ەلوردا تۇرعىندارىنا «ۇلتتىق قور-بالالارعا» جوباسىنا قاتىسۋ تالاپتارى ءتۇسىندىرىلىپ جاتىر.
اتالعان جوباعا قاتىسۋ ءۇشىن اتا-انالار قانداي قۇجات جيناۋى كەرەك دەگەن سۇراققا قارجى ۆيسە-مينيسترى داۋرەن تەمىربەكوۆ جاۋاپ بەردى جانە اتا-انالارعا ەشقانداي قۇجات جيناۋدىڭ قاجەتى جوق ەكەنىن ايتتى، دەپ حابارلايدى Almaty-akshamy.kz
«بارلىق بالا قاتىسادى. ەشقايدا بارۋدىڭ قاجەتى جوق، تۇتاس پروسەسس اۆتوماتتاندىرىلعان. ءبىرىڭعاي جيناقتاۋشى قور ادىلەت مينيسترلىگىمەن بىرلەسىپ، ءتيىستى ينتەگراسيالىق جۇمىس جۇرگىزەدى. 18 جاسقا دەيىن قاراجات ۇلتتىق قوردا ساقتالادى. 18 جاسقا تولعاننان كەيىن عانا بۇل سوما شوتتارعا اۋدارىلادى. سودان كەيىن بۇل قاراجاتتى بىرنەشە ماقساتتا پايدالانۋعا بولادى»، - دەدى داۋرەن تەمىربەكوۆ بريفينگتە.
سونداي-اق «بجزق» اق باسقارۋشى ديرەكتورى مۇرات ءشارىپوۆ قاراجاتتى تولەۋ دوللارمەن جۇرگىزىلەتىنىن ايتتى. بازادا بالانىڭ دەرەكتەرى بار، سوندىقتان بجزق دەرەكتەردىڭ سايكەستىگىن جۇرگىزەدى جانە سومانى ەسەپتەيدى.