بۇگىن مەملەكەت باسشىسى پارلامەنت دەپۋتاتتارىنىڭ باستاماسىمەن ازىرلەنگەن «قازاقستان رەسپۋبليكاسىنىڭ مەملەكەتتىك ناگرادالار تۋرالى زاڭىنا وزگەرىستەر ەنگىزۋ تۋرالى» زاڭعا قول قويدى. بۇل – ۇلتتىق قۇرىلتايدا كوتەرىلگەن باستامالاردى جۇزەگە اسىرۋ اياسىندا قابىلدانعان ءۇشىنشى زاڭ.
بۇدان بۇرىن ۆەيپتەرگە تىيىم سالۋ جانە ايەلدەر مەن بالالاردىڭ قۇقىقتارىن قورعاۋ ماسەلەسىنە قاتىستى زاڭعا قول قويىلدى.
ەنگىزىلگەن تۇزەتۋلەرگە سايكەس «ايبىن» وردەنىنىڭ دارەجەلەرىنە اتى اڭىزعا اينالعان باتىرلارىمىز – ساعادات نۇرماعامبەتوۆتىڭ، باۋىرجان مومىش ۇلىنىڭ جانە راقىمجان قوشقاربايەۆتىڭ ەسىمىن بەرۋ كوزدەلگەن.
مەملەكەتتىك ناگرادالاردى اتاقتى تۇلعالاردىڭ اتىمەن اتاۋ تاجىريبەسى كوپتەگەن ەلدە بار. مۇنداي قادام حالىق قاھارماندارىنىڭ ەسىمىن ۇلىقتاۋعا، جالپىۇلتتىق بىرلىكتى نىعايتۋعا جانە وتانشىلدىق سەزىمدى وياتۋعا زور ۇلەس قوسادى.
اتىراۋدا وتكەن ۇلتتىق قۇرىلتاي وتىرىسىندا مەملەكەت باسشىسى قاسىم-جومارت توقايەۆ «ايبىن» وردەنىنىڭ دارەجەلەرىنە ۇلت باتىرلارىنىڭ ەسىمىن بەرۋدى ۇسىندى. سونداي-اق پرەزيدەنت تالدىقورعانداعى اسكەري اۆيابازاعا كەڭەس وداعىنىڭ ەكى مارتە باتىرى سەرگەي لۋگانسكييدىڭ ەسىمىن بەرۋ تۋرالى ماسەلە كوتەردى. بۇل باستامالار كەلەسى جىلى 80 جىلدىعى اتاپ وتىلەتىن ورتاق جەڭىسكە ولشەۋسىز ۇلەس قوسقان سوعىس جانە ەڭبەك ارداگەرلەرىنە جاسالعان شەكسىز قۇرمەتتىڭ بەلگىسى.