بۇعان دەيىن بىرىككەن كورولدىككە ات باسىن تىرەگەن ءاربىر جولاۋشى قايدا توقتاعانى تۋرالى ەسەپ بەرىپ، ارنايى ساۋالناما تولتىرۋى كەرەك-تى. ال ەكپە سالدىرماعان نەمەسە ۆاكسينانىڭ تولىق كۋرسىن قابىلداماعان ساياحاتشى ەلگە كەلەردە جانە كەلگەننەن كەيىن كوۆيد-تەست تاپسىرىپ، كوروناۆيرۋس انىقتالعان جاعدايدا وقشاۋلانۋى ءتيىس بولاتىن. الداعى جۇمادان باستاپ، بۇل تالاپتاردىڭ بارلىعى كۇشىن جويادى.
لوندونداعى ەڭ ءىرى اۋەجايلاردىڭ ءبىرى حيتروۋ ءتىپتى عيمارات ىشىندە بەتپەردە تاعىپ ءجۇرۋدى مىندەتتەمەيدى. ۇكىمەتتەگىلەر مۇنداي جەتىستىكتى ۆاكسينالاۋ باعدارلاماسىنىڭ ءساتتى وتۋىمەن بايلانىستىرادى.
- ۆاكسينالاۋ دەڭگەيى وتە جوعارى ەكەنىن بىلەمىز. ءبىزدىڭ ەل بۇل تۇرعىدا كوش باستاپ تۇر. جالپى، الەمدە دە ەكپە سالدىرۋ بويىنشا ىلگەرىلەۋشىلىكتەر بار. شىنىن ايتقاندا، بۇگىندە ساياحاتتاۋ ءقاۋىپسىز بولا ءتۇستى. البەتتە، بۇل كوۆيدكە شالدىققاندار ەرەجەگە باعىنباي، قىدىرسىن دەگەن ءسوز ەمەس. ءبىراق كوپتەن بەرى جاقىندارىن كورمەگەن كوروناۆيرۋسى جوق ادامدار ءۇشىن بۇل جاقسى جاڭالىق بولايىن دەپ تۇر. قاعازباستىلىق پەن شەكتەۋلەر الىنىپ تاستالسا، ەل ارالاۋ جەڭىلدەي تۇسەدى، - دەدى ۇلىبريتانيا كولىك ءمينيسترى گرانت شاپپس.
رەسمي ستاتيستيكاعا سايكەس، ەلۋ ەكى ميلليونعا جۋىق بريتانيالىق ەكپەنىڭ ءبىرىنشى دوزاسىن، قىرىق توعىز ميلليون ادام ەكىنشى جانە وتىز سەگىز ميلليونى بۋستەرلىك ۆاكسينانى الىپ ۇلگەرگەن.