مەرزىمدى قىزمەتكە 18-27 جاس ارالىعىنداعىلار شاقىرىلادى.
مەملەكەت باسشىسى قاسىم-جومارت توقايەۆ اسكەري قىزمەتشىلەردى زاپاسقا شىعارۋ جانە مەرزىمدى اسكەري قىزمەتكە كەزەكتى شاقىرۋ تۋرالى جارلىققا قول قويدى، دەپ حابارلايدى Almaty-akshamy.kz اقورداعا سىلتەمە جاساپ.
قۇجاتقا سايكەس، 2023 جىلدىڭ ناۋرىز-ماۋسىمىندا جانە قىركۇيەك-جەلتوقسانىندا اسكەري قىزمەتتىڭ بەلگىلەنگەن مەرزىمىن وتكەرگەن اسكەري قىزمەتشىلەر زاپاسقا شىعارىلادى.
ءدال سول كەزدە قازاقستاننىڭ قارۋلى كۇشتەرى، ىشكى ىستەر مينيسترلىگى، توتەنشە جاعدايلار مينيسترلىگى، ۇلتتىق قاۋىپسىزدىك كوميتەتى مەن مەملەكەتتىك كۇزەت قىزمەتىنە اسكەرگە شاقىرۋدى كەيىنگە قالدىرۋعا نەمەسە ودان بوساتىلۋعا قۇقىعى جوق ەر ادامدار شاقىرىلادى. مەرزىمدى اسكەري قىزمەتكە شاقىرىلاتىنداردىڭ جاسى - 18-27 ارالىعىندا.
"جەرگىلىكتى اتقارۋشى ورگاندار ءتيىستى جەرگىلىكتى اسكەري باسقارۋ ورگاندارى ارقىلى 2023 جىلدىڭ ناۋرىز-ماۋسىمىندا جانە قىركۇيەك-جەلتوقسانىندا ازاماتتاردى مەرزىمدى اسكەري قىزمەتكە شاقىرۋدى جۇرگىزۋدى ۇيىمداستىرسىن جانە قامتاماسىز ەتسىن"، - دەلىنگەن جارلىقتا.