ءقازىر مينيماليزمگە بەت بۇرعان كۇللى الەم بىركەلكى تۇستەر مەن رەڭكتەرگە بەت بۇرعانداي كورىنەدى. كوشەدە اشىق ءتۇستى، قىزىلدى-جاسىلدى كيىنگەن ادامداردى سيرەك كەزدەستىرەمىز. ءبىر قاراعاندا زيانى جوق سەكىلدى وسى بىركەلكى تۇستەردىڭ ادام پسيحيكاسىنا ايتارلىقتاي اسەرى بار ەكەن. تۇستەر ماركەتينگتە قالاي قولدانىلادى؟ ەجەلگى داۋىردە انتيكالىق مۇسىندەر قانداي بولعان؟ وسى ساۋالداردىڭ جاۋابىن Aqshamnews.kz ءتىلشىسى زەرتتەپ كوردى.
"اپپاق بولمە" ازاپتاۋمەن تەڭ
سارعىش (بەجيەۆىي) ءتۇس بۇگىندە ءسان-سالتانات پەن ءمىنسىز ءستيلدىڭ سيمۆولىنا اينالدى. ءسان مەن ديزاين سالاسىندا ول بازالىق ءتۇس رەتىندە كەڭ قولدانىلادى. قازىرگى تاڭدا ادامداردىڭ كيىمى عانا ەمەس، ءۇي ينتەرەرى دە كوبىنە سولعىن، سارعىش، اقشىل رەڭكتەرگە جاقىن.
سۋرەت: Estima.ru
الايدا عالىمدار ءبىرتۇستى ءومىر سالتى پسيحيكالىق اۋىتقۋلارعا، ءتىپتى پسيحوزعا دەيىن اپارۋى مۇمكىن دەپ ەسكەرتەدى.
"اق بولمە" - تۇرمەلەردە قولدانىلاتىن ەڭ قاتال ازاپتاۋ تۇرلەرىنىڭ ءبىرى. العاشىندا ءبارى گۋمانيستىك كورىنەدى: تۇتقىندى تەك اق تۇستەن باسقا ەشتەڭە جوق بولمەگە قامايدى. ءبىراق ءدال وسى ورتا ادامنىڭ پسيحيكاسىن كۇيرەتەدى.
"مۇنداي بولمەدە ۇزاق ۋاقىت بولۋ اۋىر پسيحوەموسيالىق كۇيگە، وڭاشالانۋ سەزىمىنە، مازاسىزدىقتىڭ ارتۋىنا، دەپرەسسياعا، ەلەستەرگە، ءتىپتى پسيحوزعا اكەلۋى مۇمكىن"، – دەيدى پسيحولوگ، ارت-تەراپيەۆت ماريا بۋلگاكوۆا.
دەگەنمەن، اق ءتۇستى عانا قابىلدايتىن ادامدار دا بار. ولار ءۇشىن باسقا تۇستەر تىتىركەندىرگىش اسەر بەرەدى. بۇل قۇبىلىس حروموفوبيا دەپ اتالادى.
"حروموفوبيا - بۇل جاي عانا تۇستەن قورقۋ ەمەس، بەلگىلى ءبىر تۇسكە نەمەسە رەڭككە دەگەن جيىركەنىش، قابىلداماۋ جانە جاعىمسىز ەموسيالار"، – دەيدى بۋلگاكوۆا.
ماركەتينگتىك ايلالار: تۇستەر ادام ساناسىنا قالاي اسەر ەتەدى؟
قىزىل ءتۇستى زاتتار كوبىنە ويلانباي ساتىپ الىنادى. ماركەتولوگتاردىڭ پىكىرىنشە، دۇرىس تاڭدالعان ءتۇس كەز كەلگەن تاۋاردىڭ وتىمدىلىگىن ارتتىرا الادى. ستاتيستيكاعا سۇيەنسەك، ساتىپ الۋشىلاردىڭ 85%-ى الدىمەن تاۋاردىڭ تۇسىنە نازار اۋدارادى، ال ساپاسى مەن باسقا سيپاتتارى ەكىنشى ورىندا قالادى.
تاۋاردىڭ كەمشىلىگى بولسا دا، ءتۇسى ۇناسا - ساتىپ الۋ ىقتيمالدىعى جوعارى.
"قىزىل ءتۇس ادامدى ءيمپۋلسيۆتى شەشىم قابىلداۋعا يتەرمەلەيدى. كوك ءتۇس سەنىم ۇيالاتادى، ال جاسىل – ەكولوگيا، تابيعيلىق جانە ىشكى تىنىشتىقپەن بايلانىستى"، - دەيدى پسيحولوگ.
قانداي ءتۇس ءدامحاناعا تابىس اكەلەدى؟
كەلۋشىلەرى ۇزىلمەيتىن جايلى مەيرامحانا اشقىڭىز كەلە مە؟ وندا ينتەرەردەگى تۇستەردىڭ ماڭىزى زور. كەي تۇستەر تابەتتى اشسا، كەيبىرى كەرىسىنشە اسەر ەتەدى.
كولورادو شتاتى ۋنيۆەرسيتەتىنىڭ زەرتتەۋشىلەرى جىلى تۇستەرمەن، اسىرەسە قىزعىلت سارى رەڭكتەرمەن بەزەندىرىلگەن ورىنداردا قوناقتار ۇزاق وتىراتىنىن جانە كوبىرەك تاپسىرىس بەرەتىنىن انىقتاعان.
ەكسپەريمەنتكە قاتىسۋشىلار تۇستەردىڭ تاماقتان العان اسەرگە تىكەلەي ىقپال ەتەتىنىن ايتقان. كەي بولمەلەردە ءتاتتى ءدام ايقىن سەزىلسە، باسقا ورتادا ونداي اسەر بولماعان.
انتيكالىق مۇسىندەر باستاپقىدا اق بولماعان
بۇگىندە ءبىز اق ءمارماردان جاسالعان انتيكالىق مۇسىندەردى كلاسسيكالىق ونەردىڭ شىڭى دەپ قابىلدايمىز. الايدا ەكى مىڭ جىل بۇرىن ريم مەن گرەكياداعى مۇسىندەر مۇلدە باسقا كەيىپتە بولعان – ولار ءتۇرلى-تۇستى ەدى.
ادام دەنەلەرى تابيعي رەڭكتەرمەن بويالىپ، كيىمدەرى قانىق تۇستەرمەن بەزەندىرىلگەن. بۇل قازىرگى كورەرمەن ءۇشىن توسىن كورىنۋى مۇمكىن.
عالىمداردىڭ بۇل جاڭالىعى كوپشىلىكتى تاڭعالدىردى: انتيكالىق مۇسىندەر مالاحيت، لازۋريت، كينوۆار سىندى تابيعي بوياۋلارمەن ارلەنگەن.
ورتا عاسىرداعى گوتيكالىق ارحيتەكتۋرا دا ءبىر كەزدەرى اشىق ءارى جارقىن بولعان. ۋاقىت وتە كەلە بوياۋلار ءوشىپ، ءبىز ولاردى "اسقاق كلاسسيكا" رەتىندە قابىلداي باستادىق.
قازىرگى تاڭدا عالىمدار مەن رەستاۆراتورلار انتيكالىق ونەردىڭ باستاپقى بوياۋلارىن قايتا قالپىنا كەلتىرۋمەن اينالىسىپ ءجۇر. نەمىس ارحەولوگى ۆينسەنس برينكمانن بۇل سالادا 20 جىلدان استام ۋاقىت ەڭبەك ەتىپ كەلەدى.
"ءبىز ميكروسكوپ پەن ۋلتراكۇلگىن جارىقتىڭ كومەگىمەن بۇرىنعى تۇستەردى انىقتايمىز"، – دەيدى ول.
برينكمانن جاساعان انتيكالىق مۇسىندەردىڭ ءتۇرلى-تۇستى 3D ۇلگىلەرى الەمنىڭ كوپتەگەن قالاسىندا كورمەگە قويىلىپ ءجۇر. كورەرمەن پىكىرى سان الۋان بولعانىمەن، ەشكىمدى بەيجاي قالدىرمايتىنى انىق.
مينيماليزم تەپە-تەڭدىك بولعاندا عانا پايدالى
بىركەلكى تۇستەر مەن مينيماليزم - زاماناۋي ءومىر سالتىنىڭ اجىراماس بولىگىنە اينالدى. ارتىق دۇنيەدەن ارىلۋ، كوزگە تىنىشتىق سىيلايتىن ورتا قالىپتاستىرۋ راسىندا ادامدى شارشاتپايدى. الايدا بۇل ءۇردىس شەكتەن شىققاندا، كەرى اسەر بەرۋى مۇمكىن.
پسيحولوگتاردىڭ ايتۋىنشا، تۇستەردىڭ تاپشىلىعى ميعا تۇسەتىن سەنسورلىق اقپاراتتى ازايتىپ، ەموسيالىق جۇتاڭدىققا، كۇيزەلىسكە جانە مازاسىزدىققا اكەلەدى. اسىرەسە بالالار ءۇشىن ءتۇرلى-تۇستى ورتا - قيالدى، ويلاۋدى جانە ەموسيالىق دامۋدى قامتاماسىز ەتەتىن ماڭىزدى فاكتور.
مينيماليزم ءومىردى جەڭىلدەتۋى ءتيىس، ال ونى ءبىرسارىندى، "ءتۇسسىز" كەڭىستىككە اينالدىرۋ ادام تابيعاتىنا قايشى. عاسىرلار بويى تۇرلى-تۇسكە باي مادەنيەت قالىپتاستىرعان ادام بالاسى ءۇشىن تولىقتاي اق نەمەسە سارعىش الەم ءقاۋىپسىز دەپ ايتۋ قيىن.
سوندىقتان ساراپشىلار ءمينيماليزمدى تىيىم ەمەس، تەپە-تەڭدىك رەتىندە قابىلداۋعا كەڭەس بەرەدى. اق پەن بەجيەۆىي تىنىشتىق سىيلاسا، اشىق تۇستەر ومىرگە قۋات، ەموسيا جانە سەرپىن بەرەدى. ەڭ باستىسى، پسيحيكالىق ساۋلىقتى ءبىرىنشى ورىنعا قويۋ.