بۇل تۋرالى قازاقستان ادىلەت ءمينيسترى ازامات ەسقارايەۆ مالىمدەدى.
"ۇلتتىق قور – بالالارعا" جوباسى اياسىندا ءار بالاعا شامامەن 1،5 ميلليون تەڭگە تولەنەتىن بولادى، دەپ حابارلايدى Almaty-akshamy.kz
ول بالالاردىڭ 18 جاسقا تولعاننان كەيىن تولەم الا الاتىنىن ەسكە سالدى. بارلىق جاڭا تۋعان بالالار مەن 18 جاسقا تولماعاندار تۋرالى مالىمەتتەر بازاسى ادىلەت مينيسترلىگىندە ساقتالادى.
"جالپى 18 جاسقا دەيىن ۇلتتىق قوردان ءار بالاعا ءبىر جارىم ميلليون تەڭگە تولەنەتىن بولادى. مەنىڭ ويىمشا، بۇل پرەزيدەنتتىڭ ۇلكەن قادامى، بۇل كوپتەگەن وتباسىلار ءۇشىن ۇلكەن قولداۋ"، - دەدى ول.
ەسكە سالايىق، پارلامەنت ءماجىلىسىنىڭ دەپۋتاتتارى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ ۇلتتىق قورىنان بالالارعا تولەمدەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن جۇمىسقا قابىلداعانى حابارلانعان بولاتىن.
"بۇل زاڭ جوباسى 2024 جىلدىڭ 1 قاڭتارىنان باستاپ مەملەكەت باسشىسىنىڭ "ۇلتتىق قور – بالالارعا" جوباسىن ىسكە قوسۋ ماقساتىندا ازىرلەندى. ۇلتتىق قوردىڭ جىل سايىنعى ينۆەستيسيالىق تابىسىنىڭ 50% - ى بالالاردىڭ ارنايى جيناقتاۋ شوتتارىندا تۇرادى. زاڭ جوباسىنىڭ نەگىزگى ماقساتى - قازاقستان رەسپۋبليكاسىنىڭ ازاماتتارىنىڭ كامەلەتكە تولعان كەزدە دەيىن تۇرعىن ءۇي جاعدايىن جاقسارتۋ نەمەسە جيناق ەسەبىنەن ءبىلىم الۋ مۇمكىندىگىن تۋدىرۋ ارقىلى جاس ۇرپاقتى قولداۋ"، - دەپ ءتۇسىندىردى دەپۋتات ءمادي تاقييەۆ ءماجىلىستىڭ جالپى وتىرىسىندا.
سونىمەن قاتار، ونىڭ ايتۋىنشا، مەملەكەتكە قايتارىلعان اكتيۆتەردى جيناقتاۋ جانە باسقارۋ ماسەلەلەرى بويىنشا ارنايى مەملەكەتتىك قور مەن باسقارۋشى كومپانيا قۇرىلاتىن بولادى.