بيۋدجەتتى قالىپتاستىرۋ جۇمىسى جالعاسادى
بۇگىن ۇلىتاۋ وبلىستىق ءماسليحاتىنىڭ V سەسسياسى ءوتىپ، وندا وبلىستىڭ 2022-2024 جىلدارعا ارنالعان بيۋدجەتى قابىلداندى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
ءماسليحات حاتشىسى باۋىرجان شىڭعىسوۆ ءتوراعالىق ەتكەن سەسسياعا وبلىس اكىمى بەرىك ءابدىعالي ۇلى، وبلىس اكىمىنىڭ ورىنباسارلارى، باسقارما باسشىلارى قاتىستى.
سەسسيا كۇن تارتىبىندە ۇلىتاۋ وبلىسىنىڭ 2022-2024 جىلدارعا ارنالعان بيۋدجەتىن بەكىتۋ، ق ر ۇكىمەتىنە ۇلىتاۋ وبلىسىنىڭ شەكارالارىن بەكىتۋ تۋرالى ۇسىنىس ەنگىزۋ جانە وبلىس اكىمىنىڭ حالىقپەن كەزدەسۋىنىڭ يكەمدى كۇنتىزبەسىن بەكىتۋ سىندى نەگىزگى ءۇش ماسەلە قارالدى.
العاشقى ماسەلە بويىنشا ۇلىتاۋ وبلىسى قارجى باسقارماسى باسشىسىنىڭ مىندەتىن اتقارۋشى ۆيكتوريا ستاۆيسكايا بايانداما جاسادى.
باسقارما باسشىسىنىڭ حابارلاعانىنداي، وبلىستىڭ بيۋدجەتى قاراعاندى وبلىسىنىڭ بيۋدجەتىنەن جانە اۋدان (قالا) بيۋدجەتتەرى ترانسفەرتتەرىنەن قالىپتاسىپ وتىر. قاراعاندى وبلىسىنىڭ 610 ملرد 161،3 ملن تەڭگەنى قۇرايتىن بيۋدجەتىن ءبولۋ كەزىندە ۇلىتاۋ وبلىسى بيۋدجەتى تۇسىمدەرىنىڭ ۇلەسى 17 پايىزدى نەمەسە 103 ملرد 586 ملن تەڭگەنى، شىعىستاردىڭ ۇلەسى 15،6 پايىزعا نەمەسە 95 ملرد 320،3 ملن تەڭگەنى قۇرادى. «قازاقمىس» كومپانيالار توبىنىڭ 9 كاسىپورنىنىڭ وبلىس اۋماعىنا قايتا تىركەلۋىنە بايلانىستى 8 ملرد 256،6 ملن تەڭگە پروفيسيت قالىپتاسقان.
«2022 جىلعا ارنالعان وبلىس بيۋدجەتىنىڭ كىرىس بولىگى قوسىمشا تۇسىمدەرمەن بىرگە 29 ملرد 847 ملن 942 مىڭ تەڭگەنى قۇرادى. اۋدان، قالالاردان تۇسەتىن ترانسفەرتتەر 13 ملرد 813 ملن 038 مىڭ تەڭگەنى قۇرادى. وسى جىلعى بيۋدجەتتىڭ بارلىق تۇسىمدەرى 43، 6 ملرد تەڭگەگە تەڭ»، – دەلىنگەن حابارلامادا.
وسى جىلعى وبلىس بيۋدجەتىنىڭ شىعىس بولىگى 30، 8 ملرد تەڭگە كولەمىندە جوسپارلانىپ وتىر.
«شىعىستاردىڭ نەگىزگى ۇلەسى الەۋمەتتىك سالاعا (ءبىلىم بەرۋ، دەنساۋلىق ساقتاۋ، الەۋمەتتىك قامتاماسىز ەتۋ) جۇمسالادى»، - دەدى قارجى باسقارماسىنىڭ باسشىسى.
ايماق باسشىسى بەرىك ءابدىعالي ۇلى بيۋدجەتتى قالىپتاستىرۋ جۇمىسى ءالى جالعاساتىنىن، ەدى رەسپۋبليكالىق بيۋدجەتتەن تۇسەتىن ترانسفەرتتەر مەن سۋبۆەنسيالاردى انىقتاۋ ماسەلەسى قارالاتىنىن ايتتى.