دەپۋتات بۇل ماسەلەنى شەشۋ ءۇشىن ۇكىمەت ناقتى ءىس-شارالار قابىلداۋى كەرەك ەكەنىن ايتتى
ماجىلىستەگى ۇكىمەت ساعاتىندا دەپۋتات ەرلان سايروۆ شەكاراداعى اۋدان مەن اۋىلدارداعى جاقىن ەلدەردىڭ ۇيالى بايلانىسى مەن راديو تولقىندارىنىڭ جۇمىس ىستەيتىنىن ايتتى، دەپ حابارلايدى Almaty-akshamy.kz.
«پرەزيدەنتىمىز شەكارالىق اۋىل مەن اۋدانداردىڭ دامۋى ماسەلەسىن ءوزىنىڭ باقىلاۋىنا الىپ وتىر. قازاقستاندا شەكارا تۇبىندە تۇراتىن 50-گە جۋىق اۋىل بار. سول اۋىلداردا جول، مەديسينا، ۇيالى بايلانىس، سۋ ماسەلەسى ءالى دە وزەكتى. مىسالى، كەيبىر اۋىلدا مەدپۋنكت بولسا، فەلدشەر بولمايدى. ال كەي اۋىلعا جازدا دا، قىستا دا جەتۋ قيىن. ول جاققا جول جوق. جول بولماسا، ازاماتتاردىڭ ول جاقتا تۇرۋعا قۇلقى بولمايدى»، - دەدى ول.
سايروۆ اتاعانداي، شەكارالىق اۋىلدارداعى ەلدىڭ ۇلتتىق قاۋىپسىزدىگىنە كەرى اسەر ەتەتىن ەڭ نەگىزگى ماسەلە – شەتەلدىك ۇيالى وپەراتورلاردىڭ جۇمىس ىستەپ تۇرعانى.
«مىسالى، قىتايعا قارايتىن بولسا، زايساڭ، مارقاكول، ماقانشى، الماتى، نارىنقولداردىڭ بارلىعىندا قىتايدىڭ ۇيالى وپەراتورلارى ىستەپ تۇر. رەسەيگە قارايتىن بولساق، سولاردىڭ ۇيالى وپەراتورى ىستەپ تۇر. بۇل - ءبىزدىڭ ەلىمىزدىڭ تۇتاستىعىنا، بۇگىنگى تاڭدا ۇلتتىق قاۋىپسىزدىككە تىكەلەي اسەر ەتەتىن ماسەلە. وسى ماسەلەنى قالاي شەشەمىز؟ شقو-داعى تارباعاتاي مەن زايساندا مينيسترلىك پەن اكىمدىك بىرىگىپ، ۇيالى وپەراتورلارىن قويىپ جاتىر. ال باسقا شەكارالاس اۋداندارداعى ماسەلە دە وسىنداي. بۇل ماسەلەنى شەشۋ ءۇشىن ۇكىمەت ناقتى ءىس-شارالار قابىلداۋى كەرەك»، - دەدى ەرلان سايروۆ.
ۇلتتىق ەكونوميكا ءمينيسترى الىبەك قۋانتىروۆ بۇل ماسەلە كەشەندى تۇردە شەشىلەتىنىن ايتتى.
«شەكارالاس اۋىلداردىڭ دەڭگەيى بارلىعى ءارتۇرلى. شىعىستا ءبىر جاعداي، سولتۇستىكتە ءبىر جاعداي، رەسەي جاقتا ءبىر جاعداي بولىپ وتىر. شەكاراداعى شەكارالىق زاستاۆالاردى كۇشەيتۋ مەن ونىڭ توڭىرەگىندەگى اۋىلداردى دامىتۋ كوزدەلىپ وتىر»، - دەدى ول.
ءوز كەزەگىندە سيفرلىق دامۋ جانە اەروعارىش ونەركاسىبى ۆيسە-مينيسترى اسحات ورازبەك راديو تولقىنداردى شەكارادا شەكتەۋ مۇمكىن ەمەس ەكەنىن ايتتى.
«بايلانىس سالاسىنداعى وڭىرلىك اكىمشىلىك باسشىلارى 2019 جىلى شەكارا ارقىلى راديو اقپاراتتى تاراتۋدىڭ ماكسيمالدى قاشىقتىعى 15 شاقىرىمعا دەيىن بەكىتىلدى. اكىمدىكتەردىڭ مالىمەتىنشە، ەل شەكاراسىنىڭ اۋماعىندا 770 اۋىل ورنالاسقان. ونىڭ ىشىندە 228 اۋىلدا شەتەلدىك وپەراتورلاردىڭ بايلانىس سيگنالدارى بار. ول راس. قولجەتىمدى ينتەرنەت جوباسىنا سايكەس، ءبىز 2024-2027 جىلدارى وسى اۋىلدارعا جاي بايلانىس ەمەس، ساپالى ينتەرنەتتى تارتۋدى كوزدەپ وتىرمىز»، - دەدى ول.
ەرلان سايروۆ كورشىلەس ەلدەر، ونىڭ ىشىندە جۇڭگو، وزبەكستان، رەسەي شەتەلدىك ۇيالى بايلانىستارىن شەكتەيتىنىن ايتتى.
«ولار ينتەرنەت دەگەنىمىز يدەولوگيا ەكەنىن بىلەدى. بىزگە دە شەتەلدىك ۇيالى بايلانىستى شەكتەيتىن قالقان قۇرۋىمىز كەرەك. بۇل - ءبىزدىڭ ۇلتتىق قاۋىپسىزدىگىمىزدىڭ ەڭ نەگىزگى اسپەكتىسى»، - دەدى دەپۋتات.