۋنسزي ۋنيۆەرسيتەتىنىڭ بۇرىنعى ۆيسە-پرەزيدەنتى ۆۋ مىرزا تابىس ەتتى.
«2010 جىلدان كەيىن قوعامدا ايتارلىقتاي مەنتالدىق وزگەرىس بايقالدى: قالانى تەك قانا تۇرمىسقا ارنالعان كەڭىستىك رەتىندە قابىلداۋدان ونى ادامعا باعىتتالعان ورتا رەتىندە تۇسىنۋگە بەتبۇرىس جاسالدى. باستى نازار قالالىق ءومىر ساپاسى، الەۋمەتتىك ءوزارا ارەكەتتەستىك جانە تۇراقتى دامۋ تۇجىرىمدامالارىنا كوشتى. بۇل تۇرعىدا ۋربانيزم قالا تۇرعىندارىنىڭ كۇندەلىكتى ءومىرىن جاقسارتۋعا باعىتتالعان ءبىلىم مەن تاجىريبە جۇيەسى رەتىندە قاراستىرىلادى»، – دەپ اتاپ ءوتتى ۆۋ مىرزا.
AlmaU وكىلدەرى سونداي-اق emlyon جەتەكشى فرانسۋز بيزنەس مەكتەبىنىڭ ازيالىق فيليالىندا دا بولدى. كەزدەسۋ بارىسىندا شانحايداعى emlyon كامپۋسىمەن ىنتىماقتاستىقتىڭ پەرسپەكتيۆالىق فورماتتارى، سونىڭ ىشىندە جەرگىلىكتى ءبىلىم بەرۋ مودۋلدەرىن ۇيىمداستىرۋ جانە قىسقا مەرزىمدى اكادەميالىق ۇتقىرلىق باعدارلامالارىن جۇزەگە اسىرۋ تالقىلاندى.
بۇل جەتىستىكتەر عىلىمي زەرتتەۋلەردى، ءبىلىم بەرۋ ۇدەرىسىن جانە يننوۆاسيالىق تاجىريبەنى ىقپالداستىرۋدىڭ تيىمدىلىگىن دالەلدەيدى. سونىمەن قاتار AlmaU-دىڭ وزەكتى قالالىق سىن-قاتەرلەردى شەشۋگە ارنالعان ناقتى قۇرالداردى قالىپتاستىراتىن ۋنيۆەرسيتەت رەتىندەگى پوزيسياسىن نىعايتا تۇسەدى.