بايقاۋعا 20-45 جاس ارالىعىنداعى اۆتورلار قاتىسا الادى.
«AMANAT» پارتياسى ءداستۇرلى «ۇلى دالا» رەسپۋبليكالىق شىعارماشىلىق بايقاۋىنىڭ باستالعانىن مالىمدەدى، دەپ حابارلايدى aqshamnews.kz
بيىل ادەبي كونكۋرس كورنەكتى جازۋشى، بالالار ادەبيەتىنىڭ كلاسسيگى بەردىبەك سوقپاقبايەۆتىڭ 100 جىلدىق مەرەيتويى اياسىندا وتەدى.
پارتيانىڭ «ۇلتتىق مۇرا» جوباسى اياسىندا جازۋشىلار وداعىمەن بىرلەسىپ وتكىزىپ كەلە جاتقان «ۇلى دالا» رەسپۋبليكالىق شىعارماشىلىق بايقاۋى وسىمەن بەسىنشى رەت ۇيىمداستىرىلۋدا.
شىعارماشىلىق دودانىڭ باستى ماقساتى – ۇلتتىق بولمىستى، رۋحاني قۇندىلىقتاردى پاش ەتەتىن، كرەاتيۆتى يدەيالارعا يە جاس قالامگەرلەرگە، وتاندىق اۆتورلارعا قولداۋ كورسەتۋ جانە شىعارمالارىن ناسيحاتتاۋ. سونىمەن قاتار بالالار ادەبيەتىنىڭ بايتەرەگى بەردىبەك سوقپاقبايەۆتىڭ شىعارمالارىنداعى تاعىلىمدى ويلار مەن ەسكىرمەس وبرازداردى وسكەلەڭ ۇرپاققا دارىپتەۋ.
بايقاۋعا ۇمىتكەرلەر:
«پروزا»،
«پوەزيا»،
«دراماتۋرگيا»،
«ادەبي سىن» جانە
«بالالارعا ارنالعان شىعارما» نوميناسيالارى بويىنشا قاتىسا الادى.
بۇدان بولەك، بايقاۋدا «بەردىبەك سوقپاقبايەۆتىڭ 100 جىلدىعى» جانە «الاش اماناتى» ارنايى جۇلدەلەرى دە قاراستىرىلعان. سونىمەن قاتار الاش قايراتكەرلەرى ءى.جانسۇگىروۆ، س.سەيفۋللين، ب.ءمايليننىڭ تۋعانىنا 130 جىل تولۋىنا وراي «ءۇش بايتەرەك» ارنايى جۇلدەسى تاعايىندالىپ وتىر.