ءۇندىستان پرەزيدەنتتىگىنە ەكىنشى رەت ايەل ادام سايلاندى

ەلدىڭ 15ء-ىنشى پرەزيدەنتى

ءۇندىستاننىڭ 15ء-ىنشى پرەزيدەنتى بولىپ ۇلتتىق-دەموكراتيالىق اليانسىنان كانديدات، 64 جاستاعى دراۋپادي مۋرمۋ جاريالاندى، دەپ حابارلايدى Almaty-akshamy.kz قازاقپارات-قا سىلتەمە جاساپ.
تاسس اگەنتتىگىنىڭ تاراتقان مالىمەتى بويىشا د.مۋرمۋ ءۇندىستان پرەزيدەنتتىگىنە سايلانىپ وتىرعان ەكىنشى ايەل. ەلدى باسقارعان العاشقى ايەل پراتيبحا پاتيل (2007-2012 جىلدارى) بولدى. سونداي-اق د.مۋرمۋ «ازات ەلدە»، ياعني بريتاندىقتاردان تاۋەلسىز بولعاننان كەيىن دۇنيەگە كەلگەن ءۇندىستاننىڭ تۇڭعىش پرەزيدەنتى بولماق. ول 1958 جىلى دۇنيەگە كەلگەن. دجاركحاند شتاتىنىڭ ەكس-گۋبەرناتورى. د.مۋرمۋ ەل پرەزيدەنتى رەتىندە 25 شىلدەدە انت بەرەدى. مەملەكەتتىڭ ءىس باسىنداعى باسشىسى رام ناتح كوۆيندتىڭ وكىلەتتىك مەرزىمى 24 شىلدەدە اياقتالادى. پارلامەنت جۋرناليستەرگە ۇسىنعان سوڭعى مالىمەتكە سايكەس، سانالعان داۋىستاردىڭ جالپى سانى 3219 (جالپى قۇنى 838 839). ونىڭ ىشىندە دراۋپادي مۋرمۋ 2161 داۋىسقا يە بولدى (جالپى قۇنى 577 777). ال ونىڭ باسەكەلەسى – وپپوزيسيونەر ياشۆانت سينحا – 1 058 داۋىس جينادى (قۇنى 261 062). داۋىستاردى ەسەپتەۋ جۇيەسىنە سايكەس، ءاربىر سايلاۋشى داۋىسىنىڭ «قۇنى» ءارتۇرلى بولادى. ول شتات حالقىنىڭ سانىنا بايلانىستى.