قازاقستان ارقىلى جۇك تاسىمالداۋ ۋاقىتى قىسقارادى

سوڭعى 10 جىلدا $30 ملرد ينۆەستيسيا قۇيىلدى.

كولىك ءمينيسترى مارات قارابايەۆتىڭ ايتۋىنشا، قازاقستان اۋماعى ارقىلى وتەتىن ترانزيتتىك جۇكتەردى تاسىمالداۋ ۋاقىتى 12 كۇننەن 5 كۇنگە دەيىن قىسقارادى، دەپ حابارلايدى Almaty-akshamy.kz

ۆەدومستۆو باسپا ءسوز قىزمەتىنىڭ حابارلاۋىنشا ينۆەستيسيالار تارتۋ جانە ىنتىماقتاستىق ماسەلەلەرىنە ارنالعان جيىنعا 100-دەن استام شەتەلدىك كاسىپورىن قاتىستى.

قارابايەۆ سوڭعى 10 جىلدا ەلىمىزدىڭ كولىك-لوگيستيكالىق ينفراقۇرىلىمىنا شامامەن $30 ملرد ينۆەستيسيا قۇيىلىپ، ناتيجەسىندە 2،5 مىڭ جاڭا تەمىر جول، 13 مىڭ كم اۆتوجول سالىنعانىن، سونىمەن بىرگە 21 ملن تونناعا اقتاۋ جانە قۇرىق تەڭىز پورتتارىنىڭ قۋاتى كەڭەيتىلگەنىن، ۇشۋ-قونۋ جولاعى جانە 22 اۋەجايداعى تەرمينالدار قايتا جاڭارتىلعانىن اتاپ ءوتتى.

2022 جىلدىڭ قورىتىندىسى بويىنشا سالىنعان ءاربىر دوللار $4،8 اكەلگەن، ال سالادا جۇمىسپەن قامتىلعان 1 ادامعا شاققانداعى ەڭبەك ونىمدىلىگى $21 230 قۇرادى.

كولىك مينيسترلىگى باسشىسىنىڭ مالىمەتىنشە، قازىرگى ۋاقىتتا قازاقستاندا ەۋرازيا قۇرلىعىنىڭ نەگىزگى ساۋدا مارشرۋتتارىمەن بايلانىستى 16 مىڭ كم تەمىرجول جانە 95،5 مىڭ شاقىرىم اۆتوموبيل جولى بار.

"قازاقستان ارقىلى 13 حالىقارالىق كولىك ءدالىزى وتەدى، ونىڭ ىشىندە 5 تەمىرجول جانە 8 اۆتوموبيل جولى. 2022 جىلى رەسپۋبليكا اۋماعى ارقىلى ءترانزيتتىڭ جالپى كولەمى 23،2 ملن تونناعا جەتتى. بۇل 2021 جىلمەن سالىستىرعاندا 10 پايىزعا ارتىق. ەڭ ۇلكەن ءوسىم مۋلتيمودالدى ترانسكاسپيي حالىقارالىق كولىك مارشرۋتىندا بايقالادى. "تار ورىنداردى" جويۋ بويىنشا قابىلدانىپ جاتقان شارالاردىڭ ناتيجەسىندە جىل سوڭىنا قاراي جۇكتەردىڭ ورتا ءدالىز بويىنشا ءوتۋ ۋاقىتى 3 ەسەگە – 38-53 كۇننەن 14-18 كۇنگە دەيىن، ونىڭ ىشىندە قازاقستان اۋماعى بويىنشا – 12 كۇننەن 5 كۇنگە دەيىن قىسقارادى"، - دەدى مارات قارابايەۆ.