ءۇندىستاندا تارالا باستاعان ءقاۋىپتى ۆيرۋستان كوز جۇمعاندار بار
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، بۇل ىندەتكە شالدىققانداردىڭ 40-تان 75 پايىزىنا دەيىن ءولىم قۇشۋ ءقاۋپى بار، دەپ حابارلايدى Almaty-akshamy.kz 24.kz-كە سىلتەمە جاساپ.
ءقازىر ەڭ قاتەرلى ايماق كەرالا شتاتى بولىپ تۇر. مۇندا 11 ناۋقاس انىقتالعان. بىرەر كۇن بۇرىن عانا اتالعان ايماقتا نيپاحتان 12 جاستاعى ەر بالا قايتىس بولدى. جاڭا ىندەتتىڭ تارالۋىنا بايلانىستى بىرنەشە شتاتتا قاۋىپسىزدىك شارالارى كۇشەيتىلدى. ەپيدەميولوگتار ەڭ ۇلكەن ءقاۋىپ بالالارعا ءتونۋى مۇمكىن دەپ دابىل قاعۋدا.
كەرالا شتاتىنداعى اۋرۋحانادا اتا-انالاردىڭ زارى مەن بالالاردىڭ جانايقايىنان قۇلاق تۇنادى. قاتەرلى ۆيرۋس كوجيكودە قالاسىن ۇرەي قۇشاعىندا ۇستاپ وتىر. دارىگەرلەردىڭ ايتۋىنشا، 11 ناۋقاستىڭ ءحالى مۇشكىل. الدىندا 38 ادام وقشاۋلانعان ەدى، بۇگىن ولاردىڭ سانى 3 ەسە ارتتى. بالالارىن جەتەكتەگەن جۇزدەگەن تۇرعىن ەمحانالاردىڭ تابالدىرىعىن توزدىرىپ ءجۇر. 12 جاستاعى بالانىڭ ءولىمى تۇرعىندارىن ۇرەيىن ۇشىرىپ وتىر.
«بالامنىڭ تەمپەراتۋراسى جوعارى بولىپ تۇر. باسى دا قاتتى اۋىرادى. كورشىم نيپاحتان كوز جۇمعان الگى بالانىڭ اۋرۋى دا وسىلاي باستالعان دەپ شوشىتىپ قويدى»، - دەدى كوجيكودە تۇرعىنى ساندەش پاديتا.
«اۋرۋحاناعا كەلگەن بارلىق ادامدى تەكسەرەمىز، اناليزدەرىن الامىز. بۇل ىندەتتى بىردەن انىقتاۋ قيىنداۋ. ناتيجەنى نيۋ-دەليگە، زەرتتەۋ ورتالىقتارىنا جىبەرەمىز. كەلگەندەردىڭ كوبى تۇماۋراتىپ، باسىنان كۇن ءوتىپ، باسقا اۋرۋعا شالدىققاندار. 3 ەر ادامنان كوروناۆيرۋس انىقتالدى. ولاردى وقشاۋلادىق»، - دەيدى كوجيكودە ورتالىق اۋرۋحاناسىنىڭ دارىگەر-ەپيدەميولوگى لاتا حەمگالا.
نيپاح ۆيرۋسى تاماق ارقىلى جانۋاردان جانە ادامنان ادامعا جۇعادى. ازىرگە ودان ەمدەيتىن ەشقانداي ءدارى جوق. بۇل ىندەت كەرالا شتاتىندا 2018-2019 جىلدارى تارالىپ، ءبىراز ادام اجال قۇشقان بولاتىن.
جەرگىلىكتى شەنەۋنىكتەردىڭ ايتۋىنا قاراعاندا، جاعداي ءۇندىستان پرەزيدەنتىنىڭ تىكەلەي نازارىندا. ۇكىمەت ىندەت تارالعان قالانى عانا ەمەس، تۇتاس شتاتتى، سونداي-اق ونىمەن شەكتەس 3 ايماقتى قاتاڭ باقىلاۋعا العان.