باسپا ءسوز قىزمەتىنىڭ مالىمەتتەرىنە قاراعاندا، 5 ايعا سوزىلعان كونكۋرسقا قاتىسۋ ءۇشىن 400-دەن استام ءوتىنىم ءتۇستى. سىيلىق «استانا وپەرا» تەاترىنىڭ ۇلكەن ساحناسىندا «وسكار» فورماتىندا تابىستالدى.
UMAI سىيلىعىنىڭ سالتاناتتى ءراسىمىن مادەنيەت جانە سپورت ءمينيسترى داۋرەن ابايەۆ اشىپ، بايقاۋدىڭ بارلىق قاتىسۋشىسىن قۇتتىقتاپ، ونەر سالاسىنىڭ وكىلدەرىنە ۇلكەن شىعارماشىلىق جولدا جاڭا جەتىستىكتەر تىلەدى. جالپى، 19 لاۋرەات UMAI مۇسىنشەسى مەن اقشالاي سىيلىقتارعا يە بولدى.
«ەلىمىزدە تۇڭعىش تاعايىندالىپ وتىرعان UMAI ۇلتتىق سىيلىعىنىڭ جەڭىمپازدارىن، ونەر سالاسىنداعى جىل ۇزدىكتەرىن انىقتاۋعا ارنايى جينالىپ وتىرمىز. «ۇماي» ۇلتتىق سىيلىعى – ساحنا ارقىلى ساناعا توڭكەرىس جاسايتىن، جۇرەكتەردەن ىزگىلىك ىزدەيتىن ناعىز ونەر مايتالماندارىنا ارنالعان. وزدەرىڭىز بىلەسىزدەر، كەز كەلگەن ادام كۇندەلىكتى كۇيبەڭنەن ءوزىن تەك تەاتر، بي، سۋرەت، مۋزىكا، ادەبيەت ارقىلى عانا قۇتقارادى. سوندىقتان، بۇل پرەميانىڭ ماڭىزى ءبىز ويلاعاننان الدەقايدا تەرەڭدە دەپ سانايمىن. بارشا جەڭىمپازداردى شىن جۇرەكتەن قۇتتىقتايمىن!»، - دەدى داۋرەن ابايەۆ.
ايتا كەتەيىك، جەڭىمپازداردى كوميسسيا مۇشەلەرى انىقتادى. بارىنشا ءادىل تورەلىك جاساۋ ماقساتىندا قازىلار القاسىنىڭ ەسىمدەرى سوڭعى ساتكە دەيىن قۇپيا بولىپ قالدى.
سونىمەن، سىيلىقتىڭ لاۋرەاتتارى:
«تەاتر ونەرى» نوميناسياسى بويىنشا:
«وپەرا ونەرى» – ەرلەر پارتياسىنىڭ ۇزدىك ورىنداۋشىسى – «استانا وپەرا» جەتەكشى ءسوليسى مەدەت شوتابايەۆ (كاۆارادوسسي پارتياسى، «توسكا»، دج. پۋچچيني). ايەلدەر پارتياسىنىڭ ۇزدىك ورىنداۋشىسى – «استانا وپەرا» جەتەكشى ءسوليستى جۇپار عابدۋللينا (ايدا پارتياسى، «ايدا»، دج. ۆەردي)؛
«اكتەرلىك شەبەرلىك» – ۇزدىك ەر ادام ءرولى ءۇشىن سىيلىقتى عالىمبەك وسپانوۆ الدى (گەنري حيگگينستىڭ ءرولى، ب.شوۋدىڭ «مەنىڭ سۇيىكتى پەرىشتەم» پەساسى بويىنشا، رەجيسسەرى – ا.ورازبەكوۆ، مۇحتار اۋەزوۆ اتىنداعى قازاق ۇلتتىق اكادەميالىق دراما تەاترى). ۇزدىك ايەل ءرولى ءۇشىن سىيلىقتى ولگا كورجيەۆا الدى (مارينا سۆەتايەۆانىڭ ءرولى، «ARS Amandi. ماحاببات ونەرى». رەجيسسەرى - گ. ەفيموۆا، ن. ساس اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق ورىس تەاترى)؛
