ۇلى كۇيشىگە قۇرمەت كورسەتىلدى

الماتىدا ۇلى كۇيشى قۇرمانعازى ساعىرباي ۇلىنىڭ 200 جىلدىعىنا ارنالعان «سارىارقا» اتتى كونسەرت ءوتتى.

قۇرمانعازى وركەسترىنىڭ كونسەرت زالىندا ۇلتتىق ساز ونەرىنىڭ جارقىن بەينەسى قۇرمانعازى ساعىرباي ۇلىنىڭ 200 جىلدىعىنا ارنالعان «سارىارقا» اتتى كونسەرت ءوتتى. كەش قوناقتارى قازاقستاننىڭ ەڭبەك سىڭىرگەن قايراتكەرى ارداق يساتايەۆا، حالىقارالىق جانە رەسپۋبليكالىق كونكۋرستاردىڭ لاۋرەاتتارى ءبىرجان الييەۆ، ازامات شىناروۆ، اسەل الينا جەكە ونەر كورسەتتى.

ايتا كەتكەن ءجون، بيىل قۇرمانعازى ساعىرباي ۇلىنىڭ 200 جىلدىق مەرەيتويى اياسىندا رەسپۋبليكالىق دەڭگەيدە ق ر مادەنيەت جانە سپورت مينيسترلىگىنىڭ قولداۋىمەن ۇلتتىق وركەستر اۋقىمدى ءىس-شارالار مەن داۋلەسكەر كۇيشى اتىنداعى كىل مىقتىلاردى انىقتايتىن رەسپۋبليكالىق كونكۋرس ۇيىمداستىرادى.

بۇعان دەيىن مۇنداي مەرەيتوي 2018 جىلى يۋنەسكو كولەمىندە اتاپ وتىلگەن. الايدا، ۇلى كۇيشى قۇرمانعازى ساعىرباي ۇلىنىڭ دۇنيەگە كەلگەن جىلى تۋرالى سان ءتۇرلى بولجام مەن اقپارلار ايتىلۋدا. كەي دەرەككوزدەرى 1806 جىل دەسە، كەي جيناقتاردا 1818 جىل دەپ كورسەتىلگەن. الايدا، مۇحتار اۋەزوۆ اتىنداعى ونەر ۋنيۆەرسيتەتىنىڭ زەرتتەۋلەرىنە سايكەس، 1823 جىل دەپ بەكىتىلدى. كۇي اتاسى اتانعان قۇرمانعازى ساعىرباي ۇلى – كۇيلەرىندە ازاتتىقتى اڭساپ، بوستاندىقتى جىرلاپ وتكەن دارا تۇلعا. قازاق ۇلتىنىڭ باي مۇراسىن «اداي»، «بالبىراۋىن»، «سارىارقا» جانە تاعى باسقا مازمۇندى، اسەرلى، تەرەڭ ماعىنالى فيلوسوفيالىق كۇيلەرمەن تولىقتىردى.