قۇرىلتايدا قارالعان ماسەلەلەر تۋرالى
سوڭعى 2-3 كولەمىندە قۇرىلتاي ءسوزى كونە تاريحتىڭ كومبەسىنەن شىعىپ، بۇگىنگى ءومىرىمىزدىڭ جاڭا ءسوزى سەكىلدى اينالىمعا ەنە باستادى. وتكەن 2022 جىلى العاشقى ۇلتتىق قۇرىلتاي جازدىڭ العاشقى ايىنىڭ ورتاسىندا سيمۆولدى تۇردە ۇلىتاۋدا وتكەنى بارشامىزعا ءمالىم. تەك وسى بولعان وقيعانىڭ اتاۋى مەن وتكىزىلگەن جەرىنىڭ كيەلىلىگى حالقىمىزدىڭ ساناسىن ءبىر سىلكىندىرگەنىن سەزىندىك. سونىڭ جالعاسى رەتىندە بيىل، 2023 جىلى تاعى دا جازدىڭ باسىندا ەكىنشى ۇلتتىق قۇرىلتاي قاسيەتتى، ءارى كيەلى، ءارى تاريحي قالا – تۇركىستاندا ءوتتى. ونىڭ دا وزىندىك ءمانى بار.
تۇركىستان قالاسى - قازاق ەلى ءۇشىن دە، بۇكىل تۇرىك الەمى ءۇشىن دە رۋحاني ورتالىق بولىپ وتىرعان قالا. سوندىقتاندا بۇل قالادا نەگىزىنەن قازاق ۇلتى ءۇشىن باستى رۋحاني ماسەلەلەردىڭ كوتەرىلگەنى زاڭدىلىق بولىپ سانالادى. «ادىلەتتى قازاقستان جانە ادال ازامات» اتاۋىمەن وتكەن جيىندا مەملەكەت باسشىسى جەتى نەگىزگى ماسەلەنى ۇسىندى. ول ماسەلەلەردىڭ ءارقايسىسىن جەكە جەكە تالداپ، ولاردىڭ ماڭىزدىلىعىن ارنايى جيىندا كەڭ تۇردە كورسەتۋگە بولادى. ۇلتتىق قۇرىلتايدا مەملەكەت باسشىسى ايتقان ءبىرىنشى مىندەتتىڭ ءوزى اۋقىمدى. «مەملەكەتتىك نىشانداردى جەتىلدىرۋ» دەپ اتالاتىن العاشقى مىندەتتە «ەل بىرلىگى»، «سۇلتان بەيبارىس» وردەنى جانە تاعى باسقا ءىرى تاريحي تۇلعالاردى قۇرمەتتەۋگە ارنالعان مەملەكەتتىك ماراپاتتاردى ەنگىزۋدى ۇسىندى. تاريحي تۇلعالارىمىز كوپ – اۋ، ءبىراق ولار تەك بىرنەشە ءجۇزجىلدىق تويلاردا عانا اتاپ وتىلەدى، ال ەرلىكتەرى ءۇشىن، ادەبي، مۋزىكالىق شىعارماشىلىقتارى ءۇشىن، رۋحاني ەڭبەكتەرى ءۇشىن بۇرىنعى زاماندارداعى باتىرلارىمىزدىڭ، اقىن-جازۋشىلارىمىزدىڭ، بي-شەشەندەرىمىزدىڭ، ءدىني كوسەمدەرىمىزدىڭ اتىندا مەملەكەتتىك ماراپاتتار بولسا، ول تۇلعالاردى حالقىمەن ماڭگى بىرگە دەۋگە بولادى. تاعى ءبىر ماراپات – «ەل بىرلىگى». حالقىمىزدىڭ ۇيتقىسى بولا بىلگەن، ەل بىرلىگى مەن جەر تۇتاستىعى ءۇشىن جارعاق قۇلاعى جاستىققا تيمەي جۇرگەن قانشا تۇلعالارىمىز بار. سولارعا ارناپ «ەل بىرلىگى» ماراپاتىن تاعايىنداسا، ناعىز ادىلەتتىلىك بولار ەدى.
ءبىرىنشى مىندەتتى جۇزەگە اسىرۋ – ۇلتتىق قۇرىلتايدا ايتىلعان ەكىنشى مىندەتتى ورىنداۋدىڭ العاشقى قادامدارى بولىپ سانالادى. ۇلتتىق تاريحي سانا-سەزىمدى جاڭعىرتۋ – ۇلت تاريحىن جاڭا تالاپتارعا ساي ورىنداۋمەن، اكادەميالىق جاڭا باسىلىمداردى ورىنداۋمەن، تاريحتى جاڭا ومىرگە بەيىمدەپ كورسەتۋمەن بايلانىستى. ءوز كەزەگىندە بۇل مىندەتتى ورىنداۋ ءۇشىنشى جانە ءتورتىنشى مىندەتتەرگە الىپ كەلەدى. ۇرپاق تاربيەسى – ەشقاشان ەكىنشى قاتارعا تۇسپەيتىن، ماڭگىلىك مىندەت دەپ ءبىلۋ كەرەك. ۇلتتىڭ ەرتەڭى جاس ۇرپاق تاربيەسىمەن تىكەلەي بايلانىستى. ونى جۇزەگە اسىرۋدىڭ ءبىر كىلتى - مادەني مۇرالارىمىزدى دارىپتەۋ ارقىلى جۇرگەندە عانا ءتيىمدى بولماق.
جالپى قورىتا ايتقاندا، رۋحاني ورتالىق - تۇركىستان قالاسىندا وتكىزىلگەن ۇلتتىق قۇرىلتايدىڭ ەكىنشى وتىرىسى ۇلت ءۇشىن رۋحاني ماڭىزدى كوتەردى. ولاردى ورىنداعاندا ۇلتىمىزدىڭ رۋحاني بولمىسى قاتايا ءتۇسىپ، جاحاندانۋدىڭ بارلىق يىرىمدەرى مەن داۋىلدارىنا توتەپ بەرە الادى دەيمىز.