ۇلتتىق سپورتتان قاي ءوڭىر مىقتى؟

ءبىر جىلدىڭ قورىتىندىسى بويىنشا 17 وبلىس پەن 3 قالانىڭ اراسىنان تۇركىستان وبلىسى ۇزدىك اتاندى. وڭتۇستىك سپورتشىلارى بيىلعى جارىستاردا جالپى سانى 58 التىن، 52 كۇمىس، 65 قولا جۇلدەمەن كوش باستادى. ونىڭ 13 التىنىن تۇركىستاندىقتار قازاق كۇرەسىنەن ەنشىلەپ، رەكوردتىق كورسەتكىشتى تىركەدى. ايماق وكىلدەرى ۇلتتىق سپورتتىڭ دامۋىن جۇيەلى جولعا قويعان.

«قازىرگى تاڭدا تۇركىستان وبلىسىندا 7 وبلىستىق، 23 اۋداندىق جانە 7 قالالىق سپورت مەكەمەلەرىندە ۇلتتىق سپورت تۇرلەرىنەن بولىمشەلەر جۇمىس ىستەيدى. سونىمەن قاتار وبلىستىق دەنە شىنىقتىرۋ جانە سپورت باسقارماسى سپورت مەكتەپتەرىندەگى رەگلامەنتتىڭ ساقتالۋىن قاداعالاپ، جاتتىقتىرۋشىلار مەن ادىسكەرلەرگە وقۋ-جاتتىعۋ ساباقتارىنا ءاردايىم ادىستەمەلىك كومەك كورسەتەدى. 2023 جىلى ۇلتتىق سپورت تۇرلەرىنەن جارىس ەرەجەلەرىنە وزگەرىستەر مەن تولىقتىرۋلار ەنگىزىلدى. اتاپ ايتقاندا اۋدارىسپاقتان بۇرىن 8 سالماق دارەجەسىندە جارىس وتسە، بيىلعى جىلى 9 سالماق دارەجەسىندە ءوتتى،  سونداي-اق، تەڭگە ءىلۋ جانە جامبى اتۋ سپورتىنان بۇرىن 3 ستيل بويىنشا 1 عانا سپورتشى قاتىساتىن، بيىلعى جىلى 3 ستيلگە 3 سپورتشى قاتىسا الاتىن مۇمكىندىك تۋدى. قاتىسۋشىلار سانى كوبەيدى. ناتيجەسىندە سپورتشىلارىمىز تاماشا ونەر كورسەتىپ، ەلىمىزدەگى ۇلتتىق سپورت تۇرلەرىنەن ەڭ ۇزدىك ءوڭىر ەكەنىن دالەلدەپ، جالپىكوماندالىق ەسەپتە 1-ورىندى يەلەندى»، دەپ پىكىر ءبىلدىردى تۇركىستان وبلىستىق دەنە شىنىقتىرۋ جانە سپورت باسقارماسىنىڭ وكىلدەرى.

ق ر ۇلتتىق جانە ات سپورتى تۇرلەرى ورتالىعىنىڭ باسپا ءسوز قىزمەتىنىڭ حابارى بويىنشا بيىلعى رەيتينگتە ەكىنشى ورىندى استانا قالاسى يەلەندى. ەلوردالىقتار بيىلعى جارىستاردان 24 التىن، 19 كۇمىس، 28 قولا جۇلدە ەنشىلەدى. اسىرەسە استانالىق ءداستۇرلى ساداق اتۋشىلار الدىنا جان سالمادى. ال ۇزدىك ۇشتىكتى شىمكەنت قالاسىنىڭ سپورتشىلار تۇيىندەدى. مەگاپوليس نامىسىن قورعاعان وعلاندار بيىل 24-التىن،19- كۇمىس، 20-قولا جەڭىپ العان. بۇل ايماقتا دا قازاق كۇرەسى جولعا قويىلعان. 24 التىننىڭ 11ء-ى قازاق كۇرەسىنىڭ بالۋاندارىنا تيەسىلى.

وكىنىشكە قاراي ۇلتتىق سپورتتى ءالى دە دامىتۋدى قاجەت ەتەتىن ايماقتار بار. اسىرەسە، قوستاناي، ۇلىتاۋ، شىعىس قازاقستان وبلىستارىنىڭ ناتيجەلەرى تومەن.

«سوڭعى جىلدارى ەلىمىزدە ۇلتتىق سپورت قارقىندى دامىپ كەلەدى. ونىڭ دالەلى بيىلدىڭ وزىندە ءبىزدىڭ سپورتشىلار حالىقارالىق ارەنالارداعى جارىستاردان 35 التىن ەنشىلەدى. ءقازىر ورتالىققا قارايتىن 11 سپورت ءتۇرى بار. ءارقايسىسىنىڭ دامۋى جۇيەلى جولعا قويىلعان. سونىمەن قاتار ولاردى زاماناۋي تالاپتارعا ساي قىلۋ ماقساتىندا سوڭعى ۇلگىدەگى تەحنولوگيالاردى دا قوسىپ جاتىرمىز. ءبىز جىل سايىن ۇلتتىق سپورتتاعى ۇزدىك وڭىرلەردى انىقتاپ وتىرامىز. وزدەرىڭىز بىلەتىندەي بۇل جاعىنان ەلىمىزدىڭ وڭتۇستىك ايماعى الدا تۇر. اسىرەسە تۇركىستان وبلىسى وزگەلەردەن كوش ىلگەرى. مۇنىڭ بارلىعى ايماقتاعى سپورتقا جاۋاپتى مامانداردىڭ، سپورت باسقارماسىنىڭ جۇيەلى جۇمىسىنىڭ ارقاسى. سونىمەن قاتار سوڭعى جىلدارى ەلوردامىز استانا قالاسى قارقىندى دامۋدىڭ جولىنا تۇسكەن. بۇل وڭىردە اسىق اتۋ، توعىزقۇمالاق، ءداستۇرلى ساداق اتۋ، قۇسبەگىلىك جانە قازاق كۇرەسىنىڭ وكىلدەرى الدا كەلەدى. دەگەنمەن ات سپورتىنا قاتىستى ماسەلەلەر بار. بۇل الداعى ۋاقىتتىڭ ەنشىسىندە شەشىلەتىن دۇنيە دەپ ەسەپتەيمىن. بۇيىرسا بارلىق ناتيجەنىڭ قورىتىندىسىن كەلەر جىلى وتەتىن دۇنيەجۇزىلىك كوشپەندىلەر ويىنىندا كورەمىز»، دەيدى ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ.

ۇلتتىق سپورتتىڭ بيىلعا جوسپارلانعان شارالارى تولىعىمەن اياقتالدى. ەندى الداعى جىلدىڭ باسىنان باستاپ ءار سپورت تۇرىنەن ىشكى بىرىنشىلىكتەر ۇيىمداستىرىلادى. سونىمەن قاتار ۇلتتىق قۇراما مۇشەلەرى حالىقارالىق جارىستارعا قاتىسىپ ەل نامىسىن قورعايدى. ەڭ ماڭىزدى دودادا – كەلەر جىلى ەلوردادا 5ء-شى دۇنيەجۇزىلىك كوشپەندىلەر ويىنى وتەدى.