«ۇزدىك رەجيسسۋرا» – ۆ.شەكسپيردىڭ «كورول لير» قويىلىمى ءۇشىن فارحات مولداعالي. ع. مۇسىرەپوۆ اتىنداعى بالالار مەن جاسوسپىرىمدەرگە ارنالعان قازاق مەملەكەتتىك اكادەميالىق تەاترى؛
«سپەكتاكلدىڭ ۇزدىك كوركەمدىك بەزەندىرىلۋى» - سوفيا تاسماعامبەتوۆا، پاۆەل دراگۋنوۆ. ە. راحمادييەۆتىڭ «الپامىس» وپەراسى، «استانا وپەرا»مەملەكەتتىك وپەرا جانە بالەت تەاترى؛
«ۇزدىك مۋزىكالىق-درامالىق سپەكتاكل» - «بورتە» د. يسابەكوۆ. تۇركىستان مۋزىكالىق-دراما تەاترى.
بەس سىيلىق «حورەوگرافيا ونەرى» نوميناسياسىندا انىقتالدى:
«ۇزدىك بي ۇجىمى» - «اققۋ» بي ءانسامبلى. جەتەكشىسى-گۇلنارا مامبەتوۆا. «ەنە تاربيەسى» ءبيى. عازيزا جۇبانوۆا اتىنداعى اقتوبە وبلىستىق فيلارمونياسى؛
بالەتتەگى ۇزدىك ورىنداۋشى» – ۇزدىك سوليست-اينۇر ءابىلعازينا، «استانا بالەت» تەاترى. ۇزدىك سوليست-ازامات اسقاروۆ. اباي اتىنداعى قازاق ۇلتتىق اكادەميالىق وپەرا جانە بالەت تەاترى؛
«ۇزدىك حورەوگراف» - مۇقارام ابۋباحرييەۆا، «سۇلتان بەيبارىس» بالەتى. «استانا بالەت» تەاترى.
«ۇزدىك بالەت قويىلىمى» - «دالا قوڭىراۋى». 2 بولىمنەن تۇراتىن بالەت، كومپوزيتورلار-ق. شىلدەبايەۆ، ر.گايسين، ت. مومبەكوۆ، ك. پينو-كينتانا. كوركەمدىك جەتەكشىسى - التىناي اسىلمۇراتوۆا، «استانا وپەرا» مەملەكەتتىك وپەرا جانە بالەت تەاترى.
«مۋزىكالى-ورىنداۋشىلىق ونەر» نوميناسياسىنىڭ جەڭىمپازدارى ءۇش ماراپاتقا يە بولدى:
«ۇزدىك ءداستۇرلى ورىنداۋشى» (ءان ايتۋ) – دياس مۇراتحان، «الاتاۋ» ءداستۇرلى ونەر تەاترى (الماتى).
«ۇزدىك ءداستۇرلى ورىنداۋشى» (اسپاپشى) – جانعالي ءجۇزباي، قازاق ۇلتتىق ونەر ۋنيۆەرسيتەتى (استانا).
«ۇزدىك مۋزىكالىق انسامبل» – DUET CLASSIC ەرمەك قۇرمانايەۆ / انارا كامەلينوۆا. جامبىل اتىنداعى قازاق مەملەكەتتىك فيلارمونياسى (الماتى)، قازاق ۇلتتىق ونەر ۋنيۆەرسيتەتى (استانا).
«بەينەلەۋ جانە ساندىك-قولدانبالى ونەر» نوميناسياسىندا ءۇش سىيلىق تابىستالدى:
«ۇزدىك ساندىك-قولدانبالى ونەر تۋىندىسى» ءۇشىن – ساۋلە باپانوۆا. كيىزدەن جاسالعان كوللەكسيا. تەمىربەك جۇرگەنوۆ اتىنداعى قازاق ۇلتتىق ونەر اكادەمياسى؛
«سۋرەتشىنىڭ / گرافيكتىڭ ۇزدىك جۇمىسى» -سۋرەتشى ۆياچەسلاۆ ليۋ-كو «ۋمايدىڭ ورالۋى» (گرافيكا).
«زاماناۋي ونەردەگى ۇزدىك جوبا» ءۇشىن – ساكەن نارىنوۆ. «التىن جۇرەك» جوباسى. قازاقستان رەسپۋبليكاسى ساۋلەتشىلەر وداعى.
«ۇزدىك بالالار سپەكتاكلى ءۇشىن» ارنايى جۇلدەسىن جاريالاۋ ءۇشىن جەڭىمپازداردىڭ ەسىمى جازىلعان كونۆەرتتى سيمۆولدىق تۇردە بالالار جىلىندا بالالار ساحناعا الىپ شىقتى جانە اشتى. ايتا كەتەيىك، ق ر مادەنيەت جانە سپورت ءمينيسترى داۋرەن ابايەۆتىڭ قولىنان ۇلكەن ماراپاتقا قازاق ۇلتتىق حورەوگرافيا اكادەمياسى ريكاردو دريگونىڭ «راۋشان بۇرشىگى مەن كوبەلەكتىڭ رومانى» بالەتى ءۇشىن جانە ماڭعىستاۋ وبلىستىق قۋىرشاق تەاترى «ايجان اجەسىنىڭ ەرتەگىسى» (ايجان اجەسىنىڭ ەرتەگىلەرى)، «قايتا جاڭعىرعان ورنەك» (ويۋ-ورنەكتى جانداندىرعان)، «داستارحان» تريلوگيالارى ءۇشىن جەڭىپ الدى.
«بيىل ءبىز مادەنيەت جانە ونەر سالاسىنداعى كوپتەگەن جوبالاردى ىسكە اسىردىق. Umai-دان باسقا، Dala Dauysy شىعارماشىلىق بايقاۋى، «شەرتپە كۇي» ءداستۇرلى مۋزىكا فەستيۆالى، روزا باعلانوۆا اتىنداعى ۆوكاليستەر بايقاۋى، Astana Piano Passion جاس پيانيستەر بايقاۋى، «التىن دومبىرا» رەسپۋبليكالىق ايتىسى، «ەۋرازيا» كينوفەستيۆالى، «ايبوز» ادەبي سىيلىعى جانە باسقا دا جوبالار. ءبىز سوزبەن ايتقاندا ۇلتىمىزدىڭ ات ۇستىندەگى ايبىندى رۋحىن كوتەرگەن، قالامگەرلەرىمىزدىڭ، ونەر وكىلدەرىنىڭ شابىتتارىنا شامشىراق بولعان جۇيەلى جۇمىستار ءبىر جىل ىشىندە عانا اتقارىلدى.
مينيسترلىكتىڭ باسقا دا سالالارىنا، ياعني سپورت پەن تۋريزمگە قاتىستى قولعا الىنعان ءىس-شارالارى دا جەتەرلىك. ءوز كەزەگىندە، وسى ىرگەلى ىستەردى بىرلەسىپ اتقارعان بارلىق ارىپتەسكە ايرىقشا العىس بىلدىرگىم كەلەدى. كەلەسى جىلى مۇنداي جوبالار ودان دا كوپ بولادى»، - دەپ تۇيىندەدى داۋرەن ابايەۆ.
ايتا كەتەيىك، ۇلكەن شوۋ-باعدارلاماعا دەسىن تەاتر فويەسىنە سۋرەت جانە ەسكيزدەر كورمەسى قويىلدى، ال ونەر مايتالماندارى قىزىل كىلەم ۇستىنەن ءجۇرىپ ءوتتى.