«بۇل – ەلىمىزدىڭ رۋحاني ومىرىندەگى مەرەيلى بەلەس»: پرەزيدەنت قۇرمانعازى اتىنداعى قازاق ۇلتتىق كونسەرۆاتورياسىن 80 جىلدىق مەرەيتويىمەن قۇتتىقتادى
ەلىمىزدەگى مۋزىكا سالاسىنىڭ ماماندارىن دايارلايتىن ءبىلىم ورداسى ءوز مەرەيتويىن اتاپ وتۋدە، دەپ حابارلايدى aqshamnews.kz.
مەملەكەت باسشىسى قاسىم-جومارت توقايەۆ قۇرمانعازى اتىنداعى قازاق ۇلتتىق كونسەرۆاتورياسىنىڭ ۇجىمىنا قۇتتىقتاۋ حات جولدادى. حاتتى قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا وقىپ بەردى.
«بۇل – ەلىمىزدىڭ رۋحاني ومىرىندەگى مەرەيلى بەلەس. ىرگەلى ءبىلىم ورداسى وسى كەزەڭدە ءتول مادەنيەتىمىزدىڭ التىن دىڭگەگىنە اينالدى. ۇلتتىق مۋزىكامىزدىڭ بىرەگەي ءداستۇرى بار ۇستاحاناسى رەتىندە تانىلدى. قازاقتىڭ ان-كۇي ونەرىن جاڭا دەڭگەيگە كوتەرىپ، ونىڭ عىلىمي نەگىزىن قالىپتاستىردى. كونسەرۆاتوريا – دارىندى جاستارعا كلاسسيكالىق مۋزىكانىڭ قىر-سىرىن ۇيرەتىپ، كاسىبي مۋزىكانتتار دايارلايتىن العاشقى جوعارى وقۋ ورنى. وركەنيەتىمىزدىڭ ءورىسىن كەڭەيتىپ، ونى جەر جۇزىنە تانىتقان كوپتەگەن مايتالمان ماماندارىمىز وسى قارا شاڭىراقتان قانات قاقتى. اعا بۋىن سالعان سارا جولدى كەيىنگى ۇرپاق لايىقتى جالعاستىرىپ كەلەدى. ولار ەلىمىزدىڭ شىعارماشىلىق ۇيىمدارىندا تابىستى ەڭبەك ەتىپ ءجۇر. وسى ورايدا، ۇلتتىق ونەرىمىزدى جان-جاقتى دارىپتەپ، رۋحانياتىمىزدى دامىتۋعا زور ۇلەس قوسقانى ءۇشىن كونسەرۆاتوريا ۇجىمىنا شىنايى ريزاشىلىعىمدى بىلدىرەمىن. بارشاڭىزعا شىعارماشىلىق شابىت تىلەيمىن! جۇمىستارىڭىز جەمىستى بولسىن!» – دەلىنگەن پرەزيدەنتتىڭ حاتىندا.
23 قاراشا مەن 3 جەلتوقسان ارالىعىندا قۇرمانعازى اتىنداعى قازاق ۇلتتىق كونسەرۆاتورياسىنىڭ 80 جىلدىعىنا ارنالعان مەرەيتويلىق مارافون اياسىندا كونسەرتتەر، شەبەرلىك ساباقتار، شىعارماشىلىق كەزدەسۋلەر، حالىقارالىق كونفەرەنسيا، كورمەلەر جانە باسقا دا ءىس-شارالار ءوتتى.
سالتاناتتى ءىس-شاراعا ەلىمىزدىڭ مادەني قازىناسىنا ولشەۋسىز ۇلەس قوسقان ونەر مايتالماندارى قاتىستى. ولاردىڭ قاتارىندا الىبەك دىنىشيەۆ، ءجاميليا باسپاقوۆا، روزا رىمبايەۆا، ءۇمىتجان جۇماقوۆا، ماريام قوجامقۇلوۆا، الماس الماتوۆ، سەرىك ەركىمبەكوۆ، كاريما ساحاربايەۆا، دۇيسەن قاسەيىنوۆ، التىنبەك قورازبايەۆ جانە باسقا دا ونەر قايراتكەرلەرى بار.