ۇلتتىق قور ەسكەرتەدى

الەۋمەتتىك جەلىلەردە وتەماقى تولەۋ تۋرالى اقپارات تاعى دا تارادى.

ەندى الاياقتار قازاقستان رەسپۋبليكاسى ۇلتتىق قورىنىڭ اتىنان ارەكەت ەتۋدە. بۇل جاريالانىم – فەيك، وعان سەنۋدىڭ قاجەتى جوق، دەپ حابارلايدى Almaty-akshamy.kz.

Stopfake.kz مالىمەتىنشە، جارناماداعى سىلتەمە ق ر ۇلتتىق قورىنىڭ جالعان سايتىنا اپارادى. وندا 2020-2029 جىلدارعا ارنالعان ازاماتتارعا وتەماقى تولەۋ جوباسى تۋرالى جاڭالىق جاريالانعان. ولار سالىق اۋدارىمدارىنا، جۇمىس وتىلىنە، وتكەن جىلداعى ساتىپ الۋ قابىلەتىنە جانە شىعىندارعا نەگىزدەلگەن. وتەماقى مولشەرىن تەكسەرۋ ءۇشىن پايدالانۋشى ءوزىنىڭ ءجسن-ىن تەرۋگە ءتيىس.

جالعان سايتتاردا جەكە اقپاراتتى قالدىرماعان ءجون. الاياقتار ونى ءوز پايداسىنا پايدالانادى.

«ق ر ۇلتتىق قورىنىڭ رەسمي سايتى جوق. تولەمدەر بويىنشا بارلىق اقپارات ق ر ۇكىمەتى مەن ق ر ۇلتتىق بانكىنىڭ پورتالدارىندا جاريالانادى. رەسمي اقپارات كوزدەرىندە 2020-2029 جىلدارعا ارنالعان ازاماتتارعا وتەماقى تولەۋ جوباسى تۋرالى حابارلانعان جوق.

سوڭعى كەزدەرى مەملەكەتتىك ورگانداردىڭ اتىنان مۇنداي حابارلاندىرۋلار تانىمال الەۋمەتتىك جەلىلەردە ءجيى جاريالانۋدا. ءبىز ولاردىڭ جالعان ەكەنىن ەسكەرتكەن بولاتىنبىز»، - دەلىنگەن ۇلتتىق قور حابارلاماسىندا. 

.