قازاقستان قۇراماسى جارادى!
قازاقستان - سان-مارينو كەزدەسۋى 3-1 ەسەبىمەن اياقتالدى،دەپ حابارلايدى Almaty-akshamy.kz.
ەل قۇراماسىنىڭ ويىنىنا قولداۋ كورسەتۋگە مەملەكەت باسشىسى قاسىم-جومارت توقايەۆتىڭ ءوزى كەلدى.
مەملەكەت باسشىسىمەن بىرگە ۇلتتىق قۇراماعا قولداۋ ءبىلدىرۋ ءۇشىن داڭقتى سپورتشىلار، سپورت ارداگەرلەرى مەن مادەنيەت قايراتكەرلەرى دە كەلدى.
ولاردىڭ اراسىندا قازاقستاننىڭ حالىق ءارتىسى ديماش قۇدايبەرگەن، ميني-فۋتبولدان قازاقستان ۇلتتىق قۇراماسىنىڭ باس باپكەرى پاۋلۋ ريكاردۋ فيگەيرا سيلۆا (كاكا)، فۋتبول ارداگەرلەرى ميحايل گۋرمان مەن ۆاحيد ماسۋدوۆ، باپكەر دميتريي وگاي، وليمپيادا چەمپيوندارى ولگا رىپاكوۆا، دميتريي بالاندين جانە تاعى باسقالارى بار.
ەلوردانىڭ «استانا ارەنا» ستاديونىندا 2024 جىلعى ەۋروپا چەمپيوناتىنىڭ ىرىكتەۋ كەزەڭى اياسىندا قازاقستان مەن سان-مارينو قۇرامالارى كەزدەستى. كەزدەسۋدە العاشقى بوپ ەسەپتى قازاقستان قۇراماسى اشتى.كەزدەسۋدىڭ 19-مينۋتىندا كوپ كۇتتىرمەي قازاقستان قۇراماسىنىڭ جارتىلاي قورعاۋشىسى يسلام چەسنوكوۆ قارسىلاستار قاقپاسىنا دوپ دارىتقانىن حابارلاعان بولاتىنبىز. ءبىرىنشى تايم 1-0 ەسەبىمەن اياقتالدى.
ەكىنشى تايم باستالىسىمەن، قازاقستان قۇراماسىنىڭ جارتىلاي قورعاۋشىسى چەسنوكوۆ ويىننىڭ 50-مينۋتىندا ەكىنشى گولدىڭ اۆتورى اتاندى. ەسەپ: 2-0
دەگەنمەن، قارسىلاستار كومانداسى دا وسال ەمەستىكتەرىن تانىتتى. اراعا ون مينۋت سالىپ، كەزدەسۋدىڭ 60-مينۋتىندا قاقپا الدىنداعى قاربالاستى سان-مارينولىقتار ءساتتى پايدالانىپ كەتتى. ەسەپ: 2-1
ەكىنشى تايم تارتىستى ءارى ءقاۋىپتى ساتتەرگە تولى بولدى. ەل قۇراماسىنا ءۇشىنشى گولدى سىيلاعان ابات ايىمبەتوۆ بولدى. شابۋىلشىنىڭ پەنالتيدەن دالدەپ سوققان سوققىسى ونى ءۇشىنشى گولدىڭ اۆتورى ەتتى. ەسەپ 3-1. قازاقستان قۇراماسىنىڭ جىگىتتەرى وسىلايشا ايقىن باسىمدىقپەن قارسىلاستارىن جەڭىپ، ەل مەرەيىن اسىردى.
قازاقستان قۇراماسى بيىلعى قاراشادا تاريحتا تۇڭعىش رەت ءىرى تۋرنيرگە قاتىسۋ مۇمكىندىگى بار. ىرىكتەۋ كەزەڭىنىڭ اياقتالۋىنا ەندى ءبىر تۋر قالدى. ماگومەد ادييەۆتىڭ كومانداسى سلوۆەنيامەن بىرگە توپتان تىكەلەي شىعۋعا ۇمتىلۋدا.