سوڭعى ۋاقىتتا كوۆيدتەن 400-گە جۋىق كىسى ءولىمى تىركەلگەن
ۇلىبريتانيادا ىندەت قايتا ءورشىدى. بىرىككەن كورولدىكتىڭ قۇرامىنداعى انگليا جانە ۋەلس ەلدەرىندە سوڭعى ۋاقىتتا كوۆيدتەن قايتىس بولعاندار سانى ارتىپ وتىر. ەلگە كوروناۆيرۋستىڭ جاڭا تولقىنى كەلۋى مۇمكىن دەگەن ءقاۋىپ بار، دەپ حابارلايدى Almaty-akshamy.kz.
ۇلتتىق ستاتيستيكا باسقارماسىنىڭ سوڭعى دەرەكتەرىنە سايكەس، سوڭعى ۋاقىتتا كوۆيدتەن 400-گە جۋىق كىسى ءولىمى تىركەلگەن. ياعني الدىڭعى اپتالارمەن سالىستىرعاندا 40 پايىزعا كوپ. بۇل ينفەكسيالاردىڭ قازىرگى تولقىنى ءولىم-جىتىمنىڭ كوبەيۋىنە اكەلۋى مۇمكىن دەگەندى بىلدىرەدى دەيدى ماماندار.
دەرەكتەرگە جۇگىنسەك، ۇلىبريتانيا بويىنشا ۆيرۋس جۇقتىرعانداردىڭ سانى ءۇش ەسەگە ارتىپ، 1،7 ميلليون ادامعا جەتكەن، دەپ جازادى qazaqstan.tv.
دەنساۋلىق ساقتاۋ ماماندارى كوۆيدكە قىستاعى تۇماۋ اۋرۋى قوسىلىپ، اۋرۋحانالاردا ورىن بولماي قالۋى مۇمكىن دەپ دابىل قاعۋدا.
«كوۆيدكە بايلانىستى قاربالاسقا تولى جاز مەزگىلىنەن كەيىن گريپپ اۋرۋى ءورشيتىن ۋاقىت كەلە جاتىر. بۇعان دەنساۋلىق ساقتاۋ قىزمەتىندە مامانداردىڭ جەتىسپەۋشىلىگىن قوسىڭىز. سوندىقتان قيىن كەزەڭدەرگە دايىن بولۋىمىز كەرەك»، -دەيدى ۇلىبريتانيا ۇلتتىق دەنساۋلىق ساقتاۋ قىزمەتىنىڭ اتقارۋشى ديرەكتورى اماندا پريچارد.
اۋرۋحانالارعا سالماق تۇسپەۋ ءۇشىن شۇعىل ارەكەت ەتەتىن ارنايى توپتار جاساقتالىپ جاتىر. ولار جەدەل جاردەممەن جەتىپ، ۇيدە عانا كومەك كورسەتەدى. قارتتار ۇيلەرىندە دە مەديسينا قىزمەتكەرلەرى ءۇشىن مامانداندىرىلعان ارنايى ورتالىقتار ۇيىمداستىرىلماق. بۇل جوبالارعا ۇكىمەت 500 ملن ستەرلينگ فۋنتىن بولەدى. وعان قوسا ناۋقاستار قوسىمشا 100 مىڭ توسەك ورىنمەن قامتاماسىز ەتىلمەك. دارىگەردىڭ باقىلاۋىنداعى ناۋقاستارعا 2500 ۆيرتۋالدى پالاتالار اشىلادى.