تۇركىستاندا ءوتىپ جاتقان ۇلتتىق قۇرىلتايدا پرەزيدەنت قاسىم-جومارت توقايەۆ وسىلاي ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇلتتىق قۇرىلتاي – حالقىمىزدى ورتاق ماقساتقا ۇيىستىراتىن بىرەگەي قۇرىلىم. مەن بىلتىر ناۋرىزداعى جولداۋىمدا وسى قۇرىلتايدى شاقىرۋ تۋرالى باستاما كوتەردىم. بۇل قادام قوعامدىق ديالوگتى نىعايتا ءتۇسۋ ءۇشىن جاسالدى. سونداي-اق، مۇندا ۇلتتىڭ بولاشاعىنا ىقپال ەتەتىن ەلدىك ماسەلەلەر تالقىلانادى. ءبىز قۇرىلتايدىڭ العاشقى وتىرىسىن وسىدان ءدال ءبىر جىل بۇرىن ۇلت ۇياسى – ۇلىتاۋدا وتكىزدىك. كوپتەگەن ماڭىزدى ىستەر مەملەكەتتىگىمىزدىڭ نەگىزى قالانعان قاستەرلى ولكەدەن باستاۋ الدى. وسى يگى ءۇردىس بيىل دا جالعاسىن تابۋدا»، - دەدى پرەزيدەنت.
مەملەكەت باسشىسى بۇگىنگى باسقوسۋدىڭ بۇكىل تۇركى حالىقتارى ءۇشىن كيەلى شاھاردا ءوتىپ جاتقانىن دا اتاپ ءوتتى.
«حالقىمىز ادەتتە تۇركىستاندى قازاقتىڭ رۋحاني استاناسى دەيدى. دەگەنمەن، قالانىڭ ءمان-ماڭىزى بۇدان الدەقايدا جوعارى. كيەلى شاھار ەلىمىزدىڭ تاريحىندا ايرىقشا ءرول اتقارعان. كونە زاماننان بەرى ۇلى جىبەك جولىنىڭ بويىنداعى ءىرى قالا بولعان. باۋىرلاس حالىقتاردىڭ بارىنە ءىلىم-بىلىم تاراتقان رۋحانيات وشاعى سانالعان. سونداي-اق، قازاقتىڭ تاريحىندا وشپەس ءىز قالدىرعان كوپتەگەن تۇلعالارىمىز وسى جەردەن ماڭگىلىك مەكەنىن تاپقان. شەجىرەلى شاھاردىڭ قابىرعاسىنا قازاقتىڭ جىلناماسى تۇگەل جازىلعان دەۋگە بولادى. شىن مانىندە، كيەلى تۇركىستان – ۇلى دالا وركەنيەتىنىڭ مىزعىماس تەمىرقازىعى»، - دەپ توقتالدى قاسىم-جومارت توقايەۆ.