الماتى وبلىسىنداعى «جاعالاۋ» وقۋ-جاتتىعۋ پوليگونىندا ۇقش-نىڭ «مىزعىماس باۋىرلاستىق-2024» ۇجىمدىق بىتىمگەرلىك كۇشتەرىمەن كوماندالىق-شتابتىق وقۋ-جاتتىعۋعا دايىندىق جالعاسۋدا.
وقۋ-جاتتىعۋ جەتەكشىسى – قازاقستان رەسپۋبليكاسى قارۋلى كۇشتەرى دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەيەۆ، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
ۇقشۇ-عا مۇشە ەلدەردەن – بەلارۋس، قىرعىزستان، رەسەي جانە تاجىكستاننان اسكەري قۇرالىمدار 26-30 قىركۇيەك ارالىعىندا كەلەدى. ولاردى قايتا توپتاستىرۋ اسكەري-كولىكتىك اۆياسيا بورتىمەن جانە اۆتوموبيل كولىگىمەن جۇزەگە اسىرىلادى.
– وقۋ-جاتتىعۋ ۇجىمدىق قاۋىپسىزدىك جۇيەسىن نىعايتۋعا جانە ۇقشۇ جاۋاپكەرشىلىك ايماعىندا تۇراقتىلىقتى قامتاماسىز ەتۋگە باعىتتالعان. بىرلەسكەن مانيەۆرلەر دوستاس ەلدەردەن كەلگەن جاتتىعۋلارعا قاتىسۋشىلارعا ۇيلەسىمدىلىكتى، پراكتيكالىق داعدىنى ارتتىرۋعا جانە دالالىق ماشىقتى نىعايتۋعا مۇمكىندىك بەرەدى. پراكتيكالىق ءىس-قيمىل بارىسىندا داعدارىس ايماعىن شيەلەنىستەن كەيىنگى رەتتەۋ جانە گۋمانيتارلىق كومەك كورسەتۋ جونىندەگى بىتىمگەرلىك وپەراسياسى پىسىقتالاتىن بولادى، – دەدى گەنەرال-مايور الماز جۇماكەيەۆ.
ۇقشۇ-عا مۇشە مەملەكەتتەردىڭ بىتىمگەرلىك كونتينگەنتتەرى – ارنايى دايىندالعان اسكەري، ميليسيالىق (پوليسەيلىك) جانە ازاماتتىق پەرسونال، سونداي-اق ولاردان بولىنەتىن كۇش-قۇرالدار. ءاربىر بىتىمگەرلىك وپەراسيادا ۇقشۇ ۇجىمدىق قاۋىپسىزدىك كەڭەسىنىڭ شەشىمىمەن ورىندالاتىن مىندەتتەردىڭ كولەمىنە جانە شيەلەنىس ايماعىنداعى ناقتى جاعدايعا قاراي ولاردىڭ قۇرامى، قۇرىلىمى مەن سانى ايقىندالادى.