قازاقستان رەسپۋبليكاسىنىڭ ۇلتتىق ۇلانى وزدەرىنىڭ كاسىبي مەرەكەسىن اتاپ ءوتتى.
وسىدان 34 جىل بۇرىن قۇرىلعان اسكەري قۇرىلىم بۇگىندە ەلدىڭ قوعامدىق قاۋىپسىزدىگىن قامتاماسىز ەتۋدە، ستراتەگيالىق ماڭىزدى نىسانداردى قورعاۋدا جانە توتەنشە جاعدايلاردا ازاماتتاردىڭ قاۋىپسىزدىگىن ساقتاۋدا ماڭىزدى ءرول اتقارىپ كەلەدى.
اتاۋلى كۇنگە وراي «وڭتۇستىك» وڭىرلىك قولباسشىلىق باسقارماسىندا سالتاناتتى جيىن ءوتتى. ءىس-شارا بارىسىندا اسكەري بولىمدەردىڭ ۇلتتىق ۇلان قۇرامىنداعى ەلەۋلى كەزەڭدەرىن قامتىعان بەينەسيۋجەتتەر كورسەتىلىپ، جەكە قۇرامعا وتكەن جىلدارداعى جاۋىنگەرلىك جانە قىزمەتتىك جولى تانىستىرىلدى.
سالتاناتتى جيىندا «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەيەۆ جەكە قۇرامدى كاسىبي مەرەكەمەن قۇتتىقتاپ، اسكەري قىزمەتشىلەردىڭ ەل قاۋىپسىزدىگىن قامتاماسىز ەتۋدەگى ەرەن ەڭبەگىن ەرەكشە اتاپ ءوتتى. — ۇلتتىق ۇلان جاۋىنگەرلەرى — قوعامدىق ءتارتىپتىڭ ساقشىلارى، ەل تىنىشتىعىنىڭ تىرەگى. سىزدەردىڭ تاباندى ەڭبەكتەرىڭىز بەن جوعارى جاۋاپكەرشىلىكتەرىڭىز مەملەكەت قاۋىپسىزدىگىنىڭ بەرىك نەگىزى بولىپ تابىلادى، — دەدى قولباسشى.
سالتاناتتى جيىندا ءمىنسىز قىزمەتىمەن جانە جاۋىنگەرلىك دايىندىقتاعى جوعارى كورسەتكىشتەرىمەن ەرەكشەلەنگەن ءبىرقاتار اسكەري قىزمەتشىلەر قازاقستان رەسپۋبليكاسى ءىىم ورىنباسارى - ۇلتتىق ۇلان باس قولباسشىسىنىڭ جانە وڭىرلىك قولباسشىنىڭ بۇيرىقتارىنا سايكەس ارنايى توسبەلگىلەرمەن، العىس حاتتارمەن جانە گراموتالارمەن ماراپاتتالدى. ۇلتتىق ۇلان اسكەرىنە قوعامدىق ءتارتىپتى ساقتاۋ، مەملەكەتتىك ماڭىزى بار نىسانداردى كۇزەتۋ، سونداي-اق توتەنشە جاعدايلار مەن قارۋلى قاقتىعىستار كەزىندە ازاماتتاردىڭ قاۋىپسىزدىگىن قامتاماسىز ەتۋ سەكىلدى ماڭىزدى مىندەتتەر جۇكتەلگەن. وسى جاۋاپتى قىزمەتتى اتقارا وتىرىپ، ۇلتتىق ۇلان جاۋىنگەرلەرى كۇن سايىن وتان الدىنداعى بورىشىنا ادال ەكەنىن ىسىمەن دالەلدەپ كەلەدى.
ايتا كەتەيىك، ۇلتتىق ۇلاننىڭ قۇرىلعان كۇنىنە ارنالعان سالتاناتتى شارالار «وڭتۇستىك» وڭىرلىك قولباسشىلىققا قاراستى بارلىق اسكەري بولىمدەردە دە ۇيىمداستىرىلىپ، جەكە قۇرامعا رۋح بەرەتىن مازمۇندى ءىس-شارالار ءوتتى. ۇلتتىق ۇلان كۇنى — ەل قاۋىپسىزدىگى جولىندا قىزمەت ەتىپ جۇرگەن ءاربىر اسكەري قىزمەتشىنىڭ ەڭبەگىن باعالايتىن، ولاردىڭ وتانعا دەگەن ادالدىعىن ايشىقتايتىن ەرەكشە مەرەكە.