الايدا ءىس جۇزىندە ءالى كۇنگە يمپورتقا تاۋەلدىمىز.
قازاقستانداعى 30 جىل بويى ءسۇت سالاسىن دامىتۋعا ارنالعان باعدارلامالار ىشكى نارىقتى 100% قامتۋعا كەپىلدىك بەرگەن، دەپ حابارلايدى Almaty-akshamy.kz «اتامەكەن» ۇلتتىق كاسىپكەرلەر پالاتاسىنا سىلتەمە جاساپ.
بىلتىر 400 ملن دوللارعا دەيىنگى سوماداعى ءسۇت ءونىمى سىرتتان كەلگەن.
ۇلتتىق پالاتا ساراپشىلارى جاعدايدى تۇبەگەيلى وزگەرتۋگە بولادى دەپ وتىر. ول ءۇشىن ۇزاق مەرزىمگە جوسپارلانعان، ۇكىمەتتەگى اۋىس-تۇيىسكە، سىرتقى فاكتورعا تاۋەلدى بولمايتىن باعدارلاما ازىرلەۋگە دە دايىن جانە كاسىپكەرلەردەن ۇسىنىس كۇتەدى.
«ەلىمىزدە ءسۇت سالاسىنىڭ اۋىل شارۋاشىلىعى ەكونوميكاسىنداعى ۇلەسى زور. جىل سايىن ءسۇت سالاسى 500 ملرد تەڭگەگە جۋىق ءونىم وندىرەدى. ارينە، بۇل – ەكونوميكاعا قوماقتى ۇلەس. اۋىل شارۋاشىلىعى – اۋىلدا جىل بويى جۇمىسپەن قامتۋدى قامتاماسىز ەتەتىن ءسۇت-تاۋار فەرمالارى. ونىڭ ۇستىنە بۇل فەرمەرلەر ۇزدىكسىز دامىپ، سالاسىن جاڭارتىپ وتىرادى. جەردى ەڭ كوپ پايدالاناتىن شارۋالار. ال، «اتامەكەن» قابىرعاسىندا ءبىز ولاردى «ناعىز پاتريوتتار» دەيمىز. ويتكەنى سۇتپەن اينالىسۋ وتە قيىن. جىلىنا 365 كۇن ۇزدىكسىز پروسەسس. ءسۇت سالاسىنداعى تانىمال كاسىپكەر يۆان اداموۆيچ ساۋەر كىم سۇتپەن اينالىسقىسى كەلسە، الدىمەن تىك تۇرىپ ۇيىقتاپ ۇيرەنۋ كەرەك دەگەن بولاتىن. جۇمىسشىلاردىڭ بىلىكتىلىك دەڭگەيى، تەحنيكالىق قامتاماسىز ەتۋ دەڭگەيى – ءبارى جوعارى دەڭگەيدە بولۋى كەرەك. جاڭا تەحنولوگيالاردى ەنگىزۋ قاجەت. ءبىر ورىندا تۇرمايتىن پروسەسس. مالدىڭ جەم-شوبىنىڭ ساپاسى، ەسەپ-قيساپتى رەتتەۋ دەگەن وندىرىسكە اسا جاۋاپكەرشىلىكپەن قاراۋدى قاجەت ەتەتىن جۇمىس. سوندىقتان بۇل جۇمىستى كەز كەلگەن ادام دوڭگەلەتىپ اكەتە المايدى. وسىنشا قيىندىققا دايىن بولۋ كەرەك»، – دەپ باياندادى ەربول ەسەنەيەۆ.
اتالعان باستامانى اۋىل شارۋاشىلىعى دا، ۇكىمەت تە قولداپ وتىر.
ەربول ەسەنەيەۆ باعدارلامانى نەعۇرلىم ەرتە ەنگىزۋ جوسپارلانعانىن قوستى. سەبەبى الداعى جىلدارعا دامۋ جوسپارىن انىقتاۋ ماڭىزدى.
«وڭىرلەرگە تالداۋ جاساپ، ءتيىمدى جولدى بەكىتۋ كەرەك. عىلىمنىڭ شەشىمىن تالداۋ كەرەك. وكىنىشكە قاراي، عىلىم بيزنەس قوياتىن تالاپتارعا ءاردايىم جاۋاپ بەرە المايدى. ءوز ءوندىرىسىمىز، ءوز مالىمىز بولۋ كەرەك. جەم-شوپپەن قامتاماسىز ەتۋ ءۇشىن جەتكىلىكتى مولشەردە سۋارمالى جەرلەر قاجەت. سوندىقتان سۇراق كوپ. وسى پروسەسكە كىرىسكەننەن كەيىن ءارى قاراي اۋقىمى ۇلعايادى دەپ ويلايمىن جانە تەك «سۇتپەن» توقتاپ قالمايدى. ۇلتتىق پالاتا بارلىق سالاعا وسىنداي دامۋ جوسپارىن ازىرلەۋدى كوزدەپ وتىر. سونداي-اق، وعان ۇكىمەتتەگى ءاۋىس-تۇيىس تە، سىرتقى فاكتورلار دا اسەر ەتە المايتىنداي بولادى. بۇل وسى سالاداعى كاسىپكەرلەردىڭ ءىس-قيمىلىنا ارنالعان جانە مەملەكەتكە وسى جوبالارعا قاتىسۋ مۇمكىندىك بەرەتىن باعدارلاما بولادى»، – دەپ تۇيىندەدى ۇلتتىق پالاتا ساراپشىسى.