ءبىز مەملەكەتتىڭ تۇتاستىعىن قورعاپ قالدىق
ق ر مەملەكەتتىك حاتشىسى ەرلان قارين ۇجىمدىق قاۋىپسىزدىك تۋرالى شارت ۇيىمىنىڭ بىتىمگەرلىك كونتينگەنتىنىڭ داعدارىس اياقتالعاننان كەيىن ەلدەرىنە قايتاتىنىنا سەنىم ءبىلدىردى، دەپ حابارلايدى Almaty-akshamy.kz.
بۇل تۋرالى ول «حابار 24» تەلەارناسىنا بەرگەن سۇحباتىندا ايتتى.
«قاتاڭ، شەشىمتال ارەكەتتەر قابىلداۋ كەرەك بولدى. پرەزيدەنت وسىنداي شەشىمدەر قابىلدادى دا. ۇجىمدىق قاۋىپسىزدىك تۋرالى شارت ۇيىمىنىڭ بىتىمگەرلىك كونتينگەنتىن تارتۋ تۇراقسىزدىق ورناتۋ جوسپارىن بۇزىپ، بولدىرماي تاستادى. ويتكەنى بىتىمگەرلىك كونتينگەنتتى شاقىرۋدىڭ ارقاسىندا قۇقىق قورعاۋ ورگاندارى مەن ارميانىڭ كۇشتەرىن كونترتەرروريستىك وپەراسيانى جۇرگىزۋگە شوعىرلاندىردى.
ءبىراق وسى توڭىرەكتەگى ساۋالدارعا الدىن الا جاۋاپ بەرە وتىرىپ، بىردەن اتاپ وتكىم كەلەدى. بۇل تۋرالى بىرنەشە مارتە ايتىلدى دا. ءبىراق تاعى ءبىر رەت ەسكە سالىپ، قايتالاۋ كەرەك سياقتى. بىتىمگەرلىك كونتينگەنت تەك ستراتەگيالىق نىسانداردى كۇزەتۋ فۋنكسياسىن عانا ورىندايدى»، - دەدى مەملەكەتتىك حاتشى.
سونداي-اق، ەرلان قارين ەلدەگى وسى ءبىر داعدارىس اياقتالعاننان كەيىن سىرتتان كەلگەن اسكەريلەر ەلدەرىنە قايتاتىنىنا سەنىم ءبىلدىردى.
«بىتىمگەرلىك كونتينگەنت ەلدىڭ ەگەمەندىگىنە نۇقسان كەلتىرەدى دەگەن اڭگىمەلەردىڭ ءبارى ءسوز عانا. ەگەر مەملەكەتتىڭ تۇتاستىعى بۇزىلعان بولسا، قورعايتىن ەشتەڭەمىز دە قالمايتىن ەدى. سوندىقتان ۇقشۇ-نىڭ بىتىمگەرلىك كونتينگەنتىن شاقىرۋ، كەرىسىنشە، مەملەكەتتىڭ تۇتاستىعىن قورعاۋعا كومەكتەستى. پرەزيدەنتتىڭ وسى شەشىمدەرىنىڭ ارقاسىندا ءبىز ەلىمىزدى قورعاپ قالدىق دەپ ويلايمىن. وسىنى اشىق ايتۋىمىز كەرەك. ءبىز تەك قانا ءتارتىپتى قالپىنا كەلتىرگەن جوقپىز، مەملەكەتتىڭ تۇتاستىعىن قورعاپ قالدىق. ءبىز ءتارتىپتى قالىپقا كەلتىردىك دەگەن سياقتى سوزدەردى ايتقاندا، ەلدە بولعان جانە بولىپ جاتقان احۋالدىڭ سيپاتىن تولىق بەرە المايمىز. تاياقتىڭ ءبىر ۇشىندا تەك ءتارتىپتى قالىپقا كەلتىرۋ عانا ەمەس، مەملەكەتتى ساقتاپ قالۋ، قورعاپ قالۋ ماسەلەسى تۇردى. قاڭتاردىڭ وسىناۋ دراماعا تولى كۇندەرىندە ءبىز مەملەكەتتىلىگىمىزدى ساقتاپ قالا الدىق»، - دەدى ەرلان قارين.