الماتى قالاسى ءماسليحاتىنىڭ كەزەكتەن تىس XVIII سەسسياسى ءوتتى، وندا دەپۋتاتتار الماتى قالاسى اكىمدىگىنىڭ ءار سوعىس ارداگەرىنە 1 ملن تەڭگە كولەمىندە تولەم ءبولۋ تۋرالى ۇسىنىسىن قولدادى، دەپ حابارلايدى اlmaty-akshamy.kz.
ەستەرىڭىزگە سالا كەتەيىك، بۇعان دەيىن بوستاندىق اۋدانىنىڭ تۇرعىندارىمەن كەزدەسۋدە مەگاپوليس اكىمى ەربولات دوسايەۆ ارداگەرلەردى ماتەريالدىق قولداۋ باستاماسىن ۇسىنعان بولاتىن.
جەڭىس كۇنى قۇرمەتىنە:
⮚ ۇلى وتان سوعىسىنىڭ 75 قاتىسۋشىسى مەن مۇگەدەكتەرى 1 ملن. تەڭگەدەن ءبىرجولعى تولەم الادى.
⮚ جەڭىلدىكتەر مەن كەپىلدىكتەر بويىنشا ۇوس قاتىسۋشىلارى مەن مۇگەدەكتەرىنە تەڭەستىرىلگەن ازاماتتار، ۇوس مايدانگەرلەرىنىڭ جەسىرلەرىنە، اۋعانستانداعى ۇرىس قيمىلدارىندا قازا تاپقان ازاماتتاردىڭ وتباسىلارىنا، باسقا مەملەكەتتەر اۋماعىنداعى ۇرىس قيمىلدارىنىڭ ارداگەرلەرى، ياعني 4544 ادام 100 مىڭ تەڭگەدەن تولەم الادى.
⮚ 10 مىڭنان استام ازاماتقا، ونىڭ ىشىندە ەڭبەك مايدانىنا قاتىسۋشىلارعا 50 مىڭ تەڭگەدەن تولەمدەر جوسپارلانعان.
سونداي-اق، قازاقستان رەسپۋبليكاسىنىڭ اۋماعىندا ساناتورلىق-كۋرورتتىق ەمدەلۋ ءۇشىن وتەمدەر قاراستىرىلعان مۇقتاج ازاماتتار ساناتتارىنىڭ تىزبەسى كەڭەيتىلدى. تولەمدەر مەرەكە كۇندەرىنە دەيىن جۇرگىزىلەدى.
بۇدان بولەك، دەپۋتاتتار الماتى قالاسىنىڭ كولىك ينفراقۇرىلىمىن دامىتۋ جوسپارىنىڭ جوباسىن قابىلدادى.
جوسپار شەڭبەرىندە «قالقامان» ستانسياسىنان «بارلىق» بازارىنا دەيىن مەتروپوليتەننىڭ 5.2 كم ۇزىندىعىمەن ءبىرىنشى جەلىسىنىڭ ءۇشىنشى كەزەگىن سالۋ، ساين كوشەسى مەن موڭكە بي (اقىن سارا) كوشەسىنىڭ قيىلىسىندا كولىك جولايرىعىن سالۋ كوزدەلگەن.
سونىمەن قاتار، قالانىڭ 8 شاعىن اۋدانىندا ۇزىندىعى 140،4 كم جول سالۋ جوسپارلانعان، ولاردىڭ قاتارىندا شاپاعات، بورالداي، تەرەكتى، راحات-مادەنيەت، شۇعىلا، اقجار، ماياك، مادەنيەت شاعىن اۋداندارى بار. ۇزىندىعى 39،7 كم بولاتىن 10 ماگيسترالدى كوشەنى تەسۋ (تەسىپ ۇزارتۋ) جۇزەگە اسىرىلادى.
جالپى جوسپارعا سايكەس، اكىمدىك تاراپىنان جاقسى جانە قاناعاتتانارلىق جاعدايداعى جولداردىڭ ۇلەسىن 2025 جىلعا دەيىن 86%-دان 95%-عا دەيىن ارتتىرۋ جوسپارلانۋدا.