مەملەكەت باسشىسى جۇمىس ساپارى بارىسىندا قالانىڭ الەۋمەتتىك-ەكونوميكالىق دامۋ تىنىسىمەن تانىستى.
قاسىم-جومارت توقايەۆ شىمكەنت اۋەجايىنىڭ جاڭا تەرمينالىمەن تانىستى، دەپ حابارلايدى aqshamnews.kz اقورداعا سىلتەمە جاساپ.
مەملەكەت باسشىسىنىڭ قالانى دامىتۋ جونىندەگى تاپسىرماسى اياسىندا سالىنعان اۋە ايلاعىنىڭ قۇرىلىسىنا جەكە ينۆەستور 24 ميلليارد تەڭگە قاراجات جۇمساعان. پرەزيدەنتكە قازاقستاننىڭ وڭتۇستىگىندە بىرەگەي اۆياسيالىق حاب قالىپتاستىرۋ وڭىردەگى اۋە قاتىناسىنىڭ باعىت سانىن 17-دەن 59-عا دەيىن ۇلعايتۋعا، سونداي-اق ەۋروپا مەن ازيانىڭ ءبىرقاتار ەلىنە رەيستەر اشۋعا مۇمكىندىك بەرەتىنى جونىندە باياندالدى.
مەملەكەت باسشىسى ساۋدا-لوگيستيكا ورتالىعىنا باردى
پرەزيدەنت ستراتەگيالىق ماڭىزى زور باتىس جۇڭگو – باتىس ەۋروپا كولىك دالىزىنە جاقىن ورنالاسقان Almaar Logistics ساۋدا-لوگيستيكا ورتالىعىنا باردى. اۋماعى 24 مىڭ شارشى مەتردى قۇرايتىن كوپ فۋنكسيونالدى كەشەن قۇرىلىسىنا جەكە ينۆەستور 14،8 ملرد تەڭگە قارجى قۇيعان. ورتالىق ءونىم ساقتاۋدىڭ وزىق تەحنولوگياسىمەن جابدىقتالعان. اتاپ ايتقاندا، تەز بۇزىلاتىن ازىق-تۇلىكتى ۇزاق ساقتاماي، بارىنشا جەدەل تاراتۋعا مۇمكىندىك بەرەتىن جۇيە ەنگىزىلگەن.
پرەزيدەنت اۋىل شارۋاشىلىعى ونىمدەرىنىڭ كورمەسىن ارالاپ كوردى
قالاداعى 50-گە جۋىق وڭدەۋشى كاسىپورىن بىلتىر 168،5 ملرد تەڭگەنىڭ ءونىمىن شىعارعان. قاسىم-جومارت توقايەۆقا جىلىجاي كەشەندەرىن سالۋعا تۇركيالىق Alarko Holding كومپانياسى 650 ملن دوللار، ال پولشانىڭ Fabe Polska SP كاسىپورنى 136 ملن دوللار كولەمىندە ينۆەستيسيا قۇيۋعا نيەتتى ەكەنى ايتىلدى.
پرەزيدەنت جاڭادان اشىلعان Coca-Cola Içecek Kazakhstan زاۋىتىنا باردى
وزىق تەحنولوگيالارمەن جابدىقتالعان جانە اۆتوماتتاندىرۋ دەڭگەيى وتە جوعارى كاسىپورىن جىلىنا 283 ملن ليترگە دەيىن سۋسىن شىعارا الادى. مەملەكەت باسشىسى ءوندىرىس بارىسىمەن تانىسقان سوڭ، ءوڭىردىڭ ەكونوميكالىق وسىمىنە سەرپىن بەرەتىن ءىرى ينۆەستيسيالىق جوبالاردى قولداۋدىڭ ماڭىزىن اتاپ ءوتتى.
