ەلىمىزدىڭ بىرنەشە وڭىرىندە ارنايى وپەراسيا جۇرگىزىلدى.
2023 جىلعى 29 ناۋرىزدا ۇقك قازاقستان رەسپۋبليكاسى ىىم-مەن بىرلەسىپ، ەكى ۆەدومستۆونىڭ ارنايى ماقساتتاعى بولىمشەلەرىن تارتا وتىرىپ، ءىرى اۋقىمدا زاڭسىز قارۋ اينالىمىمەن اينالىسقان قىلمىستىق توپ ارەكەتىنىڭ جولىن كەستى، دەپ حابارلايدى Almaty-akshamy.kz
قىلمىستىق سحەمانىڭ قاتىسۋشىلارى وقسىز اتىلاتىن، جاراقاتتايتىن، بەلگى بەرەتىن جانە وزگە دە ولىمگە الىپ كەلمەيتىن قارۋدى كەيىننەن «قارا» نارىقتا وتكىزۋ ءۇشىن جاۋىنگەرلىككە قايتا جاساۋمەن اينالىسقان.
ارنايى وپەراسيا استانا، الماتى قالالارىندا جانە اقتوبە، الماتى، باتىس قازاقستان، قاراعاندى، سولتۇستىك قازاقستان جانە تۇركىستان وبلىستارىندا ءبىر مەزگىلدە جۇرگىزىلدى.
"ناتيجەسىندە قىلمىستىق سحەماعا قاتىسى بار دەگەن كۇدىكپەن 23 ادام ۇستالدى. 32 اۆتومات، 88 تاپانشا، 37 مىلتىق (بارلىعى 157 بىرلىك قارۋ)، 9 گراناتا جانە ءارتۇرلى كاليبرلى 27390 ءوق-دارى الىندى"، - دەلىنگەن ق ر ۇقك باسپا ءسوز قىزمەتى تاراتقان اقپاراتتا.
قارۋ مەن وق-دارىلەر جاساۋعا ارنالعان ارنايى جابدىقتارى مەن جيناقتارى بار 7 قولدان جاسالعان سەحتىڭ جاسىرىن ارەكەتى جويىلدى.
ۇستاۋ الدىندا ۇزاق جەتە تەكسەرۋ جۇرگىزىلىپ، ونىڭ بارىسىندا ءارتۇرلى كاليبرلى ۇرىس پاتروندارى مەن وق-دارىلەرگە كەلتىرىلىپ قولدان جاسالعان «كالاشنيكوۆ» اۆتوماتىن، ءۇش تاپانشانى جەدەل ساتىپ الۋ جۇزەگە اسىرىلدى.
"2023 جىلدىڭ اقپانىندا ۇقك اقتوبە وبلىسىندا ۇيىمداستىرۋشىلارى اتالعان ۇقت بايلانىسى بار قارۋدى قولدان جاساۋمەن اينالىسقان شەبەرحانانىڭ جۇمىسىن توقتاتقانىن ايتا كەتۋ كەرەك"، - دەدى ق ر ۇقك باسپا ءسوز قىزمەتى.
جەدەل جولمەن قىلمىستىق سحەمانىڭ بارلىق تىزبەگى اشىلدى.
قارۋدى وتكىزۋ تاسىلدەرى، سونىڭ ىشىندە «Darkshop» دەپ اتالاتىن ينتەرنەتتىڭ كولەڭكەلى سەگمەنتىندەگى ساۋدا الاڭدارى انىقتالدى.
توپ مۇشەلەرى قۇپيالىلىق پەن قاۋىپسىزدىكتىڭ قاتاڭ شارالارىن ساقتاعان، ءارقايسىسىنىڭ ءرولى مۇقيات ءبولىنىپ بەرىلگەن (جاساۋشىلار، ساتۋشىلار، دەلدالدار جانە ت.ب.).
سوتقا دەيىنگى تەرگەۋ جۇرگىزىلۋدە.
زاڭسىز قارۋ ساتۋ جانە ساتىپ الۋعا قاتىسى بار باسقا دا ادامداردى انىقتاۋ بويىنشا جۇمىس جالعاسۋدا.