قازاقستاننىڭ جاڭا ساياسي مودەلگە ءوتۋ باعىتىنداعى رەفورمالارى ۇلىبريتانيا پارلامەنتشىلەرىمەن كەزدەسۋدە تالقىلاندى.
لوردتار پالاتاسىنىڭ وكىلدەرى ەلىمىزدىڭ سۋپەرپرەزيدەنتتىك باسقارۋ جۇيەسىنەن مىقتى پرەزيدەنتتىك-پارلامەنتتىك تۇرىنە ءوتۋ باستامالارى بويىنشا ويلارىن ورتاعا سالدى. ولار قازاقستاندا بولىپ جاتقان دەموكراتيزاسيالاۋ ۇدەرىستەرى ەكىجاقتى بايلانىستى جاڭا ساپالىق دەڭگەيگە كوتەرەتىنىن جەتكىزدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
جيىن قوس مەملەكەت اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولۋى قارساڭىندا ءوتتى.
«مەن سوڭعى جەتى جىل كولەمىندە قازاقستانعا بىرنەشە رەت بارىپ، دامۋ ۇدەرىستەرىنىڭ كۋاسى بولدىم. رەفورمالار ورناتۋعا ۇمتىلىسىن ءوز كوزىممەن كوردىم. ەڭ باستى ماسەلە - زاڭ ۇستەمدىگى. ءبىز قازاقستاننىڭ تابىستى بولعانىن كورگىمىز كەلەدى»، - دەدى ۇلىبريتانيا پارلامەنتىنىڭ مۇشەسى لورد فرەنسيس مود.
«مەن قازاقستان دوستارىنىڭ قاتارىنا ەندى قوسىلىپ جاتىرمىن. بۇگىن ەلدەرىڭىز تۋرالى جاڭا اقپاراتپەن تانىسۋعا زور مۇمكىندىك الدىم. ەكى مەملەكەت اراسىنداعى قارىم-قاتىناستى ودان ءارى نىعايتۋدا ءوز ۇلەسىمدى قوسۋعا نيەتتىمىن»، - دەيدى ۇلىبريتانيا پارلامەنتىنىڭ مۇشەسى سەر گرەم ستيۋارت برەدي.