كۇنكورۋ ماقساتىندا مەگاپوليس الماتى كوپشىلىككە قولايلى بولىپ تۇرعانداي. جان-جاقتان اعىلعان جۇرتشىلىق كولىك جۇرگىزۋشىسى قىزمەتىن تاڭدايدى. تاڭنىڭ اتىسىنان كۇننىڭ باتىسىنا دەيىن كولىك رولىندە وتىرۋ وڭاي ەمەس. بىرنەشە ساعاتقا سوزىلعان كولىك كەپتەلىسى. كوشەنىڭ قايناعان ءومىرى جۇيكە جۇيەڭە جۇك سالارى انىق. ونىڭ ۇستىنە، كوشەلەردى باقىلايتىن كامەرالار جۇرگىزۋشىنىڭ جىبەرگەن كەمشىلىگىن ءتۇسىرىپ الىپ، ايىپپۇل سالۋدا. سوندىقتان دا جان-جاقتان اعىلعان «جۇرگىزۋشىلەر» جۇبايى نەمەسە تانىس-تامىرىنىڭ اتىنان ەسەپ شوت اشىپ قويعان. بۇل الگى ايىپپۇلدى تولەمەۋدىڭ توتە جولى بولسا كەرەك-تى.
جالپى جول ەرەجەسىن بۇزعانى تۋرالى كولىك جۇرگىزۋشىسىنىڭ يەسىنە حابارلاما جىبەرىلەدى مە، جىبەرىلسە قانشا ۋاقىت ىشىندە دەگەن سەكىلدى ساۋالمەن الماتى قالاسى پوليسيا دەپارتامەنتى اكىمشىلىك پوليسيا باسقارماسىنىڭ باسشىسى پوليسيا پودپولكوۆنيگى قۇلىبايەۆ اسحاتقا حابارلاستىق.
ونىڭ مالىمەتى بويىنشا الماتى قالاسىندا 2023 جىلدىڭ 4 ايىندا جول ەرەجەسىن بۇزۋ فاكتىسى بويىنشا-330 239 ايىپپۇل تىركەلگەن. ونىڭ ىشىندە 94 962 ازاماتتار ايىپپۇلىن تولەمەگەن. ق ر اقبتك-نىڭ 893-بابىنىڭ 1-بولىگى نەگىزىندە ايىپپۇلدى اكىمشىلىك جاۋاپتىلىققا تارتىلعان تۇلعا ايىپپۇل سالۋ تۋرالى قاۋلى، ايىپپۇل تولەۋ قاجەتتىگى تۋرالى نۇسقاما زاڭدى كۇشىنە ەنگەن كۇننەن باستاپ وتىز تاۋلىك ىشىندە كەشىكتىرمەي تولەۋى ءتيىس. بەلگىلەنگەن ۋاقىت ارالىعىندا ايىپپۇل بويىنشا تولەم جۇرگىزىلمەسە، ق ر اقبتك-نىڭ 894 بابىنا سايكەس ايىپپۇل سالۋ تۋرالى قاۋلىنى نەمەسە ايىپپۇل تولەۋ قاجەتتىگى تۋرالى نۇسقامانى سوت، ۋاكىلەتتى ورگان (لاۋازىمدى ادام) جاۋاپقا تارتىلعان تۇلعانىڭ جالاقىسىنان نەمەسە وزگە دە كىرىستەرىنەن ايىپپۇل سوماسىن ماجبۇرلەۋ تارتىبىمەن ۇستاپ قالۋ ءۇشىن ول جۇمىس ىستەيتىن نەمەسە سىياقى، زەينەتاقى، ستيپەنديا الاتىن ۇيىمنىڭ اكىمشىلىگىنە جىبەرەدى. ەگەر ايىپپۇل سالىنعان جەكە تۇلعا جۇمىس ىستەمەيتىن بولسا نەمەسە باسقا دا سەبەپتەر بويىنشا ايىپپۇلدى جالاقىسىنان نەمەسە وزگە دە تابىستارىنان ءوندىرىپ الۋ مۇمكىن بولماسا، قاۋلىنى شىعارعان سوت نەمەسە ۋاكىلەتتى ورگان ايىپپۇل سالۋ تۋرالى قاۋلىنى، ايىپپۇل تولەۋ قاجەتتىگى تۋرالى نۇسقامانى قازاقستان رەسپۋبليكاسىنىڭ زاڭناماسىندا كوزدەلگەن تارتىپپەن ماجبۇرلەپ ورىنداتۋ ءۇشىن جەكە سوت ورىنداۋشىسىنا جىبەرەدى. ايىپپۇل سالۋ تۋرالى قاۋلى نەمەسە ايىپپۇل تولەۋ قاجەتتىگى تۋرالى نۇسقاما جەكە سوت ورىنداۋشىلارى پالاتاسىنا جولدانعانى تۋرالى ازاماتتاردىڭ ۇيالى بايلانىستىڭ ابونەنتتىك ءنومىرى بويىنشا ق ر اقبتك-نىڭ 743 -بابىنا سايكەس، حابارلاما جولدانىلادى.
ارى قارايعى جۇمىس جەكە سوت ورىنداۋشىلارىنىڭ قۇزىرىندا. سوندىقتان ءبىز الماتى قالاسى جەكە سوت ورىنداۋشىلار پالاتاسىنىڭ جەتەكشىسى قايداروۆ ايدىن سەرىكقازىۇلىنا جولىقتىق.
-جەكە سوت ورىنداۋشى – مەملەكەت الدىندا بەرەشەگى بار ازاماتتاردان ماجبۇرلەپ ءوندىرۋشى. اۆتوكولىك جايىندا ءسوز ەتسەك، ءومىر بولعان سوڭ ءتۇرلى جاعداي بولادى. بىلە تۇرا نەمەسە بىلمەي ەرەجەنى بۇزادى. سول بويىنشا حاتتاما تولتىرىلىپ، جول پوليسيا قىزمەتكەرلەرى ءوز قۇقىقتارى بويىنشا مىندەتتەرىن ورىندايدى. ولار زاڭ تالاپتارى نەگىزىندە ايىپپۇلدى تولەمەگەن سوڭ جەكە سوت ورىنداۋشىلارىنا ءىستى جولدايدى. دەمەك، وسى جاعىنان الاتىن بولساق، قانشاما ادام جول ەرەجەسىن بۇزىپ، تولەمەي جۇرە بەرەدى. ونى كىم وندىرەدى؟ ارينە، جەكە سوت ورىنداۋشىلار وندىرەدى. زاڭ بويىنشا جەكە سوت ورىنداۋشىعا ءىس جىبەرىلگەن كەزدە «ەلەكتروندى ۇكىمەت پورتالىندا» ازاماتتاردىڭ تىركەگەن ۇيالى بايلانىس ابونەنتتىك ءنومىرى بويىنشا اۆتوماتتى رەجيمدە تىركەلگەن ايىپپۇل بويىنشا جانە ونىڭ جەكە سوت ورىنداۋشىلارىنا جولدانعانى تۋرالى حابارلاما كەلىپ تۇسەدى. ونان كەيىن ءىستى قولىنا العان جەكە سوت ورىنداۋشىسى ءتارتىپ بۇزۋشىعا حابارلاسىپ، ءىس تۋرالى ەسكەرتۋى ءتيىس. مۇنان سوڭ، ايىپپۇل تولەنبەسە ەسەپ-شوتىن بۇعاتتايدى. ەسەپ-شوتتى بۇعاتتاۋعا جەكە سوت ورىنداۋشىلارىنىڭ عانا قۇزىرەتى جەتەدى. مىنە، وسىلايشا ماجبۇرلەپ مەملەكەت قازىناسىنا قارجى قۇيادى. ادام بولعان سوڭ كەيدە قىزمەتىن اسىرا پايدالانۋ جاعدايلارى دا كەزدەسەتىن شىعار. مۇنداي جاعدايدا بىزگە شاعىمدانسا ءتارتىپ بويىنشا شارا قولدانامىز، -دەدى ول.
ازاماتتاردىڭ كوبى بۇگىنگى ەلەكتروندى جۇيەنى مەڭگەرمەگەن. سوندىقتان وسى ەلەكتروندى جۇيە ارقىلى ءتۇرلى قىزمەتتەردى جاساپ، پايدا تاۋىپ وتىرعان ادامداردىڭ كومەگىنە جۇگىنگەن كەزدە دە ءوز تەلەفونىڭىزدى تىركەۋىن تالاپ ەتۋىڭىزگە تۋرا كەلەدى. سالعىرتتىق تانىتساڭىز وزگەنىڭ نومىرىنە ءسىز تۋرالى اقپارات باراتىن بولاتىن. بۇگىنگى ماقالانى جازۋ بارىسىندا ساۋاتتىلىق – كوپ جاعدايدا ءوز جولىڭىزدى تەز تابۋعا مۇمكىندىك بەرەدى.