يسپانيانىڭ پونتيەۆەدرە قالاسىندا ءوتىپ جاتقان كۇرەس تۇرلەرىنەن 20 جاسقا دەيىنگىلەر اراسىنداعى الەم بىرىنشىلىگىندە كوك بايراعىمىزدى جەلبىرەتىپ، ءانۇرانىمىزدى اۋەلەتكەن «دينامو» سپورت قوعامىنىڭ سپورتشىلارى، ۇلتىق ۇلاننىڭ مەرزىمدى قىزمەتتەگى اسكەري قىزمەتشىلەرى قاتارداعى يسلام ەۆلويەۆ پەن ايبەك ايتبەكوۆ ەلگە ورالدى، دەپ حابارلايدى aqshamnews.kz.
بالۋانداردى تاڭعى ساعات 08.20-دا الماتى حالىقارالىق اۋەجايىنان «دينامو» سپورت قوعامى، ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ اسكەري قىزمەتشىلەرى جانە سپورت سۇيەر قاۋىممەن بىرگە جەرلەستەرى اسكەري وركەسترمەن كۇتىپ الدى.
بايراقتى باسەكەنى قازاقستان قۇراماسى 1 التىن 1 كۇمىس جانە 3 قولا مەدالمەن قورىتىندىلادى. قازاقستان كومانداسىنىڭ قۇرامىندا ۇلتتىق ۇلانىنىڭ اسكەري قىزمەتشىلەرى دە ونەر كورسەتتى.
تۋرنيردە 82 كەلىگە دەيىنگى سالماقتا سىنعا تۇسكەن ۇلاندىق جاۋىنگەر يسلام ەۆلويەۆ جاستار اراسىندا الەم چەمپيونى اتانىپ، بوز كىلەمدە قازاق ەلىنىڭ ابىرويىن اسقاقتاتتى. ال ايبەك ايتبەكوۆ 55 كەلى سالماقتا سىنعا ءتۇسىپ، ءۇشىنشى ورىندى يەلەندى.
- ۇلكەن قوشەمەتپەن قارسى الىپ جاتقان ەلىمە، «دينامو» سپورت قوعامى مەن ءوزىم بورىشىمدى وتەپ جۇرگەن ۇلتتىق ۇلان باسشىلىعىنا العىس ايتامىن! وتە كەرەمەت سەزىمدە تۇرمىن. سوزبەن ايتىپ جەتكىزۋ مۇمكىن ەمەس. بۇل جارىسقا جاقسى دايىندىقپەن باردىم. ماعان قولداۋ ءبىلدىرىپ، جانكۇيەر بولعان بارشا وتانداستارىما العىسىم شەكسىز، – دەيدى ۇلاندىق چەمپيون يسلام ەۆلويەۆ.
ايبەك ايتبەكوۆ.
بۇل ونىڭ الەم چەمپيوناتىنا ەكىنشى رەت قاتىسۋى. العاش رەت 2019 جىلى ۆەنگريانىڭ بۋداپەش قالاسىندا وتكەن چەمپيوناتقا قاتىسقان بولاتىن.
چەمپيون قازاقستان رەسپۋبليكاسىنىڭ ءىىم مەن ۇلتتىق ۇلان باس قولباسشىسىنا جانە «دينامو» سپورت قوعامىنىڭ باسشىلىعىنا وزىنە ۇنەمى قولداۋ كورسەتىپ، سپورتپەن اينالىسۋعا جاعداي جاساپ كەلە جاتقانىنا العىس ءبىلدىردى.
ايتا كەتەيىك، يسلام ەۆلويەۆ اسكەري بورىشىن پەتروپاۆلدا، ال ايبەك ايتبەكوۆ الماتىداعى باۋىرجان مومىش ۇلى اتىنداعى 5571 اسكەري بولىمىندە وتەۋدە.