ۆيرۋس ءالى جوعالىپ كەتپەدى
ۇلىبريتانيادا كوۆيدتىڭ جاڭا شتامى انىقتالدى. العاش ءۇندىستاندا شىعىپ، تۇماندى البيوندا تاراي باستاعان جاڭا شتامم — “اركتۋردىڭ” جۇقتىرۋ قاۋىپتىلىگى وتە جوعارى دەيدى ماماندار. بۇعان قوسا، ول انتيدەنەلەرگە وتە ءتوزىمدى بولىپ كەلەدى، دەپ حابارلايدى Almaty-akshamy.kz.
ءۇندىستاندا “اركتۋردى” جۇقتىرعانداردىڭ سانى 60 مىڭنان اسىپ وتىر. دەنساۋلىق ساقتاۋ سالاسىنا باسشىلىق ەتەتىن شەنەۋنىكتەر جاعدايدى ۋشىقتىرىپ الماۋ ءۇشىن، ەلدىڭ كەيبىر شتاتتارىندا ماسكا تاعۋدى مىندەتتەۋدە. ۆيرۋس العاش قاڭتار ايىندا انىقتالعانىمەن، الەم بويىنشا ەندى عانا كەڭىنەن تاراي باستادى. دۇنيەجۇزىلىك دەنساۋلىق ساقتاۋ ۇيىمىنداعىلار جاعدايدى ءجىتى قاداعالاپ وتىرعانىن ايتادى.
قازاقپاراتتىڭ جازۋىنشا، ۇلىبريتانيادا ازىرگە “اركتۋردى” جۇقتىرعاندار كوپ ەمەس. ءبىراق ۆيرۋسولوگتار تۇماندى البيوندا تۇراتىنداردىڭ باسىم كوپشىلىگى كوۆيدكە قارسى ۆاكسينا سالدىرعانىنا قاراماستان، جاعداي كۇردەلەنىپ كەتۋى مۇمكىن دەپ الاڭداۋشىلىق ءبىلدىرىپ وتىر. ويتكەنى جاڭا ۆيرۋستىڭ انتيدەنەلەرگە توزىمدىلىگى وتە جوعارى ەكەن.
«بريتانيالىقتار ساقتىق شارالارى تۋرالى ۇمىتقان سىڭايلى. بىزگە، شىنىمەن دە، اۋانى سۇزگىدەن وتكىزەتىن ءتيىستى ماسكالار تاعۋ كەرەك. بولمەلەردەگى اۋانىڭ ساپاسىن جاقسارتىپ، جەلدەتىپ وتىرۋ كەرەك»، - دەيدى ليدس ۋنيۆەرسيتەتىنىڭ پروفەسسور-ۆيرۋسولوگى ستيۆەن گريففين.
تىنىس الۋدىڭ قيىنداۋى جانە جوتەل سياقتى كوۆيدتىڭ نەگىزگى بەلگىلەرى “اركتۋرعا” دا تيەسىلى. ءبىراق وعان ەندى كەيبىر بالالار اراسىندا كونيۋنكتيۆيت پەن كوزدىڭ بىلشىقتانىپ، جابىسۋى سياقتى سيمپتومدار قوسىلىپ وتىر. كونيۋنكتيۆيت - كوزدىڭ قىزارۋىنا، قىشۋىنا جانە ىسىنۋىنە الىپ كەلەتىن ينفەكسيا. ول بۇرىن كوۆيد سيمپتومى رەتىندە قاراستىرىلاتىن، ءبىراق سيرەك كەزدەسەتىن.
«جاڭا نۇسقانىڭ پايدا بولۋى بىزگە ۆيرۋستىڭ ءالى ەشقايدا جوعالىپ كەتپەگەنىن جانە بيولوگياسى ءالى ءتىرى ەكەنىن انىق كورسەتەدى. “اركتۋر” اعزانىڭ يممۋنولوگيالىق قورعانىسىنىڭ كەيبىر بولىكتەرىن اينالىپ وتۋگە قابىلەتتى. جانە جاقىن ارادا بۇكىل الەمگە تارالۋى مۇمكىن»، - دەيدى ەكسەتەر ۋنيۆەرسيتەتىنىڭ جۇقپالى اۋرۋلار بويىنشا ءبولىمىنىڭ اعا وقىتۋشىسى بحارات پانكحانيا.
ۆيرۋس ازىرگە سينگاپۋر، اۆستراليا جانە اقش سياقتى 22 ەلدە انىقتالىپ وتىر. ۇلىبريتانيادا اركتۋردى جۇقتىرعانداردىڭ سانى 50-گە جۋىق. ناۋقاستاردىڭ اۋرۋى اسقىنعانى تۋرالى ازىرگە دەرەك جوق. جاڭا شتامدى تەرەڭىنەن زەرتتەۋ عالىمدارعا قيىن بولىپ وتىر. ويتكەنى ۇلتتىق ستاتيستيكا قىزمەتى كوروناۆيرۋس تۋرالى اقپارات جيناۋدى توقتاتقان. ياعني گەنومدىق قاداعالاۋ جۇرگىزىلمەي كەلەدى. ال دەرەكتەردىڭ جەتىمسىزدىگى عالىمداردىڭ قىراعىلىعىن جويادى دەيدى ماماندار.