«جوڭعار الاتاۋى» مەملەكەتتىك ۇلتتىق تابيعي پاركىنىڭ اۋماعىن 20 شاقتى قار بارىسى مەكەن ەتەدى
بۇل ءۇش جىل بويى فوتوتۇزاقتىڭ كومەگىمەن جۇرگىزىلگەن زەرتتەۋ ناتيجەسىندە بەلگىلى بولدى. بەينەجازبا ارقىلى ماماندار كوزگە سيرەك تۇسەتىن ءىلبىستىڭ تىرشىلىك ەتەتىن اۋماعىن انىقتادى، دەپ حابارلايدى Almaty-akshamy.kz 24.kz-كە سىلتەمە جاساپ.
پاركتىڭ عىلىمي قىزمەتكەرلەرى جازدا ورناتقان قۇرىلعىلارىن تاۋ ەتەگىنەن الىپ قايتتى. قار بارىسى ادام اياعى باسپايتىن تاۋلى ايماقتا تىرشىلىك ەتەدى. سوندىقتان وعان جەتۋ وڭاي ەمەس. پارك قىزمەتكەرلەرىمەن بىرگە بىرنەشە ساعات جول ءجۇرىپ، بيىك جارتاستار مەن قالىڭ قاراعايدى تاماشالاي وتىرىپ ءىلبىستىڭ العاش رەت بەينەكامەراعا تۇسكەن جەرىنە كەلدىك. تاۋ تاعىسىن زەرتتەپ جۇرگەن جاناربەك مولداحاننىڭ فوتوتۇزاعىنا بۇل جولى تەكە تاسپالانىپتى.
«تەكەلەر وسى جەردى تۇراقتى مەكەندەيدى. تەكەلەردىڭ مەكەندەۋى - بۇل بارىستاردىڭ ازىق قورى. تەكە بار جەردە بارىس بار. سوندىقتان دا بۇل جەردى زەرتتەۋ جۇمىستارى جالعاستىرىپ، ءبىر عانا بارىس دەپ ەسەپتەمەي، بىرنەشە بارىستى فوتوتۇزاققا ءتۇسىرۋ مۇمكىندىگىمىز بولادى دەپ ەسەپتەيمىن. پارك اۋماعىنا 30-عا جۋىق بەينەكامەرا ورناتىلعان. بەينەجازبا ارقىلى قار بارىسى جايلى مول ماعلۇمات جينالدى»، - دەيدى «جوڭعار الاتاۋى» مۇتپ اعا عىلىمي قىزمەتكەرى جاناربەك مولداحان.
بىرنەشە جىل بويى زەرتتەۋ جۇمىستارىن جۇرگىزگەن پارك قىزمەتكەرلەرى بارىستىڭ ءدال وسى ءبىز تۇرعان سارقان جانە اقشۇناق شاتقالدارىنىڭ تۇيىسكەن جەرىمەن جۇرەتىنىن دالەلدەگەن. نەگىزىنەن بارىس تەڭىز دەڭگەيىنەن 2500 مەتر بيىكتىكتەگى تاۋلى ايماقتى مەكەندەيدى ەكەن.
اسقار تاۋلاردى كەزىپ ءجۇرىپ قويىلعان بەينەكامەراداعى جازبالار مەن فوتولاردى قىزمەتكەرلەر مەكەمەگە كەلگەن سوڭ كومپيۋتەرگە كوشىرەدى. ماشاقاتى مەن اۋىرتپالىعى مول جۇمىس مۇنىمەن بىتپەيدى. ولار بارىستاردى تەڭبىلى ارقىلى سالىستىرىپ، سانىن ەسەپتەپ شىعارادى. مالىمەتتەر نەگىزىندە عىلىمي جۇمىس تا جازىلعان.
«يۋريي الەكساندروۆيچ گراچيەۆ دەگەن كىسىنىڭ زەرتتەۋلەرى بويىنشا، جوڭعار الاتاۋى، ءقازىر جەتىسۋ الاتاۋى دەيمىز، اۋماعىندا قىرىق-ەلۋ بارىس مەكەندەيدى دەپ شىققان. جوڭعار الاتاۋى پاركى جەتىسۋ الاتاۋىنىڭ ۇشتەن ءبىر بولىگىن عانا الىپ جاتىر. سوڭعى زەرتتەۋ بويىنشا، 15-20 بارىستى ناقتى پارك اۋماعىنان انىقتادىق. كوپ كەزدەسكەن اۋماقتارى تاستاۋ، ارقانكەرگەن، مىڭتەكە دەگەن جەردە تۇراقتى كەزدەسەدى»، - دەيدى «جوڭعار الاتاۋى» مۇتپ اعا عىلىمي قىزمەتكەرى جاناربەك مولداحان.
بارىس توپتاسپاي، جەكە جۇرەتىن، ەپتى، ايلاكەر، قايراتتى ءارى وتە قىراعى اڭ. سوندىقتان كوزگە كوپ تۇسە بەرمەيدى. ون جىلدان اسا قىزمەت ەتكەن مامانداردىڭ ءوزى ونى ءبىر رەت قانا كورىپتى. ىلبىسكە قاراعاندا ايۋدىڭ جۇرگەن جەرىن تابۋ الدەقايدا وڭاي، - دەيدى ولار. - حالقىمىز بارىستى كيەلى اڭداردىڭ قاتارىنا جاتقىزادى. ويتكەنى ونىڭ بولمىسى بولەك. ولەكسەنى جەمەي، ءوزى اۋلاعان جانۋاردىڭ عانا ەتىمەن قورەكتەنەدى. بۇدان باسقا دا قاسيەتتەرى جەتەرلىك.