الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى №11 مەكەمەسىندە جازاسىن وتەۋشى جاسوسپىرىمدەر اراسىندا الماتى قالاسى سپورت باسقارماسى «ۇلتتىق سپورت جانە ات سپورتى تۇرلەرى سپورت كلۋبىنىڭ» قولداۋىمەن ۇلتتىق سپورت تۇرلەرىنەن جارىس ءوتتى، دەپ حابارلايدى aqshamnews.kz.
ناقتىراق ايتساق، جاستار اسىق اتۋدان، 16 كگ گىر تاسىن كوتەرۋدەن، ارقان تارتۋدان جانە توعىزقۇمالاق ويناپ جارىستى. اسىق اتۋ سپورتىنىڭ جاتتىقتىرۋشىلارى راۋان توقتارباي، ارحات سەيىتقوجانوۆ بالالارمەن توپتىق ويىندار وتكىزىپ، جەڭىمپازداردى انىقتادى. گىر تاسىن كوتەرۋ جاتتىقتىرۋشىسى ەرنار ءابيقوجا جانە توعىزقۇمالاقتان بەرىك سەمبايەۆ، ارقان تارتىس ويىنىن قاداعالاعان ەرمۇحان شارقابايەۆ تا قىزىقتى ويىندار ورنەگىن كورسەتە بىلگەن جاستارعا قىزىقتى كەش سىيلادى.
– ۇلتتىق جانە ات سپورتى تۇرلەرى سپورت كلۋبىنىڭ قۇرامىندا تەك ات سپورتى عانا ەمەس، اسىق اتۋ، ءداستۇرلى ساداق اتۋ، جەكپە-جەك، قۇسبەگىلىك، توعىزقۇمالاق، قازاق كۇرەسى سىندى ۇلتتىق ويىندار دا بار. ۇلتتىق سپورت دەگەندە – ۇلتتىق رۋح، مادەنيەتىمىز بەن ءداستۇرىمىز ەسكە تۇسەدى. جالپى، كەيىنگى جىلدارى ەلىمىزدە ۇلتتىق سپورت تۇرلەرى قارقىندى دامىپ كەلەدى. جاستار اراسىندا ۇلتتىق سپورت تۇرلەرىن ناسيحاتتاۋ – باستى ماقسات. گىر كوتەرۋگە بىلەك كۇشى، توعىزقۇمالاق ويناۋعا زەرەكتىك، ال اسىق اتۋعا دالدىك، مەرگەندىك كەرەك. بالالار كولونياسىندا دا سپورتتى سۇيەتىن، باس بوستاندىعىنان ايىرىلسا دا سالاۋاتتى ءومىر سالتىن ۇستاناتىن وسىنداي سەرگەك جاستاردىڭ كوپتىگىنە قۋاندىق، – دەيدى راۋان توقتارباي.
جەڭىمپازدارعا الماتى قالاسى سپورت باسقارماسىنىڭ ماقتاۋ قاعازدارى تابىستالدى.
