ۇلتتىق قوردا ءقازىر شامامەن 56 ميلليارد دوللار بار.
ۇلتتىق ەكونوميكا ءبىرىنشى ۆيسە-مينيسترى تيمۋر جاقسىلىقوۆتىڭ ايتۋىنشا، ۇلتتىق قوردان كەپىلدەندىرىلگەن ترانسفەرت مولشەرىن 4 تريلليون تەڭگەگە دەيىن ۇلعايتۋ قاراستىرىلىپ وتىر، دەپ حابارلايدى Almaty-akshamy.kz
پارلامەنت ءماجىلىسى "ۇلتتىق قوردان 2022-2024 جىلدارعا ارنالعان كەپىلدەندىرىلگەن ترانسفەرت تۋرالى زاڭعا وزگەرىس ەنگىزۋ تۋرالى" زاڭ جوباسىن ماقۇلدادى.
«قاراجات پرەزيدەنت تاپسىرمالارىن ىسكە اسىرۋ ءۇشىن قوسىمشا قارجىلاندىرۋ اياسىندا رەسپۋبليكالىق بيۋدجەتتىڭ تەڭگەرىمدىلىگىن قامتاماسىز ەتۋگە باعىتتالادى»، - دەدى تيمۋر جاقسىلىقوۆ.
ول ۇلتتىق قوردىڭ نىسانالى كورسەتكىشتەرى فيسكالدىق شەكتەۋلەر شەگىندە ساقتالاتىنىن اتاپ ءوتتى. بۇعان دەيىن ۇلتتىق ەكونوميكا ءمينيسترى الىبەك قۋانتىروۆ ۇلتتىق قور تاۋسىلىپ قالمايدى دەپ سەندىرگەن ەدى.
ونىڭ ايتۋىنشا، ۇلتتىق قوردان قاراجات الۋ قالىپتى پروسەسس. بۇل - كونترسيكلدى بيۋدجەتتىك ساياساتتىڭ ءبىر بولىگى. ۇلتتىق قوردا ءقازىر شامامەن 56 ميلليارد دوللار بار.