بۇگىن كوميسسيا اسكەري مەكەمەدەگى ارنايى كولىكتەردىڭ جارامدىلىعىن تەكسەردى
قاڭتار وقيعاسىندا قاتتى زارداپ شەككەن ۇلتتىق ۇلاننىڭ 30-دان اسا تەحنيكاسى قايتا جاساقتالدى. بۇگىن كوميسسيا اسكەري مەكەمەدەگى ارنايى كولىكتەردىڭ جارامدىلىعىن تەكسەردى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ايتا كەتەيىك، جىل باسىنداعى دۇربەلەڭ كەزىندە ۇلتتىق ۇلاننىڭ ەكى كولىگى تولىق ورتەنىپ كەتكەن ەدى.
جىراقتا جۇرەتىن جاۋىنگەرلەر ءۇشىن راديوبايلانىس مۇلتىكسىز جۇمىس ىستەۋى ءتيىس. سوندىقتان بۇگىنگى تەكسەرىس جەلىنىڭ جاي-كۇيىن بايقاۋدان باستالدى. «وڭتۇستىك» وڭىرلىك قولباسشىلىعى باستاعان كوميسسيا توبى ۇلتتىق ۇلاننىڭ 5571 بولىمشەسىنىڭ اسكەري تەحنيكاسىن تۇگەل تەكسەرىپ شىقتى.
«جويۋعا بولاتىن ازداعان ەسكەرتپەلەر بولدى. راديوجەلىدە بايلانىس جەتكىلىكسىز ەكەنى انىقتالدى. ءبىراق ونى بىردەن جوندەپ، ەكيپاج كومانديرىنە تاپسىردىم»، – دەدى بايلانىس ءبولىمىنىڭ وفيسەرى رومان پەتروۆ.
تەكسەرىستى تەرەڭىرەك ءتۇسىنۋ ءۇشىن بۇل جۇمىسقا ءبىز دە ارالاسىپ كوردىك. بتر-دەن بولەك «ۋاز» ماركالى اۆتوكولىكتەر مەن ساربازداردى ارى-بەرى تاسۋ ءۇشىن ءجيى قولدانىلاتىن اسكەري كامازدار قارالدى.
«كاماز اۆتوكولىگىن تەكسەردىك. جاعدايى جاقسى. اسا ءبىر اقاۋ انىقتالعان جوق. ءبىراق تازالانباعان جەرلەرى بولادى ەندى. ونى جۇرگىزۋشىگە قوسىمشا ايتىپ وتىرامىز»، – دەدى ق ر ۇلتتىق ۇلانى «وڭتۇستىك» وڭىرلىك قولباسشىلىعى اسكەري پوليسيا ءبولىمىنىڭ وفيسەرى ەركەبۇلان شارىقبايەۆ.
ەسكە سالساق، كولىكتەردىڭ ءدال وسى ەكى ءتۇرى قاڭتار وقيعاسىندا تۇگى قالماي جانىپ كەتكەن ەدى. ىستەن شىققان ەكى ماشينامەن قاتار مىنا قاز-قاتار تىزىلگەن ارنايى كولىكتەردىڭ تەڭ جارتىسى، ياعني قىرىققا جۋىعى دۇربەلەڭگە جۇمىلدىرىلعان. بەيبەرەكەت كەزىندە ماشينالاردىڭ كوبىنە زاقىم كەلىپ، اينەكتەرى سىنعان بولاتىن.
«قالعان اۆتوكولىكتەر بۇگىن ساپتا، جوندەۋلى كۇيدە تۇر. ول تەحنيكانىڭ جاعدايى، قارۋ-جاراقتار تەكسەرىلىپ جاتقان ارنايى اۆتوكولىكتەر بار. سونىڭ بارلىعى جاقسى باعا الىپ جاتىر بۇگىن»، – دەدى ق ر ۇلتتىق ۇلانى «وڭتۇستىك» وڭىرلىك قولباسشىلىعى 5571 اسكەري ءبولىمى كومانديرىنىڭ تەحنيكا جانە قارۋ-جاراق جونىندەگى ورىنباسارى مەرەي قونىسبايەۆ.
سونداي كولىكتەردىڭ بىرىندە بولىپ، اياعىنان جاراقات العان مەرەي قونىسبايەۆ ەرلىگى ءۇشىن بيىل «ءىى دارەجەلى ايبىن» وردەنىمەن ماراپاتتالعان. ول جاۋىنگەرلەردىڭ تەحنيكالىق جاساقتالۋى ءتۇرلى اسكەري وپەراسيالار كەزىندە ۇلكەن ماڭىزعا يە بولادى دەيدى. جالپى الماتىداعى ۇلتتىق ۇلانعا 100-دەن اسا اسكەري تەحنيكا تيەسەلى. ارنايى اۆوكولىكتەر سوڭعى رەت 2019 جىلى جاڭارتىلىپتى. قىزمەتتەگى كولىكتەر 10 جىلدان كەيىن ەسەپتەن شىعارىلادى.