11 اۆتوكولىك، ەليتالىق ساعاتتار مەن التىن كەسەكتەرى بار.
10 ناۋرىز كۇنى ۇلتتىق قاۋىپسىزدىك كوميتەتتىڭ باسپا ءسوز قىزمەتى وسى كوميتەتتىڭ بۇرىنعى جەتەكشىسى كارىم ءماسىموۆتىڭ ۇيىنەن تابىلعان زاتتاردى كورسەتتى، دەپ حابارلايدى Almaty-akshamy.kz.
«ۇلتتىق قاۋىپسىزدىك كوميتەتى مەملەكەتكە وپاسىزدىق جاساۋ، بيلىكتى كۇشپەن باسىپ الۋ جانە لاۋازىمدىق مىندەتتەرىن اسىرا پايدالانۋ كۇدىگى بويىنشا ءماسىموۆ پەن باسقا دا ادامدارعا قاتىستى قىلمىستىق ءىستى جالعاستىرۋدا. سونىمەن قاتار، تەرگەۋ بارىسىندا ءماسىموۆتىڭ ىس-ارەكەتىندە كوپتەگەن سىبايلاس جەمقورلىق بەلگىلەرى انىقتالدى»، - دەلىنگەن باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، وتاندىق بيزنەس قاۋىمداستىقتارى مەن شەتەلدىك سۋبەكت وكىلدەرىنەن جىلجىمايتىن مۇلىك، قىمبات سىيلىقتار، سونىڭ ىشىندە مادەني قۇندىلىقتار، ەلەۋلى مولشەردە اقشالاي قاراجات الۋ فاكتىلەرى قۇجاتتالدى.
اتاپ ايتقاندا، جابىق كەلىسىمشارتتاردىڭ ءبىرى بويىنشا شەتەلدىك مەملەكەت وكىلدەرىنەن ءماسىموۆتىڭ ۇقك ءتوراعاسى لاۋازىمىندا 2 ملن اقش دوللارى سوماسىندا پارا الۋ فاكتىسى بويىنشا تەرگەۋ جۇرگىزىلۋدە.
وسى قاراجاتتى گونكونگتان قازاقستان ۇلتتىق بانكىنە قايتارۋ قامتاماسىز ەتىلدى.
سونىمەن قاتار، ءماسىموۆتىڭ پرەمەر-مينيستر لاۋازىمىندا بولۋى كەزەڭىندە بيزنەس-قۇرىلىمنىڭ بىرىنەن استانادا قۇنى 2،5 ملرد تەڭگە ەليتالىق تۇرعىن ءۇي مەن جەر تەلىمىن الۋ فاكتىسى بويىنشا تەرگەۋ جۇرگىزىلۋدە.
2022 جىلعى قاڭتاردا ءماسىموۆتى ۇستاعاننان كەيىن وسى تۇرعىن ۇيدە 17،2 ملن اقش دوللارى مولشەرىندە قولما-قول اقشا، سونداي-اق كوپتەگەن قۇندى زاتتار – ەليتالىق ساعاتتار، التىن كەسەكتەرى، انتيكۆاريات جانە باسقالارى الىندى.
بۇدان باسقا، بيزنەس ساناتتاعى 11 قىمبات اۆتوماشينا الىندى.
مۇلىكتەرىنە – نۇر-سۇلتان قالاسىنداعى ەكى ەليتالىق پاتەر، الماتى قالاسىنداعى 2 پاتەر مەن دەربەس ساراي، سونداي-اق ششۋچە-بۋراباي شيپاجايى ايماعى كولىنىڭ جاعاسىنداعى اۋماعى 1 گا جەر تەلىمىنە تىيىم سالىندى.
ءماسىموۆتىڭ جاقىن بايلانىستارىنان 5،1 ملن اقش دوللارى الىنىپ، وعان تىيىم سالىندى.
«وسىمەن ءبىر مەزگىلدە ءماسىموۆ پەن ونىڭ اينالاسىنداعىلار شەتەل بانكتەرىنە زاڭسىز شىعارعان اسا ءىرى مولشەردەگى اقشالاي قاراجاتتى ىزدەستىرۋ، بۇعاتتاۋ جانە قازاقستانعا قايتارۋ بويىنشا جۇمىس ۇيىمداستىرىلدى.بارلىق كورسەتىلگەن فاكتىلەر بويىنشا قارقىندى جەدەل تەرگەۋ ءىس-شارالارى جۇرگىزىلۋدە»، - دەلىنگەن حابارلامادا.