بىلتىر ەرەكشە قورعالاتىن تابيعي اۋماقتاردا ەرەجە بۇزعان 655 ادام اكىمشىلىك جاۋاپقا تارتىلدى. بۇل تۋرالى ب ا ق وكىلدەرىنىڭ قاتىسۋىمەن وتكەن بريفينگىدە ەكولوگيا مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى دانيار تۇرعامبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بىلتىر ەرەكشە قورعالاتىن تابيعي اۋماقتا باقىلاۋ-ينسپەكسيالىق قىزمەت شەڭبەرىندە 2 992 رەيد جۇرگىزىلىپ 44 قۇقىق بۇزۋشىلىق انىقتالدى. ناتيجەسىندە 655 ادامعا 640 ملن تەڭگە كولەمىندە ايىپپۇل سالىندى»، - دەپ ءمالىم ەتتى دانيار تۇرعامبايەۆ.
سونىمەن قاتار، ونىڭ ايتۋىنشا، وتكەن جىلى ۇلتتىق پاركتەرگە كەلۋشىلەر سانى 2 ملن استى. بۇل 2021 جىلمەن سالىستىرعاندا 25%-عا كوپ.
«ەرەكشە قورعالاتىن تابيعي اۋماقتاردى پايدالانعانى ءۇشىن تولەماقى جيناۋدىڭ اشىقتىعىن قامتاماسىز ەتۋ جانە سىبايلاس جەمقورلىق تاۋەكەلدەرىن ازايتۋ ماقساتىندا ۇلتتىق پاركتەردىڭ باقىلاۋ-وتكىزۋ پۋنكتتەرىن اۆتوماتتاندىرۋ بويىنشا جۇمىستار جۇرگىزىلۋدە. «كولساي كولدەرى» ۇلتتىق پاركىندە «كولساي» باقىلاۋ-وتكىزۋ پۋنكتى اۆتوماتتاندىرىلدى، سونداي-اق تولەمدەردى قابىلداۋدىڭ ينتەگراسيالانعان جۇيەسىمەن جاڭا سايت ازىرلەندى. اتالعان جۇمىستىڭ قورىتىندىسى بويىنشا وسى ءتاسىلدى بارلىق ۇلتتىق پاركتەرگە ەنگىزۋ مۇمكىندىگى قاراستىرىلۋدا. بيىل ىلە-الاتاۋى، شارىن جانە باياناۋىل ۇلتتىق پاركتەرىندە باقىلاۋ-وتكىزۋ پۋنكتتەرىن اۆتوماتتاندىرۋ جوسپارلانۋدا»، - دەپ ءبولىستى كوميتەت ءتوراعاسىنىڭ ورىنباسارى.