ۇلىستىڭ ۇلى كۇنىندە قۋانىشقا كەنەلگەن الاكولدىكتەر

90 ورىندىق كلۋبقا كورەرمەندەر زالى مەن جاس بۇلدىرشىندەرگە ارنالعان ۇيىرمە ساباقتارىن اشۋ جوسپارلانۋدا

ءاز ناۋرىز مەرەكەسى كۇنى الاكول اۋدانى ارحارلى اۋىلدىق وكرۋگىندە كۇردەلى جوندەۋدەن وتكەن مادەنيەت كلۋبى حالىق يگىلىگىنە بەرىلدى، دەپ حابارلايدى Almaty-akshamy.kz . 

جۇرتشىلىق اسىعا كۇتكەن ونەر ورداسىنىڭ سالتاناتتى اشىلۋىنا اۋدان اكىمى الماس ابدينوۆ ارنايى قاتىسىپ، اۋىل حالقىن قوس قۋانىشتارىمەن قۇتتىقتاپ، نىساننىڭ قۇرىلىس جۇمىستارىنا دەمەۋشىلىك كورسەتكەن اۋدان جاناشىرى، مەسەنات، «ZHERSU» ينۆەستيسيالىق – وندىرىستىك كورپوراسياسى باقىلاۋ كەڭەسىنىڭ ءتوراعاسى باۋىرجان كەنەسبەك ۇلى وسپانوۆقا العىسىن ءبىلدىردى. 

سونداي – اق، اۋىل ازاماتتارى اتىنان  قاڭقاسى قالاڭعان عيماراتتىڭ اباتتاندىرۋ جۇمىستارىنا كومەك كورسەتكەن جەكە كاسىپكەر اسقار سەبەپوۆكە اۋىلدىق ارداگەرلەر كەڭەسىنىڭ ءتوراعاسى ك.مامىربەكوۆ شاپان جاۋىپ، كۇمىس ءنۇسىپوۆاعا ريزاشىلىعىن جەتكىزدى.

ايتا كەتەرلىگى، ءبىر قاباتتى 90 ورىندىق كلۋبقا كورەرمەندەر زالى مەن جاس بۇلدىرشىندەرگە ارنالعان ۇيىرمە ساباقتارىن اشۋ جوسپارلانۋدا. قازىرگى تاڭدا مەكەمەگە 5 ادام تۇراقتى جۇمىسپەن قامتىلدى.