كوميتەت ەسىرتكىنىڭ تارالۋىنا توسقاۋىل قويۋدى كۇشەيتتى.
ۇقك باسپا ءسوز قىزمەتىنىڭ مالىمدەۋىنشە، بيىلعى ءساۋىر مەن مامىر ايلارىندا ۇقك قىرعىز رەسپۋبليكاسى جانە وزبەكستان ەلدەرىنىڭ ارناۋلى قىزمەتى مەن قۇقىق قورعاۋ ورگاندارىمەن بىرلەسىپ، 30-دان اسا ەسىرتكىگە قارسى وپەراسيا جۇرگىزدى، دەپ حابارلايدى Almaty-akshamy.kz.
ەسىرتكى ترافيگىنىڭ 9 حالىقارالىق جانە 14 وڭىرلىك ارناسى جويىلدى. سينتەتيكالىق ەسىرتكى وندىرەتىن 8 ءىرى جاسىرىن زەرتحانانىڭ جۇمىسى توقتاتىلدى.
ارنايى وپەراسيالار بارىسىندا ەسىرتكى تاسىمالداعان 15 ادام ۇستالدى. زاڭسىز اينالىمنان بارلىعى 223 كەلى ەسىرتكى، ونىڭ ىشىندە 90 كەلى سينتەتيكالىق ەسىرتكى (270 مىڭ رەت قولدانىلاتىن مولشەر – رەد.)، 85،2 كەلى ماريحۋانا، 14 كەلى اپيىن، 4 كەلى گاشيش الىندى. بۇدان باسقا، 800 ەكستازي تابلەتكاسى، 500 ءتۇپ «گوللاند» ماريحۋاناسى جانە پسيحوتروپتىق زات دايىنداۋعا ارنالعان 4 توننا حيميالىق رەاگەنت جويىلدى.
2 اي ىشىندە الىنعان ەسىرتكىنىڭ «قارا نارىقتاعى» جالپى سوماسى 2،3 ملرد تەڭگەدەن اسادى